من حقها تخرج.......

Rena Jesus · رقم المشاركة : ( 1 ) 18 - 07 - 2016, 11:43 AM

عزيزي الزوج ايه اللي يخلي مراتك كأم تحب تخرج ولو مرة كل اسبوعين من غير ولادك؟
اكيد مش انانية منها ولا هي عايزة تصيع مثلا، بس من حقها:

*تحس انها لما حبت تنزل قامت طلعت هدومها، لبست و نزلت من غير ما تحضر شنطة ولبس لقبيلة وراها عشان مشوار كام ساعة

*تحس انها حرة تختار تلبس ايه من غير اي اعتبارات لقشط او ريالة او انها مجبرة تختار من اللبس اللي مش بيتكسر عشان الفرك اللي بتتعرضله وهي لسه في الطريق.

*تقعد جنبك قدام في العربية وتفتح الشباك علي اخره من غير ماتخاف لحد يعيا من الهوا وتعلي الراديو في الاغنية اللي بتحبها من غير ماتخاف لتصحي حد من الولاد عشان الخروجة تعدي علي خير

*توصل مشوارها وهي هدومها مفرودة، مكياجها زي ماهو

*تختار المكان اللي هتقعد فيه من غير ما تبقي صدعت من التفكير في اماكن فيها kids area او مفيهاش شيشة عشان الولاد والكحة

*تطلب الاكل اللي نفسها فيه بجد مش اللي ينفع ولادك يشاركوها فيه، تاكل سبايسي تاكل برجر تاكل ايس كريم في الشتا هي حرة تطلب اللي تحبه مرة في الاسبوع

*تستمتع بالخروجة فعلا مش تقضيها عنيها في وسط راسها عشان محدش يتوه او يتخطف، او تقضيها في الحمام بترضع او بتغير او تقضيها ماما بي بي

*من حقها تتبسط بجد وتحس انها خرجت بجد مش مجرد غيرت مكان بنفس روتين الامومة وبلاش بأة انا بتبسط لما هما يتبسطوا عشان ده ميمنعش انها تحس انها بتعمل حاجة لنفسها من غير بهدلة.

_واخر حاجة، ربنا يخليهم لينا ومايحرمناش من بهدلتهم بس نظرة عطف للام الله يكرمكوا عشان خروجة النادي وقعدة التمرين او البيسين بالهدوم لما يخلصوا دي مش خروجة ولا تغير موود كلب بلدي حتي مش ام