أريوخ | رئيس شرطة الملك

[walaa farouk]

النهاردة هنتكلم عن بطل شجاع،
كان "مفتاح النجاة" في وقت الموت،
وعلمنا إن الحكمة ممكن تنقذ أمة كاملة.
​بطل قصتنا هو
أريوخ
رئيس شرطة الملك.
تعالوا نعرف إزاي راجل غريب، كان سبب في
إننا نشوف معجزات دانيال.

طبعاً ​كلنا عارفين قصة الملك نبوخذ نصر لما حلم حلم ونسيه،
واتعصب جداً وأمر بقتل كل حكماء بابل لأنهم معرفوش الحلم.
وفي وسط الغضب ده، طلع الأمر بموت دانيال وأصحابه كمان:👇🏻
"فَخَرَجَ الأَمْرُ، وَكَانَ الْحُكَمَاءُ يُقْتَلُونَ. فَطَلَبُوا دَانِيآلَ وَأَصْحَابَهُ لِيَقْتُلُوهُمْ"
(دانيال 2: 13)

​تخيلوا "أريوخ" ده قائد الحرس الملكي،
الملك مدهوش فرصة يفكر، قاله "اقتل الكل"

أريوخ كان ممكن يروح ينفذ الأمر فوراً بدم بارد، لكنه كان راجل عاقل وبيدور على الحق.
​لما دانيال راح وسأله عن سبب الاستعجال في الحكم،
أريوخ مقفلش الباب في وشه، ولا قاله "أنا عبد مأمور"، بالعكس، ده اتكلم معاه بوضوح:👇🏻
"فَأَجَابَ أَرْيُوخُ وَقَالَ لِدَانِيآلَ: لِمَاذَا اشْتَدَّ الأَمْرُ مِنْ قِبَلِ الْمَلِكِ؟ حِينَئِذٍ أَخْبَرَ أَرْيُوخُ دَانِيآلَ بِالأَمْرِ"
(دانيال 2: 15)

​أريوخ ماكنش مجرد عسكري بينفذ أوامر،
ده كان "بطل الصبر"

استنى على دانيال لحد ما راح صلى وطلب من ربنا يكشف له السر،
ومحاولش يخلص مهمته بسرعة عشان يرضي الملك.
ولما دانيال رجع له ومعاه السر، أريوخ طار بيه من الفرحة
ودخله للملك وهو اللي قدمه بكل أدب:👇🏻
"حِينَئِذٍ دَخَلَ أَرْيُوخُ بِدَانِيآلَ إِلَى قُدَّامِ الْمَلِكِ مُسْرِعاً وَقَالَ لَهُ هكَذَا:
قَدْ وَجَدْتُ رَجُلاً مِنْ بَنِي سَبْيِ يَهُوذَا الَّذِي يُعَرِّفُ الْمَلِكَ بِالتَّعْبِيرِ"
(دانيال 2: 24)

​أريوخ هو البطل اللي وقف "سد" قدام الموت،
وعطل تنفيذ حكم الإعدام لحد ما النور ظهر. ولولا شجاعته وتفاهمه،
مكنتش قصة دانيال كملت بالشكل العظيم اللي نعرفه.

​طيب نتعلم إيه من "أريوخ"🤔
​1/ الحكمة في تنفيذ المسؤولية:
أريوخ علمنا إنك حتى لو شغال في مكان فيه ضغط وأوامر صعبة،
لازم تخلي "عقلك" شغال و"قلبك" صاحي.
مش كل أمر لازم يتنفذ بالدم، أوقات "التأني" بينقذ أرواح.

​2/ كن "جسر" للخير:
أريوخ كان هو الجسر اللي وصل دانيال للملك.
اتعلم تكون الشخص اللي بيقدم الناجحين والموهوبين للناس،
مش الشخص اللي بيقفل الأبواب في وشهم.

​3/ ربنا بيستخدم الكل:
أريوخ مكنش من شعب الله، بس ربنا استخدمه عشان يحمي دانيال وأصحابه.
اطمن، ربنا يقدر يحرك "أجدعها قائد" أو "أكبر مسؤول" عشان خاطرك
، المهم تكون إنت أمين زي دانيال.

​خليك دايماً زي أريوخ، بطل بيعرف "يسمع" قبل ما "يضرب"
، وبيفتح سكة للأمل حتى في أصعب الظروف.
​استنونا المرة الجاية في قصة جديدة عن بطل عاش في الظل،
بس نوره لسه منور في صفحات الكتاب المقدس