ياجماعه احنا اشترينا بيت جديد وهننقل فيه بعد كام يوم
وخبر زي ده طبعا لازم اجي واقولكم عليه علشان افرحكم معايا
البيت الجديد نضيف اوي وجميل خالص
وبابا قالنا ياجماعه انا مأجر عربية نقل واقفه تحت البيت
اي حاجه عندكم ملهاش لازمه جهزوها وانزلوا حطوها علي العربية علشان هترميهم بعيد
لأننا مش عاوزين ننقل للبيت الجديد واحنا معانا كراكيب وحاجات ملهاش لازمه
المهم كل اخواتي جهزوا الحاجات اللي ملهاش لزمة وحطوها علي العربية
وبابا وماما كمان جهزوا كل الحاجات اللي ملهاش لزمة ونزلوها علي العربية
المهم اخويا كان معاه شنط كتيرة وحبيت اساعده في اني انزلهم معاه تحت للعربية
راح ضحك وقالي لا ياحبيبي كل واحد هيشيل شنطة بنفسه وينزلها
قولته طيب ماشي انا كنت عايز اساعدك بس
قالي لا متساعدنيش علشان انا مش هساعدك
وفعلا طلعت بسرعه اوضتي وفضلت اجهز كل الحاجات اللي ملهاش اي لازمة وحطيتها في شنط
ولكن اتضايقت اوي اوي لما لقيت ان الشنط بتاعتي اكتر من الشنط بتاعتهم
واتضايقت اكتر لما عرفت ان محدش فيهم هيساعدني اني انزلهم تحت في العربية
رحت بقي فضلت افكر وافكر وشغلت زكائي
قولت خلاص انا هنقص الشنط شوية واخد نص الحاجات اللي ملهاش لزمة معايا البيت الجديد وهنزل نص الشنط بس في العربية
رحت فتحت الشنط من تاني وفضلت انقص الحاجات اللي فيها علشان تبقي خفيفه عليا وانا بنزلها في العربية
راح بابا دخل عليا وشافني
قالي بتعمل ايه
قولتله بصراحه انا جهزت كل الحاجات اللي ملهاش لزمة اللي هنزلها تحت في العربية اللي هترميهم بعيد
ولكن الشنط كتيرة اوي وتقيله عليا
راح بابا قالي ياحبيبي احنا لسه هننقل بعد يومين
جهز حاجتك علي مهلك وكل شوية نزل حاجه واطلع ريح شوية وانزل نزل الحاجه التانيه
لسه معاك يومين
بس المهم متدخلش البيت الجديد بأي حاجه ملهاش لزمة علشان منبهدلوش من اول يوم
فهمتوا طبعا كلكم ايه هو البيت الجديد ؟؟
سنة 2013 هي البيت الجديد.
عرفتوا طيب ليه اخويا مش ساعدني اني انزل معاه شنطه ؟؟
لأن كل واحد ملزم انه يكفر عن خطاياه بنفسه ويتوب عنها ومش ينفع اخويا يتحاسب عن الخطايا بتاعتي حتي لو كان بيحبني
احنا خلاص يومين وهنعزل من البيت القديم ( 2012) وهننقل للبيت الجديد ( 2013)
ومش ينفع ناخد اي كراكيب معانا للبيت ده
انا هستأذن دلوقتي علشان هدخل احضر شنطي الكتيررررررر علشان العربية واقفه تحت وهتتحرك بعد يومين
مين كمان هيدخل زيي ويحضر شنطه ؟؟
