"رساله الى صديق داعشي.."

[روشا الفرفوشه]

"رساله الى صديق داعشي.."
عزيزي الداعشي:
وصلتني رسالتك اللي بعتهالنا امبارح فقولت ماطلعش قليل الذوق وارد عليك..بص ياسيدي:
احب اقولك انك لو شرفتنا مصر علشان تقتل المسيحين الاقباط اللي فيها, هاتلاقي 4 حاجات خد بالك منها لئلا تتتصدم عشان صحتك تهمني:
1- هاتلاقي ناس مش بيهمها الموت على الأطلاق, ده انت ياغلبان جيت ملعبهم, لان اكبر علامه واكبر ارث في تاريخهم انهم بيقدموا حياتهم بمنتهي السهوله, وعندهم حاجات كده ياخي من اللي قلبك مايحبهاش زي "الموت هو ربح , لي الحياة هي المسيح..." يعني يا معلم اكبر سلاح عندك هو اغلى هديه بالنسبالهم.
2-هاتلاقي كمان ناس بتحبك حتي وانت بتقتلها وبتزلها, هاتقولي اه بيحبوني عشان خايفين مني..لأ ما انا قولتلك من شويه انهم مش بيخافوا الموت..ده حتى وانت رايح تقتلهم هاتلاقيهم بيصلولك ويقولوا يارب لاتقم له هذه الخطيه..اصل هو ده اللي اختبروه وشافوه في الصليب اللي مش عاجبك, انا معاك ان الناس دي طبيعتهم غريبه بس واضح ان جواهم سر....
3-الاغرب بقي انك هاتشوف ناس ميته جاهزه, ميته لكن بارادتها, اخلت نفسها من فلوس وسلطه وتجردت من كل شيء وناس منهم راحت الصحراء وافتقرت, فدول ياغلبان هاتعمل معاهم ايه فماذا يضير الشاة سلخها بعد ذبحها؟؟
عارفك هاتقولي بس في ناس غيرهم هاتموت على الفلوس وعايشه في الفسق والفجور, هاقولك عندك حق دول كتير برده بس اقرا معايا الملاحظه الاخيره
4- هاتلاقي في ناس كتير من اللي انت بتتكلم عنهم دول هايتوبوا بسببك يابركه وهاتبقى بدون ما تقصد اعظم كارز في الكنيسه واللي هاتعملوا انت في شهر, لا شهر ايه قول اسبوع, ماحدش فينا عرف يعمله في سنين, وخد بالك من الكبيره بقى,, احذر لئلا الناس دي تغيرك وتبقى واحد منهم, اصل بيني وبينك حصلت كتير قوي ان ناس جت تقتلهم حبيتهم قوي وبقيت زيهم..
اخيرا هاقولك:
"ما انت فاعله فافعله باكثر سرعه."

[ماريا تى ثيؤتوكوس]

رساله جميله ياريت كل داعشى يقراها
ويعرف انهم بيوصلونا للملكوت بسرعه
ميرسى روشا كلماتها جميله جدا حبيبتى

[Mary Naeem]

مشاركة جميلة جدا

ربنا يبارك حياتك