شكرا ليك يارب النهاردة يوم 4/11/2012 تمت المعجزة الى عملتها مع جولى بنتى فى لحظة اختيار البابا الجديد كنت فى مستشفى الدمرداش جنب الكاتدرائية سامع االقداس و مستنين اخر اشعة وتحاليل علشان نطمن على النزيف و ندخل عند الدكتور يشوف الاشعة المقطعية واول ما ندخل عندة بعد طول انتظار لقيت الدكتور بينادى لكل الدكاترة الى فى قسم المخ والاعصاب علشان يوريهم الاشعاعات القديمة والجديدة ويقولوة الاشعة الاولى بتقول ان البنت كان قدامها ساعتين وتفارق الحياة واخر اشعة بتقول انا
البنت زى الفل وان الى عندها دلوقتى حاجة بسيطة هيروح مع الوقت ويقعدوا كل الدكاترة يصورا الاشعة و الفرحة الى شفتها فى عينهم عرفت ادى اية المعجزة عظيمة و اد اية ببركة صلوات الناس الكتيير الى صلوا ربنا اتدخل وصنع مع جولى معجزة عظيمة ببركة وشفاعة ام النور والبابا كيرلس ومارمينا والبابا شنودة والقديس لوقا الطبيب والقديسة سانت ريتا والملاك ميخائيل وقديس وشفيع كنيستنا الانبا رويس وكل القديسين والقديسيات والانبياء والرسل والملايكة , شكرا بجد لكل الناس الى صليت وببركة القديسين وصلواتكوا تخف خالص والى حصل ميكنش لية اى اثر بعد كدة امين
وهبتدى المعجزة من ساعة ما جولى حسيت بتعب يوم الاربعاء الموافق 17/10/2012 حسيت بسخونة فى كل جسمها واحنا كلنا افتكرنا انة دور برد عادى وقلنا هنوديها للدمتور بتاعها يوم الخميس ونديها اى مسكن وخلاص وفعلا قعدنا نديها خافض حرارة بس ملقناش تحسن خالص وفضلت طول الليل تعبانة ومامتها تعيط جانبها و يوم الخميس الصبح حسيت ان الموضوع كبير ونزلت ادور على علاج تانى وجيبت خافض حرارة و مقياس حرارة ولقينا الدنيا مفيش فيها تحسن خالص رحت الشغل و جولى ومامتها راحوا عند مامتها علشان الدكتور بتاعها هناك وفعلا راحوا الدكتور اول لما شافها مكشفش ولا حاجة وقال راحوا مستشفى الدمرداش وهما هناك هيتصرفوا وكتب تقرير ورحنا هناك وكل دة كلنا افتكرنا انة جفاف ورحنا المستشفى كل دكتور يجى يبص على التقرير يقعد يسالنا هى اتخبطت وقعت من حد وكلام زى كدة واحنا مش فاهمين حاجة عمال اقولهم راكبوا محاليل علشان الجفاف وهما عمالين يندوة لدكاترة تانى وكدة اتصلت بالدكتور الى حولها وقلتوة هما مركبوش تحاليل لية قالى هما بيعملوة الصح وسيبوهم خالص ساعتها قلقنا قوى ومكناش فاهمين حاجة وبعد كدة دكتور قالى انا شاكين انة يكون عندها نزيف فى المخ هنعمل حبة تحاليل وبعد كدة هنعمل اشعة مقطعية مرديتش ساعتها اقول لحد وعمالنا تحاليل بصعوبة كبيرة جدا لان البنت محدش كان عارف يسحب منها دم خالص وبهطلوا جسم البنت كلة المهم التحاليل ظلعت اسواء تحاليل ممكن حد يشوفها لبنت نسبة السيولة عالية جدا والهمجلوبين الى فى الدم قليل جدا و نسبة التلوث عالية جدا ومفيش اى حاجة فى صورة الدم طالعة كويسة قالى اعملها اشعة مقطعية على المخ وسط دموع وصريخ من مامتها وكل الى موجود وعمالنا اشعة مقطعية الساعة تقريبا كانت 3 الصبح من يوم الجمعة وكانت النتيجة ان عندها نزيف فى المخ والبنت تقريبا قدامها ساعات قليلة وتفارق الحياة وسط صريخ ودموع الناس كنا جنب الكاتدرائية كل الناس كانت بتصلى وحطينا على جولى صورة للبابا شنودة البنت كان شكلها فعلا بتموت والدكاترة فى الدمرداش قالنا دى محتاجة عملية كبيرة و سرير رعاية واحنا معندناش رحوا دوروا على مستشفى قعدنا نلف طول الليل لغاية الساعة 10 من يوم الجمعة 19 /10/2012 وساعتها كنا وصلنا مستشفى المطرية قالوا مفيش مكان لان كمان كان فى اضراب فى الوقت دة من الدكاترة المهم واحد هناك قلنا ممكن ترحوا مستشفى خاص بس طبعا التكاليف عالية بس مش زى باقى المتشفيات وانا الصراحة مقدرش على المستشفيات الخاصة المهم قلت انا بنتى بتموت وقلت لربنا انا بتجيب التجربة على قد الواحد بس المرة دى انا مش قدها وظروفى متسمحش بالتكاليف دى اتصرف يارب
المهم فضلنا نتقل لغاية لما وصلنا لمركز طبى الزهراء فى عين شمس
دخلوها الرعاية وانا ابونا بتاع كنيستنا ابونا تادرس حبيب وهو قبل الرسامة كان دكتور قالى روح لدكتور فى مستشفى المحبة وشوف راية اية سيبتهم هناك ورحت لقيت الدكتور بيقولى دى حالى ميؤس منها واستحمل وربنا معاك ومفيش فى مصر غير مركز واحد مجهز للعملية دى بس دة تكاليفة عالية جدا توصل لغاية 50 او 60 الف جنية وانا مقدرش على التكاليف دة وقالى بعد ما تعمل العملية احتمال انها تعيش 10% فقالى مفيش فايدة خرجت من المستشفى ومش قادر اوصف ساعتها كانت الدنيا عاملة ازاى المهم رحنا مركز الزهراء وطلبوا دم ورحنا جايبنا دم وبعد كدة بالليل جالنا دكتور ملاك من عند ربنا اسمة د / عبد المقصود قال هنعمل الصبح اشعة وتحاليل تانى ونشوف الدنيا هيحصل فيها اية فى الوقت دة كان البنت ادهنت بزيت البابا شنودة وحنوط والناس كانت اتديت تصلى بشكل كبير جدا انا متخيلتش كمية الناس الى كانت بتصلى والى جيت المستشفى فى اليوم دة ومشينا كل الناس وفضلت انا و ام جولى وواحد صاحبى بس ويوم السبت 20/10/2012 الساعة تقريبا 2 الصبح قالوالى عاوين نعمل حاجة اسمها سنتر لين علشان يوصل دم للوريد ويبتدى يديها التحاليل بس كان فى تخوف من السيولة وخرجوا الدكاترة كلها تقويلى فى خطر كبير لو اتعملت ولو متعملتش فى خطر كبير بردة فصلينا كلنا ومامتها اتشفعت بابابا شنودة و وافقت انة يعملها وقعدوا 20 دقيقة بالظبط واعصابنا كلنا كانت فى حالة انهيار وعمالين نصلى وخرجوا قالوا الحمد لله نجحت وسط فرحة الدكاترة و عديت باقى الساعت لغاية الساعة 7 الصبح لما جاة الدكتور عبد المقصود وقال احنا هنعمل بذل بس فى خطورها على حياتها لان الدم بيزيد وضاغط على كل مخها وعلى كل مراكز الحس والحركة وفى الوقت دة كان جولى النص الشمال كلها كانة مشلول والفص اليمين فى المخ تقريبا اتصفى فقالى فى خطر على حياتها لو عملتها ولو معملتهاش هيبقى فى خطر بردة فصبينا وقالى قرر ومضانى على ورقة قرايتها كان فيها كمية حاجات ممكن تحصل المهم قال مضيت وقعدنا مستنين ومش قادر اقولكوا مامتها كانت عاملة ازاى فى الوقت دة والدكتور دخل وقال الحمد لله سحب اكتر من 20 سم ومكنش مصدق وقال دى معجزة ان ميحصلش نزيف فى الوقت دة كانت صورة البابا شنودة مع البنت وارتحنا شوية وقال هنعمل اشعة مقطيعية يوم الاحد 21/10/2012 الساعة 6 الصبح وفضلنا يوم السبت كلة فى المستشفى بس حالة البنت كانت بتسوء بشكل غريب المجهود الى بتعملوة علشان تستحمل التعب والعملتين الى حصلوا البنت كان شكلها مجهد جدا لدرجة ان خلاص كنا متوقعين ان البنت بتفارق الحياة جيبنا اب كاهن عمدها فى المستشفى بالمياة بس وانا شفت بعينى ان ساعة ما ابونا رشها بالمياة البنت جسمها كله اتنفض وجانبها الشمال التنفضت بردة لحظة مقرش انسها المهم اتصلت بابونا تادرس وقلتوة اترشت بالمياة بس مدهنتش بالزيت فقالى انا جاى دخل جوة هو ابونا دانيال ومعلم الكنيسة ودكتور اشرف مسئول الرعاية استقبلهم حلو ودخلوا قعدوا جوة تقريبا نص ساعة كانت اترشمت وابونا قالى هى كدة بقيت مسيحية ولو حصل حاجة متزعلش وربنا معاك وقالى كلام معناه ان البنت خلاص بتموت فضلنا ساهرنين ونصلى ويوم الاحد كنا بندور كلنا على دواء ناقص فى السوق والمفروض هنروح نعمل اشعة يوم الاتنين الصبح الموافق 22/10/2012 رحنا نعمل الاشعة المقطعية التانية رحت انا بس مع الدكتور ودخلت امسك جولى ورشمت عليها الصليب وكانت صورة البابا شنودة مش مفرقها والناس كانت كلها بتطلب شفاعتة وشفاعة القديسين وانا عاوز اقول بجد انا لقيت الناس بتصلى بشكل عظيم جدا مشفتهوش فى حياتى كمية ناس قريبت من ربنا بسبب جولى كتيرة جدا وكلهم كانوا مستنين الاشعة دى المهم دخلنا وخرجنا ولقيت الدكتور مش عاوز يقولى الاشعة فيها اية فخفت وقلقت واستنيت الدتور عبد المقصود لما جاة وطمنى لاول مرة وقالى فى تحسن ملحوظ فى الاشعة والنزيف قل والتحاليل بتقول ان نسبة الدم اتظبت والسيوله قلت وكل الى فى المستشفى كان بيقول انها معجزة كبيرة من ربنا والدكتور قالى دى معجزة ود كتور اشرف قالى دة هيتعمل عليها بحث وهنزلوة على النت لازم الناس كلها تعرف انا البنت دى حالة فريدة من نوعها واديتنا امل ان فى الحالات الميؤس منها دايما بيبقى فى امل وفضلنا قاعدين يوم الاتنين وللول مرة بيقويلى هندخلك انت مامتها تشوفوها باليل ودخلنا شفنها ومامتها ضلت تصلى وانا قعدت اهن البنت بالزيت بتاع البابا شنودة وخرجنا من المستشفى يوم الاربع الساعة 6 باليل وقال هنروح نعمل اشعة يوم 4/11/2012 فى يوم القرعة الهيكيلة وكنا جنب الدمرداش وحصل الى قلت علية فى الاول معجزة بكل المقاييس وفرحة الدكاترة بجد اشكر ربنا على المعجزة ببركة وشفاعة ام النور والبابا كيرلس ومارمينا والبابا شنودة والقديس لوقا الطبيب والقديسة سانت ريتا والملاك ميخائيل وقديس وشفيع كنيستنا الانبا رويس وكل القديسين والقديسيات والانبياء والرسل والملايكة , شكرا بجد لكل الناس الى صليت وببركة القديسين وصلواتكوا تخف خالص والى حصل ميكنش لية اى اثر بعد كدة
24 - 01 - 2013, 02:32 PM
رد: معجزة عظيمة جدا تحدث مع ابنتى
العرض العادي
