من كم يوم كنت معزوم عند صديق ليا

[marit jesus]

من كم يوم كنت معزوم عند صديق ليا
وبعد ما زوجته حضرت السفرة على أكمل وجه
بدأنا نمد ايدينا على الأكل اللي كان شكله يشرح القلب
لكن للاسف ،، كل لما ادوق صنف يطلع طعمة سئ جدا وغريب
لحد ما لحظت وجت تدوق بنفسها
اتكَسَفِت جدا وجريت على المطبخ وخرجت بكيسين
كيس ملح وكيس سكر مطحون
الإتنين شبه بعض وميتفرقوش عن بعض
بقولها انتي دوقتيه !
قالتلي لو دوقته مكنتش قدمته
مشكلتنا اننا مبندوقش كلامنا قبل مابنقوله
كم علاقة كبيرة انتهت بسبب كلمة !
كم قصة حب فشلت بسبب كلمة !
كم نفس خسرت بعض بسبب كلمة !
بقينا بنهتم بالمظهر قدام الناس " السفرة " ، لكن مجرد مانتكلم ويدوقوا كلامنا ، بيتسمموا ،، بيبعدوا ،، بياخدوا جنب
خد الكلمة على نفسك قبل ماتقولها
حط نفسك في الموقف قبل ماتعمله
فكر في تأثير اسلوبك على اللي قدامك
هتلاقي نفسك عرفت تميز بين السكر والملح
هتلاقي نفسك بقيت شيف شاطر في طهي المحبة
جرب تدوق كلامك ، ومتتسرعش في انك تخسر الناس
لانهم مش بيدوا نيشان في قلة الأدب ، ولا اللسان الطويل
كلامك هيعودلك ، ومش هتجني منه غير يادوب اربع حيطان مداريينك لوحدك بعيد عن كل الناس
المثل بيقولك وجع البطن ولا دلق الطبيخ !
لا ده انا ادلق الكلام كله ولا أوجع قلب اللي قدامي
الغُربة مش بإنك تفارق حبايبك وتسيب بلدك
الغُربة بإن حبايبك يفارقوك وانت في بلدك

[Mary Naeem]

الغُربة مش بإنك تفارق حبايبك وتسيب بلدك
الغُربة بإن حبايبك يفارقوك وانت في بلدك

صح يا مرمر
شكرا يا قمر

[sama smsma]

مشكلتنا اننا مبندوقش كلامنا قبل مابنقوله
فعلا دى مشكلتنا

جميلة اوى يا ماريت
ربنا يفرح قلبك

[مورا مرمر]

رووووووعة
ربنا يبارك خدمتك ياقمر

[walaa farouk]

جميلة اووووى يا مرمر

[dodo dodo]

موضوع جميل جدا

[marit jesus]

ميرسى على المرور الغالى

[حنان بنت المسيح]

فيه ناس كده فعلا بيستمتعو بوجع قلب اللى قدامهم بكلامهم
موضوع جميل جدا
ربنا يبارك خدمتك المميزة حبيبتى

[nasser]

كم علاقة كبيرة انتهت بسبب كلمة !
كم قصة حب فشلت بسبب كلمة !
كم نفس خسرت بعض بسبب كلمة !
فعلاً يا ماريت أوقات الكلام بيبقى زى الطوب
وللأسف اللى بيقوله فاكر انه بيعمل الصح...للأسف متربى على كده
ربوه فى البيت ان هو ده الصح
شكراً يا ماريت على الموضوع الرائع

[بنتك انا]

مشاركة رووووووةعة
ميرسى ياماريت ربنا يباركك