|
 |
 |
 |
|
رقم المشاركة : ( 1 )
08 - 06 - 2021, 11:35 PM
|
|||||||||||
|
|||||||||||
|
لما ابويا كان بيحجز المصيف كان بيحجزه قبليها بشهرين مثلا" ، وخلال الشهرين دول كانت تجري الإستعدادات علي قدم وساق علشان نجهز حاجة المصيف ، أمال هو المصيف شنطة وهدوم والسلام ؟! لأ طبعا"... مصيف ياعني في شريط كوكتيل لازم يتعمل علشان تتحط عليه الأغاني الي هانسمعها ، ونجهز الحجارة بتاعة الكاسيت علشان ناخده معانا علي البلاچ ، ونطمن إن مايوه السنه الي فاتت تمام وعلي مقاسنا ولو الميزانية تسمح يبقي نجيب مايوه جديد بقي... وكان لازم نجهز اللعب الي هاناخدها معانا ( الراكيت ولعب البحر ولو من عيلة غنية يبقي الباتيناچ تجهزه وتاخده معاك) وطبعا" الكولمن الأزرق أبو حنفيه ده الي كان شيله بالتبادل ، كل واحدة مني أنا واخواتي تشيله بالتبادل شويه وتحطه علي رجليها شويه... وكنا نحوش المصروف علشان ركوب العجل في المصيف ، أصل تأجير العجل ده مزاج تاني وحكاية تانية والأهم الضحك الي كنا بنضحكه وإحنا بنلعب كوره جوه البحر وتيجي الموجة وترفعنا ونمسك إيدين بعض وننط علشان الموجة تعدي.... أتربينا إن مسكة إيدينا لبعض بتعدي الموجة ، مش البعاد والفرقة هما الأحسن وقاطعوا الناس ترتاحوا ، مسكة إيدينا كانت بتطمنا وتدينا ثبات وكان الكبير عينه علي الصغير علشان مايتقلبش تحت الموجة ، وكنا عايشين نسند بعض ونشد إيدين بعض.. هي ديه حياتنا وهو ده الأصل رجعوا مسكة الإيد من تاني ورجعوا الدفا لقلوبكم من تاني اقفلوا أبواب نظرية المؤامرة وخبطوا علي أبواب الأهل والأصحاب من تاني ، اتشاركوا الفرحة والوقت ولحظات السعادة وامسكوا إيدين بعض واتعكزوا علي بعض من تاني علشان الموجة تعدي وأي أزمة تعدي مهما ظهرت.. إحنا بنتعكز علي بعض مش بنكسر قلوب بعض.. يارب أيامكم كلها فرحة 
|
|
العرض الشجري