افكار جميلة جدا لحفلات الكريسماس

[بنتك انا]

أول فكرة دى لحفلة رأس السنة

ودى أعتقد هتبقى مناسبة لسن إعدادى وثانوى


الخادم يجيب كيسين بلاستيك واحد يبقى لونه أسود والثانى لونه أبيض....


ويعلقهم فى مكان ملحوظ للاطفال


ويبتدى الخادم يشرح للمخدومين الفكرة..


كالآتى :


هيوزع على المخدومين ورقة وقلم لكل فرد من المخدومين ويطلب منهم الخادم كل واحد ييقسم الورقة لنصين ...الجزء الاول هيكتبوا أكثر صفة أو خطية مش عايزينها تبقى السنة دى فى حياتهم... وفى نفس الوقت هيكتبوا


كل واحد أمنيته للسنة الجديدة...


(طبعا كل واحد هيحتفظ بالورقة بتاعته من غير التانى مايشوف ورقته)

بعد ما كلهم يخلصوا يبتدى الخادم يشرح ليهم ازاى نستقبل السنة الجديدة..


وفى الاخر او فى نص الدرس يجيب الكيسين ويخلى كل طفل يقطع الورقة اللى فيها الصفة الوحشة او الخطية ويرميها فى الكيس الاسود..


والصفات الحلوة يحطوها فى الكيس الأبيض وممكن الخادم يقرا الأمنيات


( بعد ما يستأذن الأطفال .)

وأكيد الفكرةهتعجبهم خالص...

ثانى فكرة ... بردو ممكن تنفع للأعدادى وثانوى...

الخادم يكون محضر تأمل عن عيد الميلاد وطفل المذود ..
و ممكن تستعين ببعض التأملات الميلادية
ويسأل سؤال تأملى للمخدومين كل واحد على حدة:

+لو أنت هتدخل المذود دلوقتى ....يا ترى إحساسك هيكون إزاى؟؟
هتكون خايف ولا فرحان...؟

+ويا ترى إذا دخلت ووقف قدام طفل المذود هتقوله إيه؟؟

فكرة:ممكن تبقى فى الفقرة دى موسيقى تأملية عن الميلاد...

الفكرة التالتة دى ... مناسبة أكتر لأطفال مدارس الأحد

وهى كالآتى:

بدل ما تحكى للأطفال قصة الميلاد بطريقة تقليدية ... ممكن تقدموا الفقرة دى وهتبقى حلوة خالص وهيحبوها الأطفال..

ممكن الخادم يرنم فى الأول ترنيمة عن الميلاد.... وفى نص الترنيمة أو عند نهايتها ...

هيجى شخص شكله غريب (ودة الخادم اللى هيمثل شخصية من شخصيات المجوس وهيكون شايل بين إيديه صندوق لونه ذهبى ومزين بطريقة حلوة) وهيبتدى الخادم يسأله ويقوله أنت لبسك مش زينا يا ترى أنت مين وجيت هنا إزاى...؟؟؟
ويبتدى الخادم اللى بيمثل شخصية المجوس يحكى عن قصة الميلاد...
وممكن انتم تضيفوا افكار تانية على الحوار...

بتمنى الأفكار تكون عجبتكم وتسفيدوا منها
بركة طفل المذود تكون معاكم

كل سنه وأنتم طيبين

منقول