لما بيعطل جهاز عندنا.. بنحاول كتير نصلحه بطريقتنا .. ونقعد نحاول ونعافر لحد ما نكتشف إن أفضل شيء ممكن نعمله، هو إننا نأخذ الجهاز للتوكيل.. للشركة اللي عملته.. وبدل ما نضيع وقت ومجهود وفلوس في الفاضى.. والجهاز يفضل عطلان، نقول لنفسنا، طيب ماكان من الأول عملنا كده.. مش ده اللي بنعمله لما بيكون عندنا مشكلة مع شخص في حياتنا؟ بنزعل .. نتخانق.. نناقش.. نحاول نقنع.. نجيب وسيط.. وفي الآخر .. وفي أغلب الأحيان نكتشف إنه مفيش فائدة .. طيب ماتيجوا نجرب نأخذ الجهاز ده للتوكيل؟؟ نأخذ الشخص ده بصلواتنا، إلى اللي خلقه.. اللي عارف أعمق أعماقه.. مَواطن ضعفه.. اللي عارف إيه اللي بيدور في ذهنه.. وفي نفس الوقت بيعرف إزاي يتعامل مع الضعف أو العطل ده ويصلحه.. مش مرات كتير بنشعر بالعجز أمام مشكلة مع شخص بتربطنا بيه علاقة؟ شريك حياة؟ حد من أولادنا؟ زميل في العمل أو رئيس؟ أخ في الكنيسة أو الخدمة؟ صديق؟؟ مش قادرة أقولكم أو أوصف الفرحة لما بنشوف نتيجة الصلاة في الأمر ده.. إزاي ربنا بيتدخل ويحلها من عنده.. معجزة حقيقية بنشوفها قدام عينينا.. ونلاقي نفسنا بنقول : ياه ه ه ه ه !! ليه ماعملناش كده من زمان ..
نانسي فلتس - الحياة الأفضل
23 - 12 - 2013, 02:26 PM
رد: ليه ماعملناش كده من زمان
العرض العادي
