|
 |
 |
 |
|
رقم المشاركة : ( 1 )
11 - 01 - 2013, 03:23 PM
|
|||||||||||
|
|||||||||||
|
شرح الثالوث للأطفال  ثلاثة بس واحد +++++++++++++ لاحظ المعلم توفيق إن أندرو مش بيضحك زي عادته وكان واقف طول القداس سرحان ، حتى أستاذ مينا في مدارس الأحد لاحظ إن أندرو مش بيتكلم ويعلق على الشرح زي ما بيعمل كل مرة وكمان مش بيضحك مع حد من أصحابه ، سأله أستاذ مينا : مالك يا أندرو ؟ قاله : لأ يا أستاذ مينا مفيش حاجة ، سلام أستاذن أنا دلوقتي ، ومشى أندرو وهو فاتح عينه وسرحان خالص وغرقان في التفكير . المعلم توفيق اتصل بأستاذ مينا وسأله : هو أندرو ماله حد مزعله في مدارس الأحد ؟ أستاذ مينا قاله : إيه ده يا معلم توفيق هو حضرتك كمان لاحظت ؟ اتفق المعلم توفيق وأستاذ مينا إنهم يروحوا لأندرو في البيت مع أبونا يوحنا علشان يفتقدوه ويشوفوه ماله ... أبونا يوحنا : مالك يا سي أندرو سمعت إنك مش بتتكلم مع حد ولا بتضحك زي عادتك ، هو في حد في الكنيسة مزعلك أو مضايقك ؟ أندرو : لا يا أبونا ، مفيش حد مزعلني ولا حاجة . أبونا يوحنا : طيب أمَّال في إيه ؟ أندرو : أصل يا أبونا يوحنا ، أنا حصلت حاجة غريبة عندي في المدرسة ، واحد صاحبي في الفصل لقيته بيقوللي إن إحنا في الكنيسة بنعبد تلات آلهة ، الآب والإبن والروح القدس ، وإن مفروض يكون الله واحد بس ، ولما قولتله إن إحنا بنعبد إله واحد وبنقول باسم الآب والإبن والروح القدس . إله واحد آمين ، قعد يضحك ويقوللي إزاي يعني تلاتة يبقوا واحد ؟؟ وأنا ماعرفتش أرد عليه يا أبونا .. أبونا يوحنا : هو ده بقى اللي شاغل تفكيرك ومخليك سرحان كده على طول يا أندرو ؟ أندرو : ما هي حاجة تلخبط فعلاً يا أبونا .. أنا في القداس باسمع المعلم توفيق بيقول في قانون الإيمان بصوت عالي "بالحقيقة نؤمن بإله واحد" ، وفي مدارس الأحد أول ما نبدأ الدرس أستاذ مينا بيرشم الصليب ويقول "باسم الآب والإبن والروح القدس" وبعد كده يقول "إله واحد آمين" إزاي تلاتة ويبقوا واحد ؟! أبونا يوحنا : لو إنت يا أندرو قاعد في جنينة ولقيت نملة معدية في الأرض وحبيت إنك تكلمها عن نفسك وعن الحاجات اللي انت بتحبها ياترى النملة هاتفهم حاجة ؟ أندرو : لا طبعاً يا أبونا .. أبونا يوحنا : ليه ؟ أندرو : علشان هي ماعندهاش العقل الكبير اللي يفهمني . أبونا يوحنا : يعني انت الفرق بينك وبين النملة كبير ؟ أندرو : أكيد أبونا يوحنا : طيب الفرق بينك وبين ربنا قد إيه ؟ أندرو : ده كبير جداً جداً . أنا مرة سمعت إنه ماينفعش نحط ربنا ده كله في مخنا الصغير زي ما هو ماينفعش وأنا بلعب في البحر إني أنقل البحر الكبير جوه جردل اللعب الصغير بتاعي .. أبونا يوحنا : يعني أكيد في حاجات كتير عن ربنا إحنا مش هنقدر نفهمها كويس علشان ربنا طبيعته أعظم مننا ؟ أندرو : صح يا أبونا .. أبونا يوحنا : ولكن بالرغم من إن الكلام عن ربنا ده صعب إحنا ممكن نلاقي أمثلة في حياتنا تفهمنا الموضوع شوية وتسهله علينا . أندرو : أمثلة زي إيه كده يا أبونا يوحنا ؟ أبونا يوحنا : الاقي عندك شمعة ؟ أندرو : طبعاً يا أبونا أبونا يوحنا : طيب هاتلي واحدة وخليها منورة ، النار اللي في الشمعة دي جسمها لونه إيه ؟ أندرو : أصفر أبونا يوحنا : ولو قربت منها بتحس بإيه ؟ أندرو : بحرارة وسخونية ممكن تلسعني أبونا يوحنا : طيب لو حطيناها في أوضة ضلمة بتعمل إيه ؟ أندرو : بتنور أبونا يوحنا : طيب ممكن يبقى عندنا نار عبارة عن لهب أصفر بس من غير حرارة ونور ، ونار تانية تدينا حرارة من غير نور وجسم ، ونار تالتة تدينا نور من غير حرارة وجسم ؟؟ أندرو : لا طبعاً . لازم التلاتة يكونوا موجودين مع بعض . أبونا يوحنا : طيب ودول يبقوا تلات نيران ولا نار واحدة . أندرو : نار واحدة طبعاً يا أبونا .. ما هي شمعة واحدة قدام قدسك أهي . أبونا يوحنا : يعني النار يا أندرو مكونة من لهب اللي هو جسمها الأصفر ده & حرارة بتلسعني & نور بينور الضلمة ، ومع إن دول 3 حاجات لكنها نار واحدة . أندرو : صح يا أبونا . أبونا يوحنا : ربنا يا أندرو كمان هو تلات أقانيم وكلمة أقنوم معناها "شخص مانقدرش نفصله عن التاني" ، اللي هما الآب والإبن والروح القدس والتلاتةدول هما مع بعض إله واحد مش تلاتة ، وماينفعش نفصلهم عن بعض وما ينفعش يبقى الآب موجود من غير الإبن والروح القدس ، ولا الإبن يبقى موجود من غير الآب والروح القدس ، ولا الروح القدس يبقى موجود من غير الآب والإبن . المعلم توفيق : قدسك فكرتني بحاجة تانية يا أبونا .. أبونا يوحنا : قول يا معلم توفيق . المعلم توفيق : الشمس اللي موجودة في السما دي ، مكونة من تلات حاجات برضو : قرص الشمس المدور الموجود في السما + شعاع النور اللي بيوصل لغاية بيوتنا وبينورها + والحرارة اللي بتلسعنا في الصيف وبتنشف الهدوم اللي بنغسلها ، وبالرغم من كده التلات حاجات دول شمس واحدة مش تلات شموس .. أستاذ مينا : أيوه يا معلم توفيق وما ينفعش نفصل النور والحرارة عن الشمس ، وماينفعش يبقى عندنا شمس ومفيهاش نور ولا حرارة .. علشان كده إحنا مش بنقول إن 1+1+1= 1 لكن بنقول إن 1×1×1= 1 أندرو : كلام قدسك ده يا أبونا وكلام المعلم توفيق وأستاذ مينا خلاني آخد بالي من حاجة غريبة جداً ... أبونا يوحنا : قول يا أندرو .. أندرو : أي إنسان فينا كمان مكون من تلات حاجات منقدرش نستغنى عن أي حاجة فيهم .. الجسم بتاعنا & العقل اللي بيخللي كل حاجة في جسمنا تشتغل & الروح الموجودة جوانا وبتطلع عند بابا يسوع لما بنموت ، وماينفعش انسان فينا مايبقاش فيه أي حاجة من ال تلات حاجات دول ، ومع إنهم تلات حاجات لكنهم كلهم إنسان واحد مش تلاته . أبونا يوحنا : برافو يا أندرو ، إنت كده فهمت سر الثالوث القدوس ، وإن الله واحد لكنه تلات أقانيم الآب والإبن والروح القدس ، ومع إنهم تلاتة لكنهم كلهم مع بعض هما الله الواحد . أندرو : وكمان يا أبونا أنا عرفت إن ايماننا المسيحي ما فيهوش كلام غريب ، لكن كل حاجة ليها شرح بس إحنا المهم نسأل علشان نفهم . دلوقتي أنا فهمت اللحن اللي بيقول .. ثالوث في واحد وواحد في ثالوث الآب الإبن والروح القدس ++++++++++++++++ ملحوظة هامة للخادم : لا يوجد مثال يعبر عن طبيعة الله بشكل كامل ولكنها أمثلة نستخدمها لتقريب الموضوع خصوصاً للأطفال فالأقانيم ليست أجزاء يتكون منها الله لأنه غير مركب كالإنسان ، وليست مجرد صفات لله لأنها تدخل مع بعضها في علاقات الحب والشهادة والإرسال والحوار ... 
|
 |
|
العرض العادي
