ادخل هنا قبل ان تشتري اي قطة

[Mary Naeem]

ادخل هنا قبل ان تشتري اي قطة

لو انت تريد تربي قط فيه اشياء لازم تنتبه لها

اولا :

المكان اللي راح تشتري منه البزون :

لازم يكون مكان معروف و نضيف حتى تتأكد من صحه و نوع القط الي راح تاخذه
لان المحلات الغير معروفه تبيعك قطط مريضه او تبيعك نوع رخيص على انه اجود الانواع و تغشك
و لازم انته تكون عارف امور عن القطط قبل لا تروح لاي محل معروف ولا لا لانه فيه ناس
ما يخافوالله و عادي عنده يكذب

ثانيا:

القط اللي راح تشتريه :

لازم تكون مقرر من الاول شنو هي جنس و صفات القط اللي تريده
ذكر ولا انثى ...؟
ابيض ولا اسود...؟
لون عيونه ....؟
شيرازي ولا امريكي ...؟
...إلخ ، اذا اخترت كل شي و رحت لمحل بيع الحيوانات اكيد راح تشوف قطط كثير كلهم حلوين
بس انته لا تاخذ اللي عاجبك شكله خذ القط اللي انته مستعد تعيش وياه العمر كله و الافضل انك تاخذ كيتين (قط صغنون من شهرين ل 3 شهور مو اكثر )
و اذا شفت قط و حسيت انه هو القط المناسب اطلب انك تشيله و تلعب وياه شوي مشان تشوف شخصيته
و صحته فممكن يكون مريض بفطريات او حصوات بالمعده ..
او ممكن هو تكون شخصيته ما تتناسب مع شخصيتك مثلا انته لعوب و هو كسول او انته تحب
يكون عندك قط يجلس وياك طول اليوم بس هذا القطقوط يحب اللعب و حركي و فضولي فحرام تتركه يلعب لحاله او انته طول اليوم وراه وراه وين ما يروح راح تتعب
و اهم شي لا تروح تشتري بزون و انته مستعجل او تكَول ما لقيت إلا هذا شسوي لانك لو سويت جٍذي راح تندم
و تتعب في التعامل ويا البزون

ثالثا:

تعود قطك على اهلك و البيت :-

اول شي انته راح تكون مجهز له الاغراض الليتر بوكس و البيت المخصص لنومه و صحن الاكل و صحن الماي
في مكان محدد ما تغيره لانه القط راح يتعود على هالاماكن ...
بعد جٍذي اتركه يمشي بالبيت براحته لا تشيله او تلمسه انته او أي احد اتركوه يتعرف ع البيت و ع الغرف و الاشخاص بحاله لانه لازم يعرف كل جزء بالبيت
بعد ما يكون عرف كل البيت و كل الاشخاص هو بنفسه راح يجلس وياكم او يروح يجلس ع الكنبه او ياكل يعني خلاص راح يعيش عادي يعني انته تقدر تعيش وياه طبيعي
في اول الايام بعض القطط ما تتعود ع الناس بسرعه احيانا اسبوعين او شهر حتى انته تجيب لها الاكل و تنضف لها الليتر بوكس بس ما تتعود عليك
اصبر عليها ولا تصرخ في وجها اذا تعبت منها و لا تخلي الصغار يمسكوها او يلاحقوها
لانو لو صار جٍذي راح تتعقد و تتعب نفسيتها و تكرهكم

رابعا:

نصائح اثناء حياتك ويا البزون :

البزون راح يكون عندك مثل روحك الثانيه مثل اخوك مثل صديقك القريب منك :-
ولانه غالي عليك لازم تهتم بتنضيف الليتر بوكس و تقديم ماء نقي يوميا و تعتني باكله لا تقدم له نوع واحد
ولا يكون قديم واهتم بنضافه البزون و تحميمه
و لازم ما تجرحه او تكسر خاطره عشان أي احد ما يستاهل
و حاول انك تفهمه و تعرف شنو يريد و مع الوقت اذا حبيتها راح تفهمه بمجرد تشوف عيونه
و اذا اخطاء لا تعاقبه بعنف او رش الماء عليه لانه يخلي البزون يكرهك و ما يحب يقرب منك ولا من المكان اللي انته فيه
افضل طريقه لتاديبه هي انك تقول له (( لا )) او (( عيب )) او (( لا تسوي هيجٍ )) بنبره حاده باين فيها الغضب
مو متعلم من اول مره بس انته اصبر عليه هو مثل البشر يحتاج وقت مشان يتعلم
و بالنسبه للطوق لا تلبسه الطوق إلا اذا كنت رايح وياه لمكان تتمشوف ولا طلعتاه في الحوش بس
في البيت لا لان صوت الجرس يضايقه ...
بس انتبه تطلعه برا و انت ما لبسته الطوق لانه احمال يضيع فلو ضاع صوت الجرس يدلك ع مكانه
و التعليقه اللي في الطوق (تكتب عليها رقم موبايلك ) لو لقى احد البزون يتصل عليك
و يكَول لك ان بزونك عنده فتجي انته تاخذه
و اذا ما عندك طوق جيب أي شريطه او أي خيط و حط بيه جرس و تعليقه او أي شي تقدر تكتب عليه
و اكتب أي وسيله تواصل و يكون عندك طوق
( و ان شا الله قريب منزله موضوع شلون تسوي طوق مثل اللي يباع في محلات الحيوانات ...
بس تيجي الكمره ^_^ )
و الله يخلي لكم حيواناتكم سواء بزونات ولا لا