كل الخطايا كبائر

[walaa farouk]

لما بنيجي نقيس أو نبص
للغلط اللي إحنا عملناه ده كبير ولا صغير، بنبص لتأثيره.
يعني كتير بنقول: "دي كدبة بسيطة مِتعملش حاجة"،
"دي كلمة طلعت مني بهزار عادي يعني،
مقتلتش حد مثلاً ولا مشيت في الحرام!".

إحنا بنقيس الغلط من حيث تأثيره علينا وعلى اللي حوالينا،
والأكتر من كده إننا بنقيس حجم الغلط
بـ "إحنا غلطنا في حق مين؟"؛
يعني لو ده غلبان ملوش حد يجيب له حقه، فتمام
الغلط مقدور عليه! لكن الحقيقة إن المقياس مش كده؛
كل الخطايا في نظر الله هي خطايا بحجم واحد،
لأنك بفعل الخطية أنت اتعديت وكسرت وصية، أنت أجرمت
وتعديت على "الله" ذاته، أياً كان أنت غلطت في إيه ولا مع مين.

الرب يسوع بيقول كده: "«قَدْ سَمِعْتُمْ أَنَّهُ قِيلَ لِلْقُدَمَاءِ:
لاَ تَقْتُلْ، وَمَنْ قَتَلَ يَكُونُ مُسْتَوْجِبَ الْحُكْمِ. وَأَمَّا أَنَا فَأَقُولُ لَكُمْ:
إِنَّ كُلَّ مَنْ يَغْضَبُ عَلَى أَخِيهِ بَاطِلًا يَكُونُ مُسْتَوْجِبَ الْحُكْمِ،
وَمَنْ قَالَ لأَخِيهِ: رَقَا، يَكُونُ مُسْتَوْجِبَ الْمَجْمَعِ، وَمَنْ قَالَ:
يَا أَحْمَقُ، يَكُونُ مُسْتَوْجِبَ نَارِ جَهَنَّمَ»" (مت 5: 21-22).

أنت متخيل؟!
ربنا ساوى القتل بالشتيمة البسيطة اللي ممكن نكون بنقولها
عمال على بطال.. فيا عزيزي، كل الخطايا في نظر الله واحد.