بطل "مستخبي" في القصر |أشفنز رئيس الخدام في القصر

[walaa farouk]

النهاردة هنتكلم عن بطل "مستخبي" في القصر،
امبارح حكينا عن "أريوخ" رئيس الشرطة اللي وقف سد قدام الموت،
والنهاردة معانا بطل تاني كان "الباب" اللي عدا منه دانيال وصحابه
لبر الأمان في أول يوم ليهم في الغربة،
وعلمنا إن ربنا ممكن يحط لك "قلب حنين" في وسط بيت العدو من أول خطوة.
بطل قصتنا هو "أشفنز" رئيس الخدام في القصر.
تعالوا نعرف إزاي راجل بابلّي،
كان سبب في إن دانيال يفضل ماشي ورا كلام ربنا.
​طبعاً كلنا عارفين إن دانيال وصحابه لما اتخدوا أسرى،
الملك نبوخذ نصر كان عايز يمسح شخصيتهم خالص،
ويخليهم ياكلوا من أكل الملك والذبايح بتاعته عشان ينسوا دينهم.
ومش بس كدة، ده "أشفنز" كان مأمور يغير لهم أساميهم
لأسامي بابلية عشان ينسيهم أصلهم: 👇🏻
«فَجَعَلَ لَهُمْ رَئِيسُ الْخِصْيَانِ أَسْمَاءً: فَسَمَّى دَانِيآلَ بَلْطَشَاصَّرَ، وَحَنَنْيَا شَدْرَخَ،
وَمِيشَائِيلَ مِيشَخَ، وَعَزَرْيَا عَبَدَنَغُوَ»
(دانيال 1: 7)
​وفي وسط الورطة دي، كان "أشفنز" هو المسؤول برضه إنه يأكلهم "أطيب الملك" 👇🏻
«وَأَمَرَ الْمَلِكُ أَشْفَنَزَ رَئِيسَ خِصْيَانِهِ بِأَنْ يُحْضِرَ مِنْ بَنِي إِسْرَائِيلَ... وَعَيَّنَ لَهُمُ الْمَلِكُ
وَظِيفَةً كُلَّ يَوْمٍ بِيَوْمِهِ مِنْ أَطْيَبِ مَلِكِهِ»
(دانيال 1: 3 و 5)
​تخيلوا "أشفنز" ده كان ممكن يقول لدانيال:
"يا ابني إنت أسير،
غيرت لك اسمك وهتآكل اللي يتقدم لك وإنت ساكت بدل ما تروح في داهية"
وكان ممكن يخاف على رقبته وينفذ كلام الملك بالحرف.
​لكن ربنا كان مجهز قلب أشفنز،
وخلاه يحب دانيال ويحترم إيمانه.
دانيال لما راح استأذنه إنه مياكلش الأكل ده عشان ما يغلطش في حق ربنا،
أشفنز مقفلش السكة في وشه، ورغم إنه كان خايف جداً، بس قلبه كان طيب: 👇🏻
«وَأَعْطَى اللهُ دَانِيآلَ نِعْمَةً وَرَحْمَةً عِنْدَ رَئِيسِ الْخِصْيَانِ. فَقَالَ رَئِيسُ الْخِصْيَانِ لِدَانِيآلَ:
إِنِّي أَخَافُ سَيِّدِي الْمَلِكَ»
(دانيال 1: 9 و 10)
​أشفنز ماكنش مجرد موظف خايف، ده كان
"بطل جدع"
​وافق إنه "يعمل نفسه مش واخد باله"
ويسيب دانيال يجرب ياكل
القطاني
ودي ببساطة يعني (البقوليات والخضروات)
زي الفول والعدس والحمص والحاجات اللي طالعة من الأرض،
ومعاها "الميه" للشرب، بدل "أطايب الملك"
(اللحوم المدبوحة للأوثان)
وبدل "خمره" 👇🏻
«جَرِّبْ عَبِيدَكَ عَشَرَةَ أَيَّامٍ، فَلْيُعْطُونَا الْقَطَانِيَّ لِنَأْكُلَ وَمَاءً لِنَشْرَبَ»
(دانيال 1: 12)
ودي كانت مخاطرة كبيرة بمنصبه، لو الملك لمح إن العيال وشها دبل،
أشفنز كان هيدفع التمن.
ولما لقاهم زي الفل ومنورين، كمل معاهم وساندهم.
​طيب نتعلم إيه من "أشفنز"🤔
​1️⃣ الجدعنة مابتفرقش بين حد:
أشفنز علمنا إن "الرحمة" مالهاش جنسية.
ربنا يقدر يسخر لك غريب يسندك ويقف جنبك عشان تفضل ماشي صح
، بس إنت اطلب بـ "ذوق وحكمة" زي دانيال.
​2️⃣ اسمك مش هو اللي بيصنعك:
أشفنز غير أسامي دانيال وصحابه لأسامي أوثان، بس مقدرش يغير "قلبهم"
. ده بيعلمنا إن مهما الدنيا حاولت تدينا ألقاب أو تضغط علينا، المهم إحنا مين قدام ربنا من جوه.
​3️⃣ الشجاعة مش بس بالسيف:
أحياناً الشجاعة إنك "تدي فرصة" لغيرك ينجح. أشفنز خاطر بمنصبه عشان يدي فرصة لدانيال ي
​4️⃣ ربنا هو اللي بيمشي القلوب:
اطمن، حتى لو إنت في وسط "بابل"
(ظروف صعبة) ربنا هيبعت لك "أشفنز" يفتح لك السكة.
ربنا بيستخدم أي حد عشان خاطر عيون ولاده الأمناء.
​خليك دايماً واثق إن ربنا مجهز لك "ناس ولاد حلال" في طريقك،
وكون إنت كمان "أشفنز" لغيرك، شجعهم يفضلوا ماشيين صح وساعدهم ينجحوا.
​استنونا المرة الجاية في قصة جديدة عن بطل عاش في الظل، بس أثره لسه عايش معانا.