قوّي يا رب كل مطفي

[walaa farouk]

قوّي يا رب كل مطفي،
كل قلب محتاج يتشدّ عشان يكمّل وهو خلاص وصل لآخر نفسه.
قوّي اللي بيصحى كل يوم على حمل تقيل،
ومع ذلك بيقوم ويكمّل عشان اللي حواليه.
قوّي اللي مطلوب منه يضاعف مجهوده،
رغم إن نفسه يتشاف ويتحضن بدل ما يفضل في دور السند.
فيه ناس يا رب بتحارب في صمت، بيحطّوا وش مبتسم قدام الكل
، لكن جواهم صراخ. قوّيهم، إملأهم بروحك،
إدِّيهم طاقة مش من العالم لكن منك إنت،
لأنك إنت وحدك اللي قادر تعوّض وتدي معنى للتعب.
خلّي يا رب اللي بيحارب رغم الإنهاك يحس إنك جنبه،
اللي بيتمنى كلمة تشجيع يلاقيها منك، واللي بيمشي وسط الضلمة يلمح نورك.
قوّي كل مطفي بنورك، وارفع كل ضعيف بإيدك،
عشان يفتكروا دايمًا إنك إنت اللي بتكمل نقصهم،
وإنت اللي في ضعفهم بتعلن قوتك.