تفاحة حوا
* الاسكتش يصلح لإعدادي ومدارس الأحد.
* الهدف: لا نحاسب أحد علي خطأ فعله أهله- نقل الكلام والإشاعات من غير ما نبقي متأكدين منه بيضر الناس جدا.
* الشخصيات:
التفاحة- يوسف أفندي – الموزة – البرتقالة – يمكن اضافة أي فواكه أخري للمساعدة .
النص
* المسرح علي شكل جنينة بها أشجار (من الورق أو الفوم) وتأتي من الخارج أصوات متداخلة لأطفال يلعبون وياتي البرتقالة بتقول
البرتقالة(بنغمة): خلاااااااااااص...
أصوات مختلفة: لســـــــــــــــــــــــه
* تدخل البرتقالة وهي تبحث عن الفواكه وتقول
البرتقالة: خلاااااااص
أصوات الفواكه من الخارج: لســــــــــــــــــــــــــه
البرتقالة: لأ بقي كفاية كده.... أنا جاية (تستمر في البحث وهي تنغم ها) ...يا موزة يا أمورة أنتي فين.. ؟؟ ..يوسف أفندي أنا شامة ريحتك....وأنتي يا تفاحة يا تفوحة .....أنا خلاص قربت أوصل لك....يا بطيخة يا بطوخة ...يا حلوة يا تختوخة....(يظهر كتف يوسف أفندي من وراء الستار وتلمحه البرتقالة فتجري عليه وتمسكه)
البرتقالة: مسكتك ....ممسوك يا يوسف....
يوسف أفندي(يزعق): مليش دعوة....الدور ده مش هيتحسب ....هنلعبه تاني....التفاحة جت استخبت جنبي وزنقتني خلتني أبان....مليش دعوة. (تظهر التفاحة من ورا الستارة وتظهر مجموعة من الفواكه )
البرتقالة(ها يعلي): وأنا مالي أنا كمان......أنا مسكتك وخلاص.
يوسف أفندي (موجها كلامه للتفاحة): عاجبك كده يا تفاحة يا وحشة....آديني اتمسكت بسببك...
التفاحة(تقاطعه): وأنا مالي يا يوسف.....؟؟ كل واحد حر يستخبي مطرح ما يحب ....ما هي الجنينة واسعة أهه قدامك...
يوسف أفندي: ما تقولي لنفسك ياختي.....هي حبكت يعني تيجي تستخبي جنبي ....أهو أنتوا يا تفاح دايما كده تعملوا المشاكل....مينفعش تلعبوا أي لعبة إلا ولازم تبوظوها.
التفاحة(ها متأثر وتكاد تبكي): كده يا يوسف أفندي ...أنا برضه بأبوظ اللعبة...كل ما حاجة تحصل تقول لي أنتي يا تفاحة السبب ...أنتي يا تفاحة السبب...أنا معملتش حاجة حرام عليك...
يوسف أفندي: حرام عليّ أنا برضه!! ....أنا اللي علي طول بعمل مشاكل....دا أنتي عيلتك عاملة مشاكل من ساعة ما ربنا خلق العالم...تيته بتاعتك فضلت تعاكس في حوا لما كانت في الجنة وزغللت عينيها لغاية ما مدت ايديها وقطفت التفاحة من عالشجرة....يعني أنتوا يا تفاح سبب كل الخطايا والمشاكل اللي في العالم.
التفاحة(ها مخنوق بالدموع): أنا ....احنا...أنا.....
يوسف أفندي(يقاطعها بحزم وكأنه بينهي الموضوع): ياللا ....أمري لله...أنا اللي هجري المرة دي ....ياللا استخبوا بسرعة...(يخرج يوسف وهو يعد ب عالي: واحد .....اتنين....ثم يتلاشي ه وتجري الفواكه كلها عشان تستخبي بينما تتحرك التفاحة لتجلس تحت شجرة وتبدأ في البكاء )
التفاحة: اهيء ....اهيء....ليه بس كده يا ربي...؟؟ ...أنا مليش ذنب ...هو ليه بيقول لي الكلام الوحش ده؟؟ ...أنا معملتلوش حاجة.....
* تدخل الموزة وهي تجري عشان تستخبي ويأتي يوسف أفندي من الخارج
يوسف: خلاااااااااص.
الموزة: لسه (تُفاجأ الموزة بمنظر التفاحة الباكية فتذهب وتجلس بجانبها وتتحدث معها وتطبطب عليها)
الموزة: مالك يا تفاحة؟؟ فيه ايه يا حبيبتي؟؟
التفاحة(تبكي): فيه ايه؟؟ أنتي مش شايفة يوسف أفندي قال لي ايه؟؟
الموزة: يا شيخة ...حديأخد علي كلام يوسف أفندي ....دا عبيط.
التفاحة: دا كل ما يشوفني لازم يغتت عليّ ويقول لي ...أنتوا سبب كل مشاكل الدنيا ...الخطية دخلت العالم بسببكوا....طب افرض إن تيته غلطت أنا ذنبي إيه؟؟
الموزة: أنتي ملكيش ذنب ........
* يدخل يوسف أفندي للمسرح متلصصاً يبحث عن الفواكه المستخبية ويتكلم ب هامس
يوسف أفندي: أنتوا فييييييين يا حلوييييين.... اطلعوا يا مستخبييين (يلمح الموزة والتفاحة قاعدين فيصيح ب عالي ويجري عليهم يمسكهم)
يوسف أفندي: اشهدوني ....اشهدوني....مسكت الموزة والتفاحة مرة واحدة ....اشهدوني...
الموزة(تقف وتزعق فيه): بس يا يوسف أفندي ...احنا مبنلعبش
يوسف أفندي: يا سلام ...لما آجي أمسككوا ..تقولوا مبنلعبش.
الموزة: أنت مش شايف التفاحة عاملة إيه؟؟ دي يا عيني مقهورة من كتر العياط.
يوسف أفندي: وبتعيط ليه الست تفاحة ؟؟ مين اللي زعلها؟؟
الموزة: متعرفش مين اللي زعلها يا يوسف؟؟ أنت هتشتغللي؟؟
يوسف(مرتبكاً): أنا .... أنا ...أنا معملتلهاش حاجة.
التفاحة(باكية): لأ ....أنت عملت لي طبعاً.....غلطت فيّ وف عيلتي كلها وجرحتني جامد قوي.
يوسف: يا بنتي أنا كنت بهزر...متأخديش كل حاجة بجد كده.
الموزة: بتهزر يا يوسف؟؟ هو ده برضه يبقي اسمه هزار؟؟ تعيّب عالتفاحة وعلي عيلتها كلها وده يبقي اسمه هزار؟؟؟
التفاحة: يعني أنت ترضي حد يقول كلام مش كويس علي باباك ومامتك؟؟
يوسف أفندي: أنا مقلتش حاجة علي باباكي ومامتك...أنا اتكلمت علي تيتك بس...
الموزة: وليه أصلاً يا يوسف تقول كلام زي ده؟؟أنت مش عارف إن الكلام الوحش ده غلط ومش لازم تقوله...وأنت نفسك متقبلش حد يقول لك كلمة غلط...
يوسف أفندي: أنا محدش يقدر يقول عليّ ولا علي عيلتي كلمة غلط ...أنا عيلتي كلها أفندية وسمعتنا زي الجنيه الدهب.... وبعدين ....أنا مكدبتش..أنا قلت اللي حصل بس..... مش التفاحة هي اللي زغللت عنين حوا لغاية ما حوا أكلتها..؟ مش هو دا اللي حصل؟؟
التفاحة(تبكي): حتي لو ده حصل .... أنا ذنبي إيه؟؟ دي تيته هي اللي غلطت مش أنا. (الموزة تطبطب عالتفاحة وتهدي فيها)
الموزة: معلش يا حبيبتي....معلش يا تفاحة
يوسف أفندي: متزعليش مني يا تفاحة ....أنا آسف....مش هقول لك كده تاني....أنتي فعلاً ملكيش دعوة بالموضوع ده.....هه ....خلاص بقي.
التفاحة: يعني مش هتقول لي الكلام ده تاني؟؟
يوسف أفندي: لأ ..خلاص مدام بيضايقك يبقي مش هقوله أبداً.
التفاحة (تمسح دموعها): خلاص يا يوسف ....أنا مش زعلانة منك.
يوسف أفندي: طب ياللا قوموا بقي نكمل لعب....هغمض عيني وأعدلكوا من الأول....ياللا (يبدأ في كة بعيداً)
الموزة: استني يا يوسف أفندي ... أنا عاوزاك في حاجة مهمة.
يوسف: أيوة يا موزة.....فيه حاجة؟؟
الموزة: أنا عاوزة أسألك سؤال.
يوسف : اسألي............
الموزة: أنت مين قال لك إن الشجرة اللي حوا قطفت منها في الجنة كانت شجرة تفاح؟؟
يوسف أفندي(يهرش في رأسه ويفكر): مين اللي قال لي ؟؟ مش عارف بالظبط....بس دي حاجة معروفة جداً...كل الناس عارفة إن حوا أكلت التفاحة ..وأكلتها لآدم كمان ..حتي بالأمارة وقفت في زوره وطلعت له تفاحة آدم.
الموزة: أنت قريت اسم الشجرة في الكتاب المقدس؟؟
يوسف أفندي(متردداً): بصراحة ...مش فاكر.....
الموزة(تقف في مكانها): طب استنوني هنا شوية.....أنا مخبية كتابي المقدس تحت الشجرة اللي هناك دي (تذهب وتأتي بالكتاب المقدس من وراء الشجرة وتعود وتفتح الكتاب علي تكوين 2 وتناوله ليوسف أفندي وتقول )
الموزة: اقرأ عدد16 و 17 ....
يوسف أفندي(يمسك الكتاب ويقرأ ب عالي): و اوصى الرب الاله ادم قائلا من جميع شجر الجنة تاكل اكلا. و اما شجرة معرفة الخير و الشر فلا تاكل منها لانك يوم تاكل منها موتا تموت.
الموزة: فيه أي حاجة هنا بتقول إن الشجرة كانت شجرة تفاح؟؟
التفاحة (تجاوب بسرعة): لأ .... مفيش.... شفت يا يوسف أفندي....أهو أنت كنت بتقول عليّ كلام مش حقيقي ....كذب واشاعات يعني...
يوسف أفندي: استني بس يا تفاحة..... مش جايز باقي القصة تيجي فيها سيرة التفاح؟؟
الموزة:طب افتح باقي القصة في تكوين 3 واقرأ من أول الإصحاح لغاية عدد 6 .
يوسف أفندي (يقلب صفحة ويقرأ ب عالي): و كانت الحية احيل جميع حيوانات البرية التي عملها الرب الاله فقالت للمراة احقا قال الله لا تاكلا من كل شجر الجنة. فقالت المراة للحية من ثمر شجر الجنة ناكل .و اما ثمر الشجرة التي في وسط الجنة فقال الله لا تاكلا منه و لا تمساه لئلا تموتا. فقالت الحية للمراة لن تموتا . بل الله عالم انه يوم تاكلان منه تنفتح اعينكما و تكونان كالله عارفين الخير و الشر. فرات المراة ان الشجرة جيدة للاكل و انها بهجة للعيون و ان الشجرة شهية للنظر فاخذت من ثمرها و اكلت و اعطت رجلها ايضا معها فاكل.
الموزة: هه يا يوسف؟؟
يوسف أفندي (يتهته): آآآآآآآآآآ (يصمت)
التفاحة: مش عارف يرد طبعاً ...الموضوع ولا ليه علاقة بتيته ولا بأي حد من التفاح خالص.....دي ثمرة ممكن تكون أي نوع من أنواع الفواكه...يعني ممكن حتي ...ممكن حتي تكون يوسف أفندي.
يوسف أفندي : لأ ...طبعاً مش ممكن تكون يوسف أفندي.
الموزة: وليه بقي مش ممكن؟؟
يوسف أفندي (ينظر للكتاب المقدس): لأن الكتاب بيقول إنها أخدت الثمرة وأكلتها علي طول ...ولا قال إنها قشرتها ولا رمت البذر ....يبقي أكيد مش ممكن تكون يوسف أفندي.
الموزة: بص يا يوسف ...احنا منعرفش هي كانت ثمرة ايه..وده مش موضوعنا علي أي حال.....المهم إننا منروحش ننقل كلام مش كويس علي حد ...حتي لو كوووووووول الناس بيقولوه...
يوسف أفندي: خلاص يا موزة .... أنا فهمت ....ومش هعمل كده تاني ...مش هعيّب عي حد ولا أعايره بحاجة هو معملهاش ولا ليه ذنب فيها .....وكمان مش هقول أي اشاعات علي أي حد...حلو كده؟؟
الموزة: حلو قوي.
يوسف أفندي: لسه زعلانة مني يا تفاحة....أنا آسف.
التفاحة: لأ يا يوسف باشا ...خلاص مش زعلانة.....وكمان أنا اللي هأجري وراكوا ...ياللا روحوا استخبوا وأنا هأعد.
يوسف أفندي: لأ ..خلاص ....أنا اللي هجري المرة دي ....ياللا بسرعة استخبوا.....ياللا....
* يستدير يوسف أفندي ويخبي وشه في شجرة ويبدأ العد
يوسف أفندي : واحد ...اتنين ...تلاتة
* تجري الموزة علي بره تستخبي وتجري التفاحة ورا شجرة
يوسف أفندي: خلاااااااااااص.
الفواكه كلها: لســـــــــــــــــــــــــــــــــــه.
يوسف أفندي: خلااااااااااااااااااااااااااص.
الفواكه: لســــــــــــــــــــــــــــــــــــــــــــــــ ه.
