القرموطي «مشهد البلطجية أمام الصحفيين مهين.. مين جابهم والأمن بيحميهم ليه؟»
قال الإعلامي جابر القرموطي، إنه ذهب لاجتماع الجمعية العمومية للصحفيين الطارئ، اليوم الأربعاء، والذي صدر عنه عددًا من القرارات التصعيدية على خلفية أزمة اقتحام قوات الأمن لمقر النقابة بوسط القاهرة، مشددًا على أنه ندم على ذهابه لأن الوضع يُنذر بعواقب غير محمودة، لم ير مثلها منذ 50 عامًا. أضاف القرموطي، خلال تقديمه برنامج «مانشيت»، عبر فضائية «أون تي في»، «أنا روحت النقابة ويا ريتني ما روحت، رأيت فريقين واحد عنده مبدأ بيدافع عنه، وآخر مُشترى، واقفين أمام بعض، هؤلاء الذين زّجوا برئيس الجمهورية في أمر هو بعيد تمامًا عنه، إيه دخل تسلم الأيادي وصورة السيسي في النقابة؟ إيه اللي جاب الناس دي أصلًا؟ المسئول عن ذلك لازم يتحاسب». تابع: «مشهد مهين، العقلية لسه زي ما هي مش هتتغير، عيب وربنا، دي نقابة الصحفيين، يعني إيه الزملاء يضربوا أمام نقابتهم؟ يعني إيه زميلة تتعرض للتحرش أمام النقابة؟ طيب وبعدين يعني؟ والله دي أفكار عفا عليه الزمن، والله ده حال الصحفيين يصعب على الكافر، والله العظيم في صحفيين بيشتغلوا 4 شغلانات في اليوم عشان يكفي بيته، الصحفي حياته كلها جمعيات وسلف، قرارات الجمعية العامة على راسي من فوق، ويعز عليّا إن وزير الداخلية يبقى نيجاتف، يبقى عفريته». استكمل: «إيه اللي ودى الناس دي النقابة؟ إيه اللي يخلي الأمن يحمي دول؟ حامينهم ليه؟ هما اللي جوه النقابة ضد البلد والجيش والشرطة؟ ده على أساس اللي جوه النقابة يهود ولا هكسوس؟ مين اللي جاب دول؟ الناس دي هي برضو اللي رفعت أعلام السعودية في الشوارع، لو مرجعتوش عن اللي بتعملوه ده هتودوا البلد في ستين داهية، إنتوا ليه بتدمروا الدنيا؟ لمصلحة مين؟ إحنا بقينا أنيل من أردوغان والمصحف».
هذا الخبر منقول من : التحرير
04 - 05 - 2016, 06:28 PM
العرض العادي
