زوادة اليوم: الذَّكاء : 15 / 12 / 2024 /

[souad jaalouk]

زوادة اليوم:

الذَّكاء

بيخبّرو عن شبّ عندو صديق إسمو حسن، كان كتير يحِبّو، قرَّر ينقشلو إسمو ع خاتم.

وحتَّى يوفِّر إجرة حرف من التلاتة، قال للخطّاط :

«نقِشلي عَ الخاتم كِلمة خس».

وبلّش الخطّاط، لَمّا حفر الحرفَين وصار وقت النقطة، بيقول الشبّ للخطّاط :

«إذا ممكن تشلّي النقطة عن أوّل حرف يلّي هوّي الخاء وتحطُّلّي ياها على آخر حرف يلّي هوي السين».

وهيك بكلّ ذكاء حصل على كلمة حسن بسعر أرخص.

فتح المحفظة ليدفع للخطّاط بس الأخير ما أخد مِنّو ولا ليرة لأنّو تعجَّب بالذكاء يلّي موجود عندو.

الزوّادة بتقلّي وبتقلَّك :

الذكاء والحكمة عطيِّة من الربّ، منقدر نستعمِلُن للخير ومنقدر نستعملُن للشرّ.

يا ريت منضلّ خيِّرين ومنستعمل طاقاتنا الفكريِّة وذكانا للبنيان مش للهَدم، والله معكن.

[Mary Naeem]

شكرا على الزوادة
ربنا يفرح قلبك