خليكم مصدر آمان وحُب وفخر ليهم |نتيجة الثانوية العامة

[walaa farouk]

بمناسبة نتيجة الثانوية إللي خلاص زمانها جاية ..

إبنك / بنتك ..
بعد عُمر طويل مش هتفرق معاه النتيجة
في حاجة ولا هيفتكرها حتى إلا في المناسبات .
. ولكن هيفرق معاه مشاعره، هيفرق معاها رد الفعل
إللي كان وقتها من الأب أو الأم أو الأخ أو الأخت أو غيرهم ..

علاقتك بإبنك أهم، علاقتك ببنتك أهم،
مشاعرهم واحتوائها أهم، حياتهم كدا كدا هتستمر .
. بس ممكن تستمر بيكم وبدعمكم وحبكم
أو تستمر فيها شَرخ وألم ورفض كبير!

هما يستحقوا التقدير والحُب والدعم والاحتواء ..
لأنهم أولادكم ودا واجبكم تجاههم بالأساس ..

لأنهم كانوا في ضغط نفسي استمر لفترات طويلة جدا،
لأنهم كانوا بينزلوا ويطلعوا ويركبوا مواصلات
ويصحوا بدري ويسهروا بليل وإتخلّوا عن حاجات كتير
في حياتهم خلال الفترة دي، يستحقوا كل التقدير والحب لأنهم عاشوا
وتحمّلوا الفترة دي بكل ما فيها ..

يستحقوا دا بغض النظر عن النتيجة والأرقام والتنسيق
.. لأنه كدا كدا الحياة هتستمر أيـًا كانت النتيجة.

طمّنوهم وساعدوهم يكونوا حاسّين بالأمان والثقة،
ساعدوهم يكمّلوا حياتهم أصحاء نفسيـًا،
ساعدوهم وساعدوا نفسكم إن الحياة تستمر
وعلاقتكم ومشاعركم جميلة تجاه بعض ..

لأن دا إللي بـ يبقى في الآخر ،
وإللي بيرسم شكل الحياة بينكم وبينهم ..

وبيرسم شكل الحياة بينهم وبين حاجات جاية كتير ..

خليكم مصدر آمان وحُب وفخر ليهم
علشان ده اللي هيكمل معاهم طول حياتهم ..
|