مقالة جديدة للرائعة اسعاد يونس بعنوان دولتك.. حضرتك
■ عمار الشريعى حكاية كبيرة قوى.. مخلوق متفرد جداً وظاهرة وحيدة وبنى آدم لن يتكرر وفنان الأوصاف تعجز قدامه.. سيكتب كل واحد من أصدقاء عمار المقربين شهادته للتاريخ الفنى والإنسانى وأنا منهم فور أن يمن الله علينا بقدرة تحمل الألم.. ده لو عشنا.. ولكن.. لن يخرج مشهد واحد من مشاهدنا التى سنسجلها دون وجود أصدق الأصدقاء وأوفاهم لعمار ولنا كلنا.. المنتج السينمائى عمرو الصيفى.. ذلك الإنسان النادر الذى منذ أن ارتبط بعمار، منذ أكثر من أربعين عاما، لم يفارقه.. مشى رحلة العمل والنجاح والمعاناة معه خطوة بخطوة.. عاش معه كل تفاصيل العمى.. وشعر معه بفلسفة فقدان البصر وحكمة البصيرة.. منذ ١٩٨٧ بدأ قلب عمار يخذله.. ستة وعشرون عاما وعمار يعانى من كل الأعراض ويتدخل معه الطب بكل مستحدثاته وحلوله.. وعمرو موجود.. قبل العملية وبعدها.. ما بين أزمة وأخرى.. عمرو هناك.. السند والرفيق والضهر.. قد ما بعزى مصر فى عمار.. قد ما بعزيك يا عمرو.. يا النموذج الأمثل للرجولة والخل الوفى.. نموذج للأسف كاد ينقرض. ■ دولة رئيس الوزراء الدكتور هشام قنديل.. بكلمك من موقع الأكبر منك.. لو كنت أُجبرت على جواز القاصرات كان زمانى مخلفة طفل من دورك.. إنت عارف يابنى.. الرئيس بيقولوله فخامتك.. والأمير سموك والملك جلالتك.. وانت كرئيس وزرا بيقولولك دولتك.. ليه بقى؟؟.. عشان إنت ماسك الدولة.. بوزاراتها وهيئاتها وجلالها وهيبتها.. أحب أقولك يابنى إنك مش ماسك حاجة خالص.. ولا حتى حتة قد كده.. يابنى إنت عندك وزارات مابتعملش حاجة.. إما إن دورها بيغتصب منها عنوة قدام عينيك.. أو هى متخلية وراكنة على جنب فى الطراوة بأوامر أعلى منك.. وانت موافق.. أو دى كانت شروط تعيينك.. ماهو سلو جماعتكوا كده.. أعداد من البشر مزقوقين علينا، قال يعنى ناس بجد وواجهات ومناصب.. واللاعبين الأصليين تلاتة أربعة.. والمصيبة إنكم لما بيتوجهلكم لوم ولا بيحوق ولا بيلوق.. طالما القيادة موافقة.. فأنتم لها.. مش مهم الشعب اللى إنت مفترض بتشتغل عنده ولا رأيه ولا اعتراضه.. شعب إيه وزفت إيه؟؟.. المهم الجماعة.. نموت نموت وتحيا الجماعة. ■ يابنى يا حبيبى ممكن تفهمنى الشخصيات اللى بتهل علينا فى التليفزيون والمؤتمرات الصحفية دول مين؟؟.. مناصبهم إيه فى الدولة اللى إنت رئيس وزرائها دى؟؟.. ينفع يعنى اللى بيقوله السيد الشاطر فى مؤتمر صحفى مذاع ده؟؟.. ينفع يقول إنه التقى بكل المستثمرين عشان مش عارف مشاريع إيه؟؟.. بيلتقى بصفته إيه؟؟.. يابنى إنت مش عندك وزير استثمار؟؟.. طب ينفع يقول إن أجهزتهم كإخوان وكإسلاميين رصدت، من مصادر مختلفة، لقاءات بين أطراف دولية وإقليمية وداخلية كانت بتحط مخططات، وقعد يوصف المخططات ويبنى استنتاجات لحد ما حسينا إننا وقعنا فى حجر جميع الأجهزة الاستخبارية الشرسة وداخلين على الحرب العالمية التالتة؟؟.. جاب منين كل الرصد ده؟؟.. أدواته إيه؟؟.. وإحنا ماعندناش الأدوات دى ليه؟؟.. أنا عايزة أرصد أنا رووخرة.. عايزة أعرف منافسينى بيخططولى إيه مع منظمات المافيا والياكوزة اللى فى نفس كارى.. ثم يستطرد أن بعض المكالمات التليفونية التى كانت تدور فى كواليس البرامج الإعلامية مسجل لدينا... إلخ إلخ!!.. يا حبيبى مش عندك وزارة داخلية وأجهزة أمن دولة ولّا وطنى.. سموها زى ما تسموها.. هى فى الآخر طربوش بزر.. تجيبه قدام.. تجيبه ورا هو زر طربوش.. يرصد ويسجل بصفته إيه؟؟.. ناهيك عن إن دى جريمة فى حد ذاتها.. طب لما إنت سايب الناس دى ترصد وتسجل وتتعدى على خصوصيات الناس وتعلن ده فى مؤتمر صحفى قدام العالم كده.. مفترض نثق فى أى إجراء رقابى بعد كده، من حيث نزاهته وحياديته وقانونيته إزاى؟؟.. ورغم إنه استهل حديثه بأنه هنا بصفته عضواً فى الجماعة وائتلاف مش عارف إيه إلا أنه مع السخونة انطلق فى التهديد والوعيد كأنه هو كل الحكومة وكل الوزراء وكل الشعب.. وده يثبت إنك يابنى.. ضحية. ■ إزاى ممكن بنى آدمين ينتمون لجماعة الإخوان المسلمين يقبضوا على ناس قدام الاتحادية.. ويضعوا ف إيديهم كلابشات!!.. ويعذبوهم لعدة ساعات.. والنيابة تؤتمر بأنها تروح تستلمهم من المواطنين دول ومعاهم شوية حاجات قال حرزوها.. بصفتهم إيه حرزوها؟؟.. وكمان ينصرفوا دون الإدلاء بشهادة.. يعنى عملوا العملة وجريوا وكمان عايزين الضحايا تتعاقب.. ولما رجال العدل يقفوا معاه.. يتعاقبوا! ■ يابنى إنت مش شايف المعتصمين اللى معرشين قدام الدستورية كل ده؟؟.. مش شايف حرايق المقرات والولايع اللى حواليك؟؟.. مش شايف اعتصامات الحازمون قدام مدينة الإنتاج الإعلامى؟؟.. مش شايف مجمع الكنايف العالمى اللى اتبنى هناك؟؟.. مش ده تعدى على أملاك الدولة بجانب المظهر المنيل بنيلة؟؟.. ماخطرش على بالك إن الإعلاميين المهددين فى دخولهم وخروجهم دول فى حمايتك وحماية داخليتك؟؟.. يا حبيبى فكر شوية.. إنت عارف إن جميع القنوات الخاصة مقررة تهج من مدينة الإنتاج الإعلامى ومن النايل سات بتاعتنا؟؟.. مش واخد بالك إن الكلمة ماتتسجنش.. وإن كل العالم دى ناويين يهجوا على أى بلد جنبنا فاتحة دراعاتها وأحضانها باستثماراتهم ببابا غنوجهم وحايفضلوا ينطقوا ماحدش حايخرسهم.. عارف إن بسبب اللى عاملين كامب قدام المدينة دول حايتقفل كام بيت هنا فى مصر؟؟.. إزاى فى دولتك تسمح لأفراد عاديين مش عارفين جايين منين يفتشوا الناس ويتحققوا من بطاقاتهم؟؟.. إيه التهريج الرخيص ده؟؟.. إنت مش عارف إن الناس دى عندها هدف اتوعدوا إنه يتحقق لو أتموا مهمتهم؟؟.. وإنه عمل مقابل أجر؟؟.. إنت عارف مين اللى حايدفع الفاتورة دى؟؟.. إنت شخصيا.. ساعتها مش حايبقى فيه دولتك ولا حضرتك.. وصل؟؟؟؟؟؟ ■ من مواطن عادى إلى النظام الحالى.. أنا المواطن العادى الذى كان يحاول أن يعيش حياة أقرب ما تكون إلى الطبيعية.. عشت فى نظام منيل بنيلة، عايز يكوش على كل حاجة ويسيبنا إحنا فى الطل.. لكن.. كان عندنا شبه دولة.. فيها شبه مؤسسات.. وحد أدنى أو تحت الأدنى بحتة من مظاهر الدول التحت النامية بشوية.. كنا بنعافر بإيدينا وسناننا عشان نوصل للنامية.. وقمنا بثورة.. جيتولنا إنتوا.. لقينا نفسنا بنتنيل بنيلة منيلة بنيلة.. وتوهتونا معاكوا فى معارككوا اللى مش عارفين لها أول من آخر.. مال أمى أنا كمواطن بأجنداتك؟؟.. مالى أنا بإن النظام طلع روحك وعذبك وسجنك؟؟.. ما هو طلع روحى بأشكال مختلفة، لكن عمرى ما كنت طرف فى صراعك معاه.. مالى أنا أدفع الفاتورة؟؟.. مالى أنا بمخططاتك وتنظيمك الدولى وخلاياك المدفوسة جوه كل بلد؟؟.. مالى أنا بقصة غرامك مع حماس؟؟.. مالى برغباتك الدفينة فى السيطرة والهيمنة وأحلام يقظتك وعقدة الـ٨٣ سنة؟؟.. مالى أنا بترتيبك وزيتك وسكرك وسمنتك وفلوسك؟؟.. مالى أنا تعملنى كوبرى لتمرير مخططاتك تحت مسمى الشريعة، كأنها اختراع جديد نزل مع الآى فون.. مالى أشوف المناظر العجيبة اللى طفحت على وش البلد وماكناش بنشوفها قبل كده تطلع تكفرنى وتهرتللى.. مالى أنا ودانى تتلغمط بأقذع الألفاظ الصادرة من إعلامك الملغمط ده.. مالى تبوظلى تربية عيالى اللى بقى السباب واللعن من مقومات لغتهم أسوة بشيوخك ودعاتك؟؟.. مالى أنا بديونك للسلفيين والجماعات والجهاديين وحاتسدد فواتيرك إزاى؟؟.. حد قالك تتفق؟؟.. ولما تختلف معاهم أنا اللى حادفع الفاتورة برضه؟؟..أنا عايز أعيش فى بلد يتمتع بالعيش والحرية والعدالة الاجتماعية والكرامة الإنسانية.. فيه ولّا مفيش؟؟.. أقولك أنا؟؟.. لأ مفيش.. مع الدستور اللى إنت مش مقتنع ولا شايف ولا مستعد تتنازل عشان تفهم حقيقته ده يبقى مفيش.. مع الغلا والكوا المُجمد ومفعوله نافذ ده مفيش.. واوعى تتحجج إن الثوار بيعطلوك وبيربكوك.. مش حقيقى.. كان عندك برلمان من أغلبية رجالتك.. أدى أداء أرقى ما يقال عنه إنه ردىء.. وقبل المحكمة الدستورية ما تحله عشان ماتتحججش.. داخل معايا كمواطن فى عند وخناقة ومتخيل إنك أقوى بأسلحة التهديد والقمع والضرب والتلويح بالاعتقال.. وكلام كله يودى لورا بدل الميل فرسخ.. إيه؟؟.. حاتعتقل الشعب كله؟؟.. عاديت القضاء بكل أشكاله والصحافة والإعلام والثقافة والعمال والدكاترة وشباب الثورة والمرأة والأقباط.. فاضل مين لم تعاديه؟؟.. إيه يا عم النظام؟؟.. ما تصللى عالنبى بقى.. ولّا إنت مش مسلم؟؟؟ ■ يا ترى الداخلية والمؤسسة العسكرية ناويين يأمنوا الاستفتاء والَّا برضه حايستأذنوا؟؟.. يعنى ننزل نمارس حقنا ونقوم بواجبنا ونقول «لأ» ولّا حانرجع على نقالة؟؟؟؟؟؟؟؟؟؟؟؟
المصدر : المصرى اليوم
14 - 12 - 2012, 08:45 AM
العرض العادي
