مطلوب منك تخلي إبنك عارف هو مين

[Ramez5]

"إنت ممكن متقدرش تمنع الناس إنها تكسر فى ابنك… لكن مطلوب منك تخليه عارف هو مين كل ما حد يحاول يقنعه بعكس ده."

لما ابنك يرجعلك محبط وبيقولك:
"أنا غبي… المدرس قال إني مش بفهم."

ماتردش بسرعة:
"لأ يا حبيبي إنت مش غبي!"
لأن ساعات الطفل بيكون صدّق الكلام خلاص.

اعمل حاجة أذكى… فكّره بنفسه. ❤️

قوله:
"فاكر من كام سنة لما كنت بتلعب بالمكعبات، والبرج كل شوية يقع؟
كل مرة كنت بتغير طريقة البناء لحد ما عرفت تعمله من غير ما يقع؟
فاكر إنك وقتها قعدت تجرب كذا طريقة ومبطلتش؟"

"ده اسمه إنك بتفكر وبتتعلم من محاولاتك.
ممكن تكون مش فاهم حاجة معينه دلوقتي…
ممكن تكون غلطت…او لخبطت شويه
لكن ده مش معناه إنك غبي، ده معناه ان الطريقه دى منجحتش وممكن نحاول بطريقه تانيه

وخلي عندك بنك ذكريات لابنك

موقف نجح فيه.
مشكلة حلها.
حاجة اتعلمها بعد محاولات.
موقف كان شجاع فيه.
حاجة ساعد فيها حد.

لأن اليوم اللي حد يقول له:
"إنت سئ ."

ممكن جدًا يصدق ده عن نفسه

لكن لما يكون جواه عشرات الذكريات اللي بتقول له:
"أنا أقدر… أنا بتعلم… أنا نجحت قبل كده."

كلام الناس مش هيكون أقوى من صوته الداخلي. ❤️

خليك مخزن لذكريات نجاح أولادك…
يمكن في يوم يحتاجك تفكّره هو مين.

[Mary Naeem]

موضوع مهم
ربنا يباركك