م الآخر| 8 نصائح للارتباط

[Mary Naeem]

م الآخر| 8 نصائح للارتباط

عارفين يا بنات بكرر تاني يا بنات اللي لسه مش مخطوبين أو مش مرتطبين أنا عاوز أتكلم معاكم كلمتين راجل لراجل من غير ما حد من الولاد أو الرجالة يتدخل.

كلمتين يفيدوكي في الظروف المنيلة اللي إحنا فيها دلوقتي لا جواز ولا ارتباط وظروف مادية ضنك مأثرة على العيال بتوع اليومين دول سدة نفسهم يا كبدي.

فأنا عاوزة أنصحك كام نصيحة عشان ماتبقيش انتي والزمن على الواد..

فأنا حتخيل نفسي راجل ومقدم على خطوة الارتباط بيكي علشان عجبني قوي لفة الطرحة بتاعتك "الإزبنش" وبادي الكارينه اللي انتي لابساه داعب سكون خيالي ..

نصيحة نمرة 1

عارفه الواد مارك اللي اخترع الفيس بوك واشترى الواتس آب والواد اللي اتشك في إيده وعفيته اللي اخترع الفايبر والتانجو وبرامج التشات ماعملوش كده علشان كل شويه تدخليليي على الفيس بوك تقوليلي صباح الخير. وتقومي محودة على الواتس آب علشان تقوليلي مابتردش ليه ! وفي نفس ذات اللحظة تكلمني على الفايبر وتقوليلي طمني عليك !! أنا كويس وحياة النبي كويس ارحمي أمي العيانة هو مش كورس أنتيبيوتك كل اتناشر ساعات انتي إيه مابتزهقيش !

نصيحة نمرة 2

بلاش الصور سيلفي بتاعة وانتي بتشربي العصير مع صحباتك وصور وانتي بتعملى المكرونة بالبشاميل وايمانسيه اللحم البقري على اعتبار يعني إنك بتجري رجل الزبون أنا عارف كهن البنات ده كويس على فكرة.

نصيحة نمرة 3

بلاش الفراسة بتاعتك وأول ما تشوفيني تسأليني مالك؟ على أساس إنك بتحسي بيه وكده وبتفهميني من نظرة عيني.

أنا عادي ميت فل وأربعتاشر لو في حاجة مضيقاني حقول بلاش تنكدي عليه وحياة أبوكي أنا عارف إن انتي فلسفيسة وبتفهميني وبتسمعيني وبتشطفيني وبتفقسيني وإن انتي القلب الحونين إلخ إلخ إلخ.

نصيحة نمرة 4

مش أول ماتصل بيكي تردي شوية تقل ونبي إيه هو إنتي ما صدقتي وبعدين مانا قلبك طول النهار ولما بتتصلي عادي مابردش وبديكي الطرشة.. عاوزك تفتكري دايمًا حسن عابدين في فيلم درب الهوى لما مسك الصاجات وقال ليسرا أنا عاوز واحدة تهزقني تهزقني تهزقني.

نصيحة نمرة 5

بلاش القمص بتاع انت متصلتش بيه ليه النهارده أول ما صحيت من النوم ولما دخلت الحمام وقبل ما تولع السيجارة، وموشح أنا بفكر فيك طول الوقت وقبل ما بعمل حاجة بقولك!

أنا كده بيحصلي نقص في الأكسجين في الدم وممكن أسورق منك خفي عليه وحياة أبوكي أنا أحب أن يكون ليكي حياة أصحاب وكده ماتخلنيش محور حياتك انتي كده بتدلقي عليه وأنا كراجل ماحبش البت المدلوقة.

نصيحة نمرة 6

بلاش النصايح بتاعة بطل سجاير علشان صحتك.. وصليت العصر عشان آخرتك والبس فنلة علشان ماتبردش أنا مش قاعد مع أمي.

معلومة على الماشي.. علي الحجار ندم لما غنى "مش عارف ليه بتونس بيكي وكأنك أمي" واتجوز بعدها ست مرات عشان خنقوه.. استني لما تجوزيني واتحكمي زي ما انتي عاوزه.

نصيحة نمرة 7

مابحبش الدباديب والمحن بتاع القلوب الحمرا والمجات أنا عاوز هدية الفلانطين قميص للبدلة اللهي يا رب أتشل قبل ما أتقدملك بيها.. أنا عملي هاا عملي.

نصيحة نمرة 8

بلاش تكلميني وقت الماتش علشان مش حرد عليكي وبلاش المسدج اللي بتتبعت لما ماردش بتاعت" متشكرة جدًا دي حتسمعي كلام منى درر فبلاش يا بنت الناس.

وأخيرًا أنا أساسًا مش عارف أنا عاوز أرتبط بيكي ليه! كنت انطسيت في نواضري! في نظري غوري يالله يابت من هنا أنا مش بتاع جواز ... جتها نيلة اللي عاوزة خلف.

[Rena Jesus]

موضوع رااااااااااااائع جدا
ربنا يبارك خدمتك

[Mary Naeem]

شكرا على المرور