الرهبان التلاتة
بيخبرو عن رهبان تلاتة كانو كتير مجتهدين، الأوّل إختار يكرّس نفسو حتّى يصالح الناس العلقانين مع بعضُن، التاني قرّر يزور المرضى، والتالت قرّر يروح ع البريّة ت يعيش الوحدة والصَلا.
بعد كم شهر، فشل الراهب الأوّل بمهمتو لأنّو مشاكل الناس كانت كتيرة، الراهب التاني كان زعلان كتير لأنّو الأمراض كانت منتشرة بين البشر، وهيك قرّرو تنيناتن يزورو صديقن الراهب يلّي قرّر يعيش بالبريّة وطلبو منّو يخبّرهن عن إختبارو. بياخد الراهب شويّة ميّ وبيفضّيها بكبّاية، وبيطلب منهن يتأمّلو فيها، قالولو: «المي معوكرة». بعد شوي رجع طلب منّن يتأمّلو بالكبّاية، قالو: «صارت الميّ رايقة»، وشافو وجوهن عم تنعكس ع الميّ، كأنّن قدّام مراية. جاوبُن الراهب: «هيدا كان إختباري، لـمّا بلّشت حياة الصمت بالبريّة شفت خطاياي وعيوبي ومن هاك الوقت عم جرّب حِلّ مشاكلي، وداوي أمراضي يلّي عم تنهش فيّي بلا ما كنت حِسّ».
الزوّادة بتقلّي وبتقلّك:
«قبل ما تحِلّ مشاكل الناس وتداوي جروحاتُن، لازم تكتشف شو هيّي مشكلتك، وشو هوّي مرضك، وتعالج حالك، تذكّر المتل يلّي بيقول، أيّها الطبيب طبّب نفسك».
والله معكن.
23 - 08 - 2025, 04:38 AM
رد: زوادة اليوم : الرهبان التلاتة : 23 / 8 / 2025 /
العرض العادي
