مبحبش الشتا

walaa farouk · رقم المشاركة : ( 1 ) 03 - 12 - 2016, 09:17 AM

ولهذه الأسباب وأكثر .. مبحبش الشتا
الناس اللي بتحب الشتا بتحب فيها ايه ؟؟

• الجو التلج اللي بيخليك تكسل تقوم من نومك
• ولا المايه الساقعه اللي بتكرهك في الحموم وفي غسيل وشك الصبح
• ولا ماشيه الإنسان الألي اللي بتمشيها وانت قايم تشرب الفجر
• ولا الجري تحت المطر علشان تلحق تستخبي قبل ماباقي لبسك يتبهدل مايه وطينة
• ولا غسيل العربية كل يوم
• ولا اطفالك اللي علي طول عيانين
• ولا الناس اللي نايمه في الشوارع بتتنفض قدامك
• ولا التثبيت اللي ممكن تتعرضلة لو رجعت بعد تسعه بالليل
• ولا صوتك المكتوم ومناخيرك الحمرا ودماغك المربوطه وبكرة المناديل اللي جنبك
• ولا كمية الحوادث اللي بتنتج من زحلقت العربيات
• ولا النهار القصير والليل الطويل المخيف
• ولا الشوارع الفاضية والمحلات المقفولة والكلاب اللي بتعوي
• ولا اللبس الغالي
• ولا الشابوره اللي مبنشوفش منها اي حاجه
• ولا كمية اللبس اللي بتتلبس وبتنفخك وتخليك شبه الشوال
• ولا عمدان الكهرباء اللي بتسعق اللي يلمسها
• ولا برك المايه اللي في الشوارع
• ولا التراب اللي بيتحول فجأة لبالوظه ويبقى عاوز يبلعك جواه
• ولا عدم وجود صرف في الشوارع لمايه المطر اللي بيخليها تلات اربع ايام لحد مالشمس تنشفها او يجي عليها مطر جديد ويزيد الطين بله ..
ولا ولا ولا ولا

بتحبوا فيها ايه ؟

• قال الشتا حنين للذكريات قال .. طيب طالما هي ذكريات عايزين تفتكروها ليه ؟؟ غاويين تنكدوا علي نفسيكم يعني ؟؟ وبعدين مانت ممكن في الصيف تتذكر ذكرياتك عادي
• فال الشتا يعني الجري تحت المطر .. انت فاكر نفسك في اوروبا ؟؟ هنا قبل ماتجري هتتزحلق علي وشك وهيبقى شكلك وحش
• قال هو فيه احلى من مج النسكافيه ولا الكاكاو ولا السحلب ولا فنجان القهوة في الشتا وانت تحت البطانية .. علي فكرة الحاجات دي بتتشرب في الصيف عادي جدا قدام المروحه او تحت التكييف وبتبقي بنفس الطعم بردو

صيف يعني انتعاش .. يعني مصايف .. يعني خروج .. يعني سفر .. يعني سهر .. يعني نشاط .. يعني ويعني ويعني

دي لو السما بتنزل بذور مع المطر هتلاقوا بلدنا اكبر حديقه في العالم .. بسبب كمية الطينة اللي في شوارعها

قال شتا قال
يمكن الشتا يكون حلو .. بس مش في مصر

#مبحبش_الشتا في بلدي