القواعد العشرون للرجل

[walaa farouk]

كم أنت جميل أيها الرجل...😄😍😚😚😚
1- الراجل ما بيتسألش هاناكل إيه وبإجماع الفقهاء الراجل مستعد يحفر نفق في جبل جرانيت باستخدام الشوكة والمعلقة و لا إنه يتسأل هانتغدي إيه . الراجل يتحط قدامه الأكل وياكل في سلام .
2- الرجل بطبعه فاقد الإحساس بالزمن .. و التخطيط الإستراتيجي طويل الأجل بالنسبة له هو التفكير في الوجبة القادمة ... و ساعات بيكسل يعمل كده كمان
3- زي ما الست بتبقي "عايزة ورد يا إبراهيم" الراجل بيبقي عايز " A little personal space يا زينب" .
4- الشاي بتاع الصحيان من نوم العصرية من مقدسات الرجل .
5- الراجل إللي بياخد باله من تغيير نوع البرفان ده راجل معدل وراثيا مش أصلي ...الراجل الأصلي مش بيشم أصلا .
6- المثل الإنجليزي بيقول "الرجل الجوعان هو رجل غضبان" .... أديني حذرت
7- الراجل بيحب الأكل أكتر من أي حاجة في الدنيا أكتر من الستات و العربيات و المنصب ... أما المنافس الوحيد للأكل فهو النوم
8- أكاد أجزم إن كل الشرور و الآثام إللي في الدنيا سببها الأصلي راجل إتسأل و هو لسه صاحي من النوم هاناكل إيه أو إتطلب منه فلوس
9- الرجالة و هم في الـ personal space يا زينب بيبقوا طرش .. بالمعني الحرفي للكلمة ... لو عايزة حاجة تروحي بالراحة جدا و تتسللي من ورا العبيد إللي واقفين يهووا بمراوح ريش نعام جنبه و تفتحي كانزاية البيبسي المشبرة و تصبي بالراحة في كوبايته المفضلة من غير ما تتكلمي و تخرفشي بكيس اللب السوبر في نعومة و تفضي نصه في طبق صيني علشان يعمل صوت و تجيبي طبق كبير فشخ يرمي فيه القشر علشان ما يتعبش و هو بيتف و بعدين بعدها بساعة تسأليه علي الحاجة إللي إنتي عايزاها هايرد من أول مرة
10- الستات بتعرف تفوق بنسبة 100% بعد الصحيان بعشر دقايق ..... الراجل في جميع مراحل نموه من ساعة ما يصحي من النوم و لحد ما يوصل الحضانة أو المدرسة أو الجامعة أو الشغل و لمدة ساعتين تلاتة بيبقي مرشوش عليه بيروسول بس بكمية لا تكفي لقتله ... بصوا علي أي راجل ماشي علي رجله أو راكب مواصلات أو سايق عربيته الصبح ... ذبابة تتعافي جزئيا من رشة مبيد حشري .
11- دور البرد بيسحب الحياة والطاقة من الرجالة زي الكريبتونايت بتاع سوبرمان بالظبط .
12- الغالبية العظمي من الرجالة خرس ... و إللي بيتكلم مش بيتكلم في البيت ... أي محاولة لتغيير مجري الطبيعة هاتؤدي إلي كوارث
13- في أي زمان و مكان و مهما كانت درجة تعقيد المشاكل مافيش حاجة ممكن تمنع الراجل إنه يبتسم قدام طبق بطاطس محمرة في الزيت او طبق فروت سلاط لطيف
14- الراجل إللي بيسلك بلاعة مسدودة أو بيغير لمبة محروقة او بيصلح حاجة في البيت ده إنسان بكل ما تحمله الكلمة من معني
15- الرجالة ما بتتكلمش بعد الأكل
16- تغيير مكان المحفظة أو الدبلة أو النضارة أو الساعة بالنسبة للراجل ده مشروع قومي بيتم بالتعاون مع اليونسكو فما بالك بتغيير مكان دولاب أو كرسي أو كنبة .... عايزة الراجل يقعدلك في البيت ما تشيليش حاجة من مطرحها
17- الكوليسترول و الدهون جزء أساسي من مكونات خلايا الراجل ف بلاش الكلام الجارح بتاع الكرش والريجيم علشان مش ناقصة سم بدن.
18- عايزة تعرفي الراجل بيحبك قد إيه خليه جاي من بره و مش شايف قدامه و حطيله الأكل و مع أول لقمة في بوقه قولي له عملت إيه في موضوع كذا إللي كلمتك فيه من كام يوم .... لو فضلتي عايشة يبقي بيموت فيكي و ده غالبا إللي بيحصل ... لو لا قدر الله السؤال طلع إنه القشة إللي قصمت ظهر البعير يبقي يا ريت الموضوع يقف علي قد طلاق بس
19- بالنسبة للراجل المصري في فجوة زمنية غير محسوبة من ساعات الخليقة إسمها الجمعة قبل الصلاة .... إقتراحات الفطار بره و التمشية و الشوبينج و الكلام ده تعمليه مع صاحباتك ... الفترة من ليل الخميس حتي ظهر الجمعة إعتبري الراجل فيها في رحلة صوفية لإكتشاف الذات زي الوقوف قدام التلاجة بالظبط
20- رجالة الجيل ده بالذات مش هايعمروا كتير إلحقي أقعدي معاه و كفاية هري و طلبات علشان تطولي عمره الإفتراضي شوية هو أصلا كده كده بره الضمان

[Mary Naeem]

الغالبية العظمي من الرجالة خرس ... و إللي بيتكلم مش بيتكلم في البيت ... أي محاولة لتغيير مجري الطبيعة هاتؤدي إلي كوارث

[walaa farouk]

ميرسى على مرورك الغالى مرمر