|
 |
 |
 |
|
رقم المشاركة : ( 1 )
31 - 07 - 2016, 10:26 PM
|
|||||||||||
|
|||||||||||
|
كل يوم بقابل ناس بيموتوا حرفياً.. مش من قلة الأكل، لكن من قلة الحُب.
مش شرط حُب عاطفي.. أي نوع حُب. بشوف ناس بيشحتوا كلمة "بحبك" من كل اللي بيقابلوه، بيشحتوا علاقة.. بيشحتوا كلمة تشجيع.. بيشحتوا ابتسامة.. حتى الـLikes على الفيسبوك بيشحتوها.. وحتى اذا داقوا شوية حُب، دايماً عندهم شعور انه مؤقت، وإنهم أصلاً مايستاهلوش. وبتفضل حالة الجوع دي تزيد لحد ما الشخص يموت نفسياً.. أو بلغتنا احنا بيوصل لحالة "اللامبالاة"، اللي هو الواحد من كتر الجوع بطّل يحس أنه جعان.. في الحقيقة هو بطّل يحس أساساً.. وده على قد ما هو مش حاسس، على قد ما بقى كائن مُرعب.. مابيفرقش معاه حد ولا هو بيحس بحد.. ماشي يلطش ويجرح في اللي حواليه وفي نفسه.. ماهو ميت.. وهو الميت بيحس؟ ملحوظة.. الناس اللي بتكلم عنها دول مش فضائيين جايين من كوكب تاتي يعني، دول ناس عايشين بينا.. وقريبين جداً منا.. واحياناً كتير الناس دي بيبقوا إحنا. عايشين ميتين، أو عايشين على الشحاتة.. وأهو يوم نشبع، وعشرة لأ. ⁃ طب والحل؟ كان نفسي أقولك كام طريقة أو خطوة سحرية تتحول بيهم من شخص جعان بطل يحس، لشخص شبعان ومستمتع بكل اللي حواليه.. كان نفسي فعلاً.. بس الحقيقة هو الحل المرة دي صعب شوية؛ الحل المرة دي برّاك. الحل المرة دي عند الناس (ايوة هما نفسهم الناس اللي بيجرحوك ويبهدلوك).. الحل في مجتمع صحّي (ممكن يكون ٢ او ٣ حواليك مش شرط مجتمع ضخم). مجتمع يقبلك زي مانتا.. مجتمع ماتحتاجش فيه تلبس وش علشان تتحب.. ماتحتاجش تبقى قوي أو جميل أو مشهور أو حتى روحاني عشان يقبلك. مجتمع ماينشّفش ريقك على كلمة بحبك، مجتمع يفهم لغة القبول والحضن والتشجيع. ⁃ طيب أجيبه منين؟ مش لازم تجيبه.. إعمله. مش محتاج أكتر من شخصين تلاتة صدقني، يكونوا فاهمين انهم محتاجين بعض، وانهم فارقين في حياة بعض، وياخدوا عهد بجد: عهد يحافظوا على نفس المقدار من الحُب والقبول والإهتمام مهما حصل.. عهد يكونوا مُتاحين لبعض منين ما حد يتعب او يحتاج.. عهد يحترموا فترات الألم ومايتفّهوش منه مهما كان قليل.. عهد يسندوا بعض وقت الكسرة واليأس.. عهد يحافظوا على بعض للآخر، مش يمشوا لما يزهقوا أو يتشغلوا.. عهد مايتنافسوش، ومايكسروش في بعض.. عهد.. مايتكسرش. ملحوظة.. المجتمع ده مش هاينزلك من السماء، ومش موجود اوي حوالينا، اديك شايف الناس حوالينا بتموت، او بتتحول لـ Vampires يمصّوا مشاعر بعض ويمشوا، بياكلوا بعض نفسياً.. والبقاء بقى للأقوى.. اللي يخلص على أكبر عدد من الناس، اللي يدخل في اكبر عدد من العلاقات، اللي ياخد اكبر عدد من اللايكات.. زي ماتقول كدة.. غابة. فا خليك متفق معايا أن المجتمع الصحّي هو الحماية وسط كل البهدلة دي، ولو عايش وسط مجتمع صحي وعندك ناس بتحبك بجد، يبقى يابختك.. ولو ماعندكش، يبقى أنت اللي هاتعمله.. وهاتتعب فيه.. بس صدقني اول ما تشبع منه.. هاتبطّل شحاته، ومش هاتموت زي الباقيين من الجوع. 
|
 |
|
العرض العادي
