انتبه لا تفقد رسائل احلامك...

[لمسة يسوع]

انتبه
لا تفقد رسائل احلامك...

١٤ لكِنَّ اللهَ يَتَكَلَّمُ مَرَّةً، وَبِاثْنَتَيْنِ لاَ يُلاَحِظُ الإِنْسَانُ. ١٥ فِي حُلْمٍ فِي رُؤْيَا اللَّيْلِ، عِنْدَ سُقُوطِ سَبَاتٍ عَلَى النَّاسِ، فِي النُّعَاسِ عَلَى الْمَضْجَعِ. (أيوب ٣٣: ١٤، ١٥)

واحدة من الطرق القوية جدا اللي الرب بيكلمنا بيها هي من خلال الأحلام بالذات لما تكون شاعر انك مشوش وحواليك دوشة عالية لكن مصمم انك تسمع صوت الرب ليك لقرار او تحرك او لموسم جديد في حياتك.

فالأحلام هنا من افضل الطرق اللي الرب بيخترق بيها حاجز ذهنك وحروبك والدوشة ويوصل بيها لقلبك.

الاحلام مهمة جدا وكل فترة بحب اتكلم عنها لانها بتحمل رسائل واعلانات عميقه لينا من الرب.

زي إعلان جديد تقف بيه، تنبيه لثغرة ، مفاتيح لحسم حروبك، واوقات بيحصل حسم لبعض الحروب في الأحلام لو انت مدرك قوتها وفاعلية سلطان انسانك الروحي في وقت النوم.

وتوصل لحد زيارات مغيرة تماما لمسار حياتنا، ومنها الرب بيستخدمنا فيها ونتنقل بالروح لأشخاص محتاجين سندة، وتكليفات تمنح لينا في الاحلام من الرب لزمن جاي.

لكن العدو عارف كويس أهمية الأحلام وبيحاول يتدخل فيها، سواء بمحاولة سلبك نومك، احلامك، تنساها، احلام مليانة تفاصيل كتير يبان انها مهمة لكنها وسيلة لتشويشك.

وفي نوع آخر وهو ده اللي بيشوش مؤمنين كتير عن اهمية احلامهم... ممكن يكون عندك حلم فيه رسالة نبوية من الرب (بمعنى بتحمل رموز) والعدو يحاول يتدخل في نفس الحلم بتفاصيل غريبة تخليك تقول ان الحلم كله مش من الرب ومتديش ليه اهمية.

ابراهيم الرب بيتكلم معاه وأوقع عليه سبات علشان يكلمه عن مستقبل نسله في أرض مصر (حلم نبوي) لكن في نفس الوقت كان العدو بيحاول يقاطع الإعلان اللي بيستقبله ابراهيم ، علشان كده بيقول في نفس الآية ان في رعبة مظلمة وقعت على ابرام.

وَلَمَّا صَارَتِ الشَّمْسُ إِلَى الْمَغِيبِ، وَقَعَ عَلَى أَبْرَامَ سُبَاتٌ، وَإِذَا رُعْبَةٌ مُظْلِمَةٌ عَظِيمَةٌ وَاقِعَةٌ عَلَيْهِ. (التكوين ١٥: ١٢)

الرعبة المظلمة دي ممكن يكون اشكالها كتير ، واللي يبطل تأثيرها طلبك ان الروح القدس ينبهك للأحلام اللي منه والأجزاء اللي فيها هو بنفسه بيتكلم ليك، وانك تطلب من الروح القدس ان إيمانك وإدراكك يكونوا فعالين حتى في وقت النوم.

ملاحظة مهمة...
محدش يبعتلي احلام من فضلكم. 🙂🙏🏻

[Mary Naeem]

رووووووووووعة
ربنا يفرح قلبك