ماتخافش الرب سندك وماسك إيديك وهيعدي بيك

[walaa farouk]

موقف من أصعب أصعب المواقف اللي عدى عليّ في حياتي..
في الأول، كنت بصلي بإصرار وقعدت فترة مستني الوضع يتحسن
، بس مش عارف ليه كنت كل ما أصلي يتعقد زيادة
، بس برضه قلت لأ أنا مش هخلي حاجة توقفني،
وفضلت أصلي أصلي، لغاية ما بيني وبينكم تعبت
ونفسيتي استهلكت، وقلت أسيب الدنيا كده
وزي ماتيجي تيجي والفترة دي قعدت معايّ سنة كاملة،
وفي خلال السنة دي ٣ من أصحابي كان كل واحد فيهم
بيبعتلي الآية دي لوحده
وَكَانَ الرَّبُّ سَنَدِي. (المزامير ١٨: ١٨)
وبقيت أقول يارب أنا عارف إنك سندي
بس مش قادر أشوف الحل فين!!
وفي يوم وليلة وبعد سنة وشهر بالظبط
المشكلة اتحلت بسهولة شديدة جدًا جدًا،
أنا كنت مستغرب من سهولة الحل..
واكتشفت أنه فعلًا طول السنة والشهر دول كان الرب سندي
، تعبت صحيح ولومت ربنا وزعلت منه،
لكن في النهاية أشهد بحق أنه كان سندي ..

النهاردة بقول لكل اللي بيمر بموقف صعب
وشايف أنه مش هينتهي، أشجعك،
ماتخافش الرب سندك وماسك إيديك وهيعدي بيك..

[مورا مرمر]

امين
مشاركة معزية جدا
ربنا يفرحك حبيبتى