​خليك زي أحيور بطل في "كلمتك"

[walaa farouk]

أحيور العموني"
(الراجل صاحب كلمة الحق ) 🛡️🗣️

​البطل اللي علمنا إن "الشهادة للحق"
مش محتاجة تصريح دخول، دي محتاجة قلب شجاع مبيخافش من جبروت البشر.

​وقبل ما نبدأ، لازم نعرف إن حكايتنا النهاردة جاية من "سفر يهوديت"،
والسفر ده هو واحد من "الأسفار القانونية الثانية"

وهي أسفار غالية جداً ومملوءة بالوحي الإلهي
والقصص اللي بتبني الإيمان، والكنيسة بتعتز بيها جداً.

​الحكاية بدأت لما "أليفانا" القائد الجبار، جمع جيوشه عشان يهد الأرض كلها،
ووقف قدام أسوار "بيت فلوى" وهو مش فاهم سر صمود الشعب ده،
فجمع قادة المؤابيين والعمونيين وسألهم: "مين الشعب ده وإيه سر قوته؟".

​وقتها ملقاش حد يتجرأ يرد بصدق
غير "أحيور" قائد بني عمون، اللي وقف وقال كلام زي السيف: 👇🏻
«فَاسْمَعْ يَا سَيِّدِي لِكَلِمَةٍ مِنْ فَمِ عَبْدِكَ، فَأُخْبِرَكَ بِالْحَقِيقَةِ عَنْ هذَا الشَّعْبِ
... إِنَّهُمْ مَا دَامُوا لَمْ يُخْطِئُوا إِلَى إِلهِهِمْ فَإِنَّ خَيْرَهُمْ مَعَهُمْ، لأَنَّ إِلهَهُمْ يُبْغِضُ الظُّلْمَ.»
(يهوديت 5: 5، 21)

​أحيور محسبهاش بالورقة والقلم،
ولا خاف على رتبته العسكرية.
حكى له قصة الشعب من أيام إبراهيم لحد خروجهم من مصر،
وأكد له إن سرهم في "علاقتهم بربنا".

​طبعاً الكلام ده معجبش القادة اللي حوالين أليفانا،
وبدأوا يستهزئوا بيه ويقولوا: 👇🏻
«فَلَمَّا أَتَمَّ أَحْيُورُ هذَا الْكَلاَمَ، غَضِبَ جَمِيعُ عُظَمَاءِ أَلِيفَانَا وَقَالُوا لِيَقْتُلُوهُ..
مَنْ هُوَ الإِلهُ إِلاَّ نَبُوخَذْنَصَّرَ؟»
(يهوديت 5: 26)

( يهوديت 6: 2 )

​أليفانا قرر يعاقب أحيور بطريقة وحشية،
قال له: "بما إنك تنبأت إن إلههم هيحميهم،
فأنا هرميك وسطهم،
وعشان لما أدخل المدينة بالسيف، تموت إنت
كمان معاهم!".👇🏻
فَإِنَّا إِذَا ضَرَبْنَاهُمْ كُلَّهُمْ كَرَجُلٍ وَاحِدٍ،
فَحِينَئِذٍ أَنْتَ أَيْضاً تَهْلِكُ بِسَيْفِ الأَشُّورِيِّينَ وَجَمِيعُ إِسْرَائِيلَ يَهْلِكُونَ مَعَكَ»
وَحِينَئِذٍ يَمُرُّ سَيْفُ جُنُودِي فِي جَنْبِكَ.»
(يهوديت 6: 3 ، 4)

​أحيور اتسلم ليد بني إسرائيل وهو مربوط،
وحكى ليهم كل اللي حصل في معسكر العدو. وهنا بنشوف عظمة ربنا،
إن "كلمة الحق" اللي قالها أحيور كانت هي "الحقنة"
اللي جددت الأمل في قلوب الشعب المحاصر.

​ولما يهوديت قامت ببطولتها ورجعت برأس أليفانا،
أحيور كان أول واحد "اتعرف" على عمل ربنا، والكتاب بيوصف لحظة إيمانه: 👇🏻
«فَلَمَّا رَأَى أَحْيُورُ الْقُوَّةَ الَّتِي أَظْهَرَهَا إِلهُ إِسْرَائِيلَ، تَرَكَ مَذْهَبَ الأُمَمِ وَآمَنَ بِاللهِ،
وَاخْتَتَنَ وَضُمَّ إِلَى شَعْبِ إِسْرَائِيلَ.»
(يهوديت 14: 6)

​تخيلوا.. بطل ظل، بدأ كقائد في جيش عدو، وانتهى كفرد غالي في شعب ربنا،
كل ده عشان رفض "يجامل"
على حساب الحق.

​طيب الحكاية دي بتقولنا إيه النهاردة؟
أحيور هو رسالة لكل واحد فينا بيتحط في موقف "إحراج" أو "ضغط" عشان يداري الحقيقة.

ربنا بيقولك من خلال "سفر يهوديت"
"متخافش من أليفانا بتاع النهاردة، لأن كلمتك الصادقة هي اللي هتنتصر في الآخر".

​بطولة أحيور بتعلمنا إن ربنا بيحترم جداً "الأمانة الفكرية"،
وإنك لما تشهد للحق، ربنا هو اللي بيتولى حمايتك،
حتى لو كنت في قلب معسكر الأعداء.

​ربنا عاوز يقولك: "أنا سامع صوتك وأنت بتدافع عن المظلوم،
وأنا شايف وقفتك قدام الغلط في شغلك أو في عيلتك.. إنت عندي بطل".

​خليك زي أحيور، بطل في "كلمتك"
وشاهد للحق مهما كان التمن،
وافتكر دايماً إن ربنا بيحول "القيود" لـ "أكاليل" في الآخر.