مَدْلُولاَت فِي العَقِيدَة الكَنَسِيَّة للقس انطونيوس فهمى

[كيلارا]

مَدْلُولاَت فِي العَقِيدَة الكَنَسِيَّة
للقس انطونيوس فهمى

عَاوِز أكَلِّمْكُم كَلِمَة بَسِيطَة خَالِص إِزَّاي الكِنِيسَة كَانِتْ بتْرُدٌ عَلَى أي بِدْعَة أوْ أي هَرْطَقَة مِنْ خِلاَل العِبَادَة .. لِنَفْرِض إِنْ فِيه نَاس بِتْقُول الْمَسِيح لَمْ يَتَجَسَدٌ .. لِنَفْرِض إِنْ فِيه بِدْعَة بِتْقُول إِنْ الْمَسِيح لَمَّا جَاءَ لَمْ يَأخُذْ جَسَد حَقِيقِي .. يِقُولَّك دَه كَانْ خَيَال .. كَانْ خَيَال ؟!! كَانْ يُبْقَى مَاشِي مِتْهَيَّأ لَك إِنُّه وَاحِدٌ لكِنْ هُوَ خَيَال .. فَالكِنِيسَة عَاوْزَه تُرُدٌ عَلَى الكَلاَم دَه تِعْمِل إِيه ؟ تِقُولَّك .. لاَ .. دَه هُوَ تَجَسَّدٌ جَسَد حَقِيقِي .. نِعْمِل إِيه نِخَلِّي المُؤمِنِينْ تَتَلاَمَس مَعَ الجَسَد الحَقِيقِي دَه ؟ .. إِزَّاي نِخَلِّي لُهُمْ الجَسَد دَه مَوْجُودٌ فِي الكِنِيسَة وَنَضَعُه فِي الصِّينِيَّة عَلَشَانْ يُشْعُرُوا إِنْ الْمَسِيح مَوْجُودٌ مَعَاهُمْ وَحَاضِر مَعَاهُمْ وَمَلْمُوس وَمَرْئِي وَنَقُول أنَّ هذَا هُوَ الجَسَد المُحْيِي الَّذِي أخَذَهُ إِبْنَك الوَحِيد رَبِّنَا وَإِلهْنَا وَمُخَلِّصْنَا يَسُوع الْمَسِيح مِنْ سَيِّدَتْنَا وَمَلِكَتْنَا كُلِّنَا وَالِدَة الإِله القِدِيسَة الطَّاهِرَة مَرْيَم ( مَا يَقُولُه الكاهِن فِي الإِعْتِرَاف ) .
فَالكِنِيسَة النَّاس اللِّي بِتْقُول إِنْ الْمَسِيح لَمْ يَتَجَسَد .. وَالنَّاس اللِّي بِتْقُول جَسَد الْمَسِيح جَسَد خَيَالِي .. نِقُول لُهُمْ .. لاَ .. دَه جَسَد حَقِيقِي عَنْ طَرِيقٌ إِنَّهَا تُحْضِرُه لَنَا فِي الصِّينِيَّة .. وَلَوْ تَاخُذٌ بَالَك إِنْتَ مِنْ الصِّينِيَّة سَوْفَ تَجِدْهَا مِدَوَرَة وَلَهَا حَاجَة شَكْل القُبَّة .. القُبَّة دِي فُوقْهَا صَلِيب .. القُبَّة وَالصِّينِيَّة وَالصَّلِيب إِشَارَة إِلَى المِزْوَدٌ .. يَعْنِي لَوْ أحْضَرْت لَك الصِّينِيَّة تَجِدٌ أبُونَا عَامِل لَهَا لِفَافَة مِنْ وَرَاء مَرْفُوعَة بِالقُبَّة وَهذِهِ هِيَ الصِّينِيَّة وَمَوْجُودٌ بِهَا الجَسَد .. دَه تَقْرِيباً المَغَارَة وَالنِّجم فُوق اللِّي هُوَ الصَّلِيب لأِنْ النِّجْم يُشِير حَيْثُ وُلِدَ الصَّبِي .. هُنَا الْمَسِيح .
النَّاس اللِّي بِتُنْكِر التَّجَسُّد الكِنِيسَة تُؤكِد عَلَى التَّجَسُّد بِالجَسَد المَوْجُودٌ فِي الصِّينِيَّة .. نِقُول دَه جَسَد خَيَال .. نِقُول .. لاَ .. دَه جَسَد حَقِيقِي وَتِيجِي تِقُول الكِنِيسَة * تَجَسَّد وَتَأنَّس * حَتَّى تُؤكِد لَك أنَّهُ لَيْسَ خَيَال بَلْ جَسَد لَهُ طَبِيعَة بَشَرِيَّة لأِنَّ التَّجَسُّد يَعْنِي جَسَد وَالتَّأنُّس طَبِيعِة البَشَر .. أصْبَح إِنْسَان لُه مَشَاعِر عَلَشَانْ كِدَه نَجِد يَسُوع بَكَى وَيَقُول مَثَلاً إِنْزَعَجَ يَسُوع بِالرُّوح ( يو 11 : 33 ) .. قَالَ نَفْسِي حَزِينَةٌ حَتَّى المُوت ( مر 14 : 34 ) .. يِقُول النَّفْس وَفِيه حَاجَات يِقُول الجَسَد جَاع .. تِعِبْ .
فَالكِنِيسَة تُقَدِّم لَنَا الْمَسِيح المُتَجَسِّد عَلَى المَذْبَح عَلَشَانْ كِدَه إِحْنَا بِنُؤمِنْ إِنْ كُلَّ وَاحِدٌ مِنَّا قِطْعَة مِنْ الْمَسِيح .. إِحْنَا أعْضَاء فِي جَسَدُه بِدَلِيل إِنْ كُلَّ وَاحَِدٌ مِنِّنَا بِيَأخُذ قِطْعَة مِنْ جَسَدُه وَكَأنْ كُلَّ وَاحِدٌ بِيَأخُذ الحِتَّة بِتَاعْتُه فِي الْمَسِيح .. كَأنْ بِتْقُول لأِبُونَا وَإِنْتَ بِتِتْنَاوِل هَاتْ الحِتَّة بِتَاعْتِي .. كُلَّ وَاحِدٌ بِيَاخُدٌ الحِتَّة بِتَاعْتُه فِي الْمَسِيح .. يَعْنِي فِي الأخِر لَوْ جَمَّعْنَاكُمْ كُلُّكُم تُمَثِّلُوا الْمَسِيح الجَسَد الوَاحِدٌ .. الخُبْزَة الوَاحِدَة .. عَلَشَانْ كِدَه الكِنِيسَة بِتُحَوِل الفِكْرَة لِعِبَادَة .. إِلَى طَقْس .. تِقُولَّك دِي جَمَاعِة المُؤمِنِينْ .. كُلَّ وَاحِدٌ مِنْكُمْ حِتَّة فِي الْمَسِيح دَه مَعْنَاه إِيه ؟ إِنْ الكِنِيسَة بِتْرُدٌ عَلَى النَّاس اللِّي قَالُوا إِنْ الْمَسِيح لَمْ يَتَجَسَد الكِنِيسَة تُؤكِد عَلَى التَّجَسُّد مِنْ خِلاَل التَنَاوُل .. مِنْ خِلاَل القُرْبَانَة .. طَبْ إِيه كَمَانْ ؟
هُنَاك نَاس أنْكَرُوا الثَّالُوث .. مَفِيش حَاجَة إِسْمَهَا آب وَإِبْن وَرُوح قُدُس .. وَفِيه نَاس غِير إِنُّهُمْ أنْكَرُوا الثَّالُوث قَالُوا إِنُّهُمْ غِير مُتَسَاوِيِينْ .. تِلاَقِي الكِنِيسَة تِعْمِل إِيه تِأكِد عَلَى حِكَايِة الثَّالُوث .. فَالكِنِيسَة تَأخُذ الفِكْرَة بِتَاعِتْ الهَرْطَقَة بِتَاعِتْهُمْ إِنْ مَفِيش ثَالُوث .. لاَ .. تَعَالَ بَقَى أنَا حَوَرِيك .. تَعَالَ بَقَى إِرْشِم الصَّلِيب تِقُول * بِسْم الآب وَالإِبْن وَالرُّوح القُدُس * .. الكِنِيسَة مِنْ خِلاَل حَرَكَة بَسِيطَة بِتْسَلِّمْهَا لَك وَإِنْتَ طِفْل ( بِيبِي ) عَلَشَانْ تِعَلِّمَك إِنْ الآب وَالإِبْن وَالرُّوح القُدُس الثَّلاَثَة دُول وَاحِدٌ .. وَآب وَإِبْن وَرُوح قُدُس الإِله الوَاحِدٌ آمِين هُمَّ ثَلاَثَة وَلكِنَّهُمْ وَاحِدٌ .. يَعْنِي الكِنِيسَة بِتْرُدٌ عَلَى بِدْعَة مِنْ خِلاَل عِبَادَة .. يَعْنِي الكِنِيسَة بِتْقُولَّك هُمَّ وَاحِدٌ لَمَّا يِجِي وَاحِدٌ يِقُولَّك هُمَّ وَاحِدٌ ؟ .. تِقُول .. لاَ .. هُمَّ ثَلاَثَة فِي وَاحِدٌ .. وَاحِدٌ جُوَّاه ثَلاَثَة .. يَعْنِي الكِنِيسَة كِتِير تِسْتَخْدِم كَلِمَة * الثَّالُوث القُدُّوس * .. لِيه ؟ عَلَشَانْ تُؤكِد إِنُّهُم ثَلاَثَة .. تِقُول * الثَّالُوث المُسَاوِي * .
تِلاَقِي أبُونَا يِقُول ﴿ مَحَبِّة الله الآب .. وَنِعْمَة الإِبْن الوَحِيد .. وَشَرِكَة وَمَوْهِبِة الرُّوح القُدُس ﴾ .. إِذاً الكِنِيسَة تُرُدٌ عَلَى النَّاس اللِّي بِيْقُولُوا إِنْ مَفِيش ثَالُوث .. الكِنِيسَة بِتْقُول إِنْ أي شِئ فِي الكِنِيسَة يَتَقَدَّس بِالثَّالُوث .. هُنَاك شِئ مَشْهُورٌ فِي الكِنِيسَة يِعْرَفُه الشَّمَامِسَة إِسْمُه ألـ 3 رُشُومَات .. عَلَشَانْ حَضْرِتَك تِلْبِس شَمَاس لاَزِم تِقُول لأِبُونَا يِرْشِمْهَا لَك .. وَأبُونَا يِعْمِل إِيه ؟ يِرْشِمْ الصَّلِيب عَلَى نَفْسُه وَبَعْد كِدَه يِعْمِلَّك الأوَّل الآب .. وَالثَّانِي الإِبْن .. وَالثَّالِث الرُّوح القُدُس عَلَشَانْ تِلْبِس شَمَاس .. حَرَكَة بَسِيطَة جِدّاً خَلِّتَك تُشْعُر إِنْ هُنَاك ثَالُوث .. يَعْنِي النَّاس اللِّي بِتْقُول إِنْ مَفِيش ثَالُوث الكِنِيسَة أكِدِتْهَا وَدَخَّلِتْهَا جُوَه حَيَاتْهُم وَأصْبَحِتْ جُزْء مِنْ مُمَارَسَتِهِمْ وَمَعْرِفَتِهِمْ .
أبُونَا لَمَّا يِجِي يِخْتَار الحَمَل يِرْشِم الأبَارْكَة بِسْم الآب وَالإِبْن وَالرُّوح القُدُس .. بَعْد إِخْتِيَار الحَمَل يِعْمِل إِيه ؟ يِقُول ﴿ مَجْداً وَإِكْرَاماً .. إِكْرَاماً وَمَجْداً لِلثَّالُوث القُدُّوس ﴾ .. دِي الكِنِيسَة أخَذِت الفِكْرَة مِنْ النَّاس بِتُوع البِدَع وَتُؤكِد أنَّ هُنَاك ثَالُوث وَتُؤكِد عَلِيه .. عَلَشَانْ إِنْتَ كَمَانْ بَعْد مَا أبُونَا يِدُور دَوْرِة الحَمَل وَيِلِفْ فِي الكِنِيسَة الشَّمَاس اللِّي مَعَاه يِمْسِك المَيَّة وَوَاحِدٌ تَانِي مَعَاه القَارُورَة وَأبُونَا مَاسِك الحَمَل يِصَلِّي وَالشَّمَاس يِرُدٌ عَلِيه ﴿ وَاحِدٌ هُوَ الآب القُدُّوس .. وَاحِدٌ هُوَ الإِبْن القُدُّوس .. وَاحِدٌ هُوَ الرُّوح القُدُس آمِين ﴾ .. وَالشَّعْب يِرُدٌ ﴿ المَجْدُ لِلآب وَالإِبْن وَالرُّوح القُدُس ﴾ .
إِذاً الكِنِيسَة خَلِّتَك تِعِيش التَّجَسُّد بِإِنْ جَابِتْ لَك الْمَسِيح عَلَى المَذْبَح .. لِدَرَجِة إِنَّك تِتْخَيَّل وَأبُونَا بِيِفْرِش المَذْبَح قَبْل القُدَّاس وَكَأنُّه بِيِفْرِش المِزْوَدٌ وَبِيْحُط جُوّاه شِوَيِة لَفَايِفْ زَي بِيِفْرِشُه .. جَتْ نَاس أنْكَرِت الثَّالُوث أكِّدِت الكِنِيسَة الثَّالُوث .. وَكُلَّ حَاجَة تِعْمِلْهَا تِرْشِم عَلِيهَا الصَّلِيب وَتَقُول الثَّلاَث رُشُومَات اللِّي قُولْنَا عَلِيهَا .. يَعْنِي لَمَّا يِجِي وَاحِدٌ يِمْتِحِنْ يِجِيبْ رَقَمْ الجُلُوس بِتَاعُه لأِبُونَا وَيِقُولُّه صَلِّي لِي يَا أبُونَا عَلِيه .. حَتْلاَقِي أبُونَا رَشَمْ عَلِيه 3 صُلْبَان .. يَعْنِي قُوِّة الثَّالُوث القُدُّوس تَكُون مَعَاك يَا إِبْنِي مَتْخَفْش .. يَعْنِي الكِنِيسَة خَلِّتْ قُوِّة الثَّالُوث القُدُّوس تُدْخُل صَمِيم عَمَلْهَا .. عَلَشَانْ كِدَه أقْدَر أقُولَّك لَوْ مُجَرَّدٌ وَاحِدٌ عَايِز أبُونَا يِصَلِّي لُه عَلَى مِيَاه يِقُوم أبُونَا يِعْمِل إِيه ؟ الآب وَالإِبْن وَالرُّوح القُدُس وَيُنْفُخ فِي المِيَاه دِي وَكُلَّ وَاحِدٌ فِي البِيت عَاوِز يِشْرَب مِنْ المِيَاه دِي عَلَشَانْ فِيهَا قُوِّة الثَّالُوث القُدُّوس .. لَمَّا نِيجِي نِعَمِد طِفْل نِغَطَسُه فِي المَيَّة 3 مَرَّات وَنقُولُّه أعَمِدَك يَا فُلاَن بِسْم الآب وَنِغَطَس .. وَالإِبْن وَنِغَطَس .. وَالرُّوح القُدُس وَنِغَطَس .. الكِنِيسَة حَوِّلِت الثَّالُوث المُقَدَّس إِلَى جُزْء مُهِمْ جِدّاً مِنْ عِبَادِتْهَا .
تَكَلَّمْنَا عَنْ التَّجَسُّد وَالثَّالُوث .. فَاضِل الأبَدِيَّة وَالقِدِّيسِينْ .. فِي نَاس قَالُوا إِنْ مَفِيش أبَدِيَّة .. إِحْنَا بِنْمُوت وَنِرُوح التُّرَاب وَخَلاَص عَلَى كِدَه .. يَعْنِي إِيه يِضْمَنْ لِي إِنْ فِي حَيَاة أبَدِيَّة ؟!! الكِنِيسَة تِقُولَّك مَفِيش حَيَاة أبَدِيَّة دِي تُبْقَى كَارْثَة .. مُصِيبَة .. إِزَّاي ؟ تِقُول الكِنِيسَة أنَا حَزْرَع فِي وِلاَدِي إِنْ فِي حَيَاة أبَدِيَّة .. يَعْنِي حَتِعْمِلِّي إِيه الكِنِيسَة ؟ تُبْقَى مُرْتَفِعَة لأِنَّ الإِرْتِفَاع يَدُل عَلَى القُرْب مِنْ السَّمَاء .. تِخَلِّي فِي لُون أزْرَق سَمَاوِي عَلَشَانْ تِفْتِكِر إِنَّك فِي السَّمَاء .. تِلاَقِي الكِنِيسَة تِعْمِلَّك قُبَّة وَفِيهَا شَبَابِيك تُبُص مِنْهَا تِلاَقِي السَّمَاء .. يَعْنِي الإِرْتِفَاع وَالألْوَان وَالشَّبَابِيك تَدُل عَلَى إِنْ إِحْنَا فِي السَّمَاء .. كَمَانْ الكِنِيسَة تِسْتَخْدِم الحَاجَات اللِّي عَلَى شَكْل دَايْرَة مِثْل القُبَّة .. لِيه ؟ لأِنْ أي شَكْل هَنْدَسِي لُه بِدَايَة وَنِهَايَة وَلكِنْ الدَايْرَة مِنْ الصَعْب وُجُودٌ لَهَا نِهَايَة .. عَلَشَانْ كِدَه الكِنِيسَة مِنْ خِلاَل أعْمَال بَسِيطَة تِخَلِّي عَنْدَك إِشْتِيَاق لِلحَيَاة الأبَدِيَّة .
دَه مَعْنَاه إِنْ الكِنِيسَة عَايْزَة تُرُدٌ عَلَى النَّاس اللِّي بِتْقُول مَفِيش أبَدِيَّة وَعَايْزَة تِثَبِّت فِيك الحَيَاة الأبَدِيَّة .. تِقُول إِيه عَلَشَانْ نُؤمِنْ بِالحَيَاة الأبَدِيَّة ؟ .. ﴿ وَظُهُورُه الثَّانِي الآتِي مِنَ السَّموَات المَخُوف المَمْلُوء مَجْداً ﴾ ( مَا يَقُولُه الكَاهِن بَعْد مَرَدٌ * آمِين .. آمِين .. آمِين بِمَوْتِكَ يَارَب نُبَشِر * ) .. وَفِي قَانُون الإِيمَان ﴿ وَنَنْتَظِر قِيَامِة الأمْوَات وَحَيَاة الدَّهْر الآتِي آمِين ﴾ .. أنَا مِشْ زَي النَّاس اللِّي مِشْ بِتُؤمِنْ بِالمَجِئ الثَّانِي .. أنَا أُؤمِنْ بِقِيَامِة الأمْوَات .. أنَا كَمَانْ مِسْتَنِّيهَا .. مِنْ هِنَا الكِنِيسَة تِخَلِيك عَايِش عَلَى الأرْض لكِنْ مِنْتِظِر السَّمَاء .. وَلَمَّا تُخْرُج لِلعَالَمْ تِلاَقِي اللِّي عَاوِز يِقُول كَلاَمٌ بَطَّال .. وَاللِّي عَاوِز يِسْمَع أغَانِي وَلكِنْ أنَا مِنْتِظِر السَّمَاء .. أيْنَ السَّمَاء .. وَإِيه الدَّلِيل إِنِّي كُنْت وَاقِفْ فِي الكِنِيسَة ؟ تِقُول أنَا كُنْت وَاقِفْ فِي السَّمَاء .. ﴿ إِذَا مَا وَقَفْنَا فِي هَيْكَلَك المُقَدَّس نُحْسَب كَالقِيَام فِي السَّمَاء ﴾ ( مَا تَقُولُه الكِنِيسَة فِي قِطَع الثَّالِثَة ) .. أنَا إِبْن لِلسَّمَاء .. هُوَ أنَا إِبْن لِلأرْض ؟ الإِنْسَان المَسِيحِي الكِنِيسَة تِسَاعْدُه إِنُّه يِكُون إِنْسَان سَمَائِي وَيَكُون مُرْتَفِعْ وَسَامِي وَدِي مِنْ أهَمْ الحَاجَات اللِّي عَاوِز أرَكِز فِيهَا .
الكِنِيسَة تِغْرِز فِيك حَقِيقِة الحَيَاة الأبَدِيَّة وَتُنَمِّيهَا بِنِعْمِة رَبِّنَا .. عَلَشَانْ كِدَه تِلاَحِظ إِنْ تَمَلِّي الكِنِيسَة لَمَّا تِعْمِل أي دَوْرَة أوْ أي زَفَّة أبُونَا يِدُور كِتِير فِي المَذْبَح عَلَشَانْ يِبَخَر .. أبُونَا يِنْزِل مِنْ المَذْبَح وَيِلِفْ تِجَاه الرِّجَالَة وَهُوَ عَكْس تِجَاه عَقَارِب السَّاعَة .. دَه مَعْنَاه إِنُّه فُوق الزَّمَنْ .. نَحْنُ الأنْ وَإِنْ كُنَّا نَحْيَا فِي الزَّمَنْ فَنَحْنُ قَدْ غَلَبْنَا الزَّمَنْ .. يَا سَلاَمٌ ؟ .. آه .. نِسْأل سُؤَال فِيه مَرَّة فِي السَنَة بِدَل مَا يِلِفْ تِجَاه الرِّجَالَة يِبْدَأ اللَفَّة مِنْ عَنْد السِّتَات .. إِمْتَى ؟ يُوم خَمِيس العَهْد فِي دَوْرِة يَهُوذَا .. لأِنَّ يَهُوذَا أحَبَّ الزَّمَنْ وَأحَبَّ الأرْض فَرَفَضِتُه الأبَدِيَّة .. إِذاً وَإِنْتَ وَاقِفْ فِي الكِنِيسَة لاَزِم تِعْرَف إِنَّك ضِد الزَّمَنْ أوْ فُوْق الزَّمَنْ .. أكِيد فِيه حَاجَات كِتِير بِنِعْمِلْهَا غِير أهْل العَالَمْ .
زَمَان مِنْ ضِمْن العَلاَمَات الحِلْوَة اللِّي كَانْ المَسِيحِيُون يِحِبُّوا يَخْدُوهَا تِمَيِّزْهُمْ عَنْ البَاقِينْ هِيَّ عَلاَمِة السَّمَكَة .. السَّمَكَة مِنْ ضِمْن العَلاَمَات اللِّي المَسِيحِيُون مُعْجَبُون بِهَا لأِنَّهَا تِمْشِي عَكْس التَيَار .. لأِنْ لَوْ السَّمَكَة مِشِتْ مَعَ التَيَار تِكُون مَيِّتَة .. دَه مِشْ طَبِيعِي .. وَلَوْ مِشِتْ السَّمَكَة مَعَ التَيَار حَتِتْحِدِف عَلَى الشَطْ .. اللِّي يِخَلِّيهَا تُدْخُل الأعْمَاق هُوَ مَشْيَهَا عَكْس التَيَار .. إِمْشِي مَعَ رَبِّنَا وَاتْسَلَّح بِالإِنْجِيل .. إِمْلاَ قَلْبَك بِحُب رَبِّنَا وَخَلِّيك زَي أبَائِك مُحِبْ لِلأبَدِيَّة وَارْتَفِع فَوْقَ الزَّمَنْ بِحُبْ رَبِّنَا .
نِسْأل عَنْ القِدِّيسِين يِقُول بَلاَ قِدِّيسِينْ بَلاَ بِتَاع .. زَيِّنَا زَيُّهُمْ .. هُوَ إِيه الفَرْق مِشْ دَه بَشَر وَدَه بَشَر ؟!! تِيجِي الكِنِيسَة تِقُول .. لاَ .. إِزَّاي .. دُول نَاس أكْرَمُوا رَبِّنَا .. دُول نَاس مَاتُوا مِنْ أجْل إِسْمُه .. دُول قُدْوَة لِينَا .. النَّاس اللِّي بِتْقُول إِنْ مَفِيش قِدِّيسِينْ تِيجِي الكِنِيسَة تِقُول عَلَشَانْ وِلاَدِي مَيِعْمِلُوش زَي النَّاس دُول تِعْمِل إِيه ؟ تِلاَقِي الكِنِيسَة مَلْيَانَة بِصُور القِدِّيسِينْ فَتِكُون فَاكِرْهُمْ وَيَكُونُوا قُدْوَة وَشُفَعَاء .. عَاشُوا فِي جَسَد زَيَّك لكِنْ مُنْتَصِرِينْ .. مُمْكِنْ تِكُون الظُّرُوف صَعْبَة وَلكِنْ إِرْتَفَعُوا فَوْقَهَا .. هذَا جَمَال وَرَوْعِة الكِنِيسَة .. إِزَّاي مَفِيش قِدِّيسِينْ ؟ عَلَشَانْ كِدَه الكِنِيسَة بِتْرَتِبْ أعْيَادٌ لِلقِدِّيسِينْ وَفِي أعْيَادْهُمْ نِعْمِل تَمْجِيد وَمَدِيح وَلَمَّا نِعْمِل تَمَاجِيد نَتَذَكَّر سِيرْتُه مِثَال الأنْبَا أنْطُونْيُوس نِقُولُّه فِي مَدِيحُه ﴿ يَا عَظِيم فِي جِهَادَك .. يَا حَكِيم فِي إِرْشَادَك .. إِشْفَع فِي أوْلاَدَك ..... ﴾ .. نِفْتِكِر القِدِيس بِأعْمَالُه وَشَفَاعْتُه فِينَا .. إِحْنَا مِشْ بِنْألِّهُه لكِنِّنَا نُكْرِمُه .. مِشْ بِنِعْبُدُه وَلكِنْ نُكْرِمُه .
زَي تَكْرِيم الدَوْلَة لِلشُّهَدَاء بِتُوع حَرْب أُكْتُوبَر .. لِمَاذَا لاَ تُكْرِم الكِنِيسَة الشُّهَدَاء فِي الأعْيَادٌ وَمَجْمَع التَّسْبِحَة وَمَجْمَع القُدَّاس وَمَجْمَع الذُّكْصُولُوجِيَات ؟ كُلَّ دَه عَلَشَانْ القِدِّيسِينْ .. عَلَشَانْ يِفَرَّحَك وَيِحْفَظَك بِالقِدِيس .. وَفِي القُدَّاس تِلاَقِي السِنِكْسَار عَلَشَانْ تِعْرَف سِيرِة القِدِيس وَتِلاَقِي الشَّمَاس يِحُط إِسْم قِدِيس اليُّوم عَلَشَانْ نَتَذَكَّر القِدِيس .. الكِنِيسَة لَمَّا لَقِت نَاس بِتْهَاجِمْ القِدِّيسِينْ خَلِّتْ كَنَائِس القِدِّيسِينْ .. كَنَائِس بِإِسْم مَارِمِينَا وَكَنَائِس بِإِسْم العَذْرَاء .. إِذَا كَانْ الله بِيُكْرِمَهُمْ إِزَّاي إِحْنَا لاَ نُكْرِمَهُمْ ؟ إِذَا كَانْ صَاحِب الكِنِيسَة يُكْرِمَهُمْ إِزَّاي إِحْنَا لا نُكْرِمَهُمْ ؟
التَّجَسُّد .. الثَّالُوث .. الأبَدِيَّة .. القِدِّيسِينْ مَعَاهُمْ السِتْ العَذْرَاء .. كَمَانْ الكِنِيسَة بِتْقُول يَاللِّي بِتْقُول إِنْ هِيَّ إِنْسَانَة .. لاَ .. دِي هِيَّ أُم لِلإِله وَهِيَّ مَمْلُؤة مَجْداً .. دِي قِدِيسَة وَوَلَدِت لَنَا الله بِالحَقِيقَة .. عَلَشَانْ كِدَه نِشُوف أدْ إِيه النَّاس بِتْقُول عَلِيهَا إِيه .. الكِنِيسَة قَالِتْ أنَا حَثَبِتْ فِي وِلاَدِي العَقِيدَة بِتَاعِتْهُمْ عَنْ طَرِيقٌ مُمَارَسَات طَقْسِيَّة يِعِيشُوا بِيهَا مِنْ خِلاَلْهَا تِحِس إِنَّك إِتْشَبَعْت بِالعَقِيدَة الصَّحِيحَة مِنْ غِير إِقْنَاع بِالوَرَقَة وَالقَلَمْ .. لِيه ؟ القِدِيس وَالعَقِيدَة وَالثَّالُوث جُزْء مِنَّك .. العَقِيدَة قَرَّبِتْ مِنَّك مِنْ خِلاَل التَنَاوُل لأِنَّ الله صَارَ إِنْسَان .
رَبِّنَا يِدِّيكُم فَهْم وَقُوَّة وَيُدَبِّرحَيَاتْكُمْ
رَبِّنَا يِكَمِّل نَقَائِصْنَا وَيِسْنِد كُلَّ ضَعْف فِينَا بِنِعِمْتُه
لَهُ المَجْد دَائِماً أبَدِيّاً آمِين