القصة للصغار و المعنى للكبار

[Marina Greiss]

فى بلد بعيدة من البلاد اللى بيغطيها الثلج معظم السنة بلونه الأبيض الناصع كان فيه قطة عايشة مع أولادها الثلاثة ،و كانت القطة و أولادها لونهم إسود لامع و فى يوم من الأيام كانت ماما القطة نايمة فخرجوا القطط الصغيرين يلعبوا شوية فى الثلج .
و كانوا مبسوطين جداً و هم بيعملوا كور من الثلج و يحدفوها على بعض و شوية وابتدى الثلج ينزل و هم لسة مستمرين فى اللعب و حبة حبة ابتدى الثلج يغطيهم شوية شوية لحد ماغطاهم كلهم و أصبح لونهم ابيض ناصع البياض بس عنيهم هى اللى بتبرق و أخيراً تعبوا من اللعب و قرروا يروحوا و أول ما وصلوا و خبطوا على الباب طبعاً ماما فتحت و سألتهم ايوة عايزين إيه ؟ و أنتم مين ؟ قالوا لها إحنا ولادك يا ماما فردت عليهم باستغراب و قالت لهم لأ أنا أولادى لونهم مش كدة ولادى لونهم إسود لامع زى الليل يللا إمشوا إطلعوا برة و فعلآ خرجوا القطط و هم زعلانين قوى و مش عارفين ليه ماما عملت كدة و فضلوا برة البيت لحد الشمس ماطلعت و ساح الثلج و رجع لونهم الإسود الزاهى تانى و بعدها رجعوا لماما تانى و إعتذروا لها و سامحتهم .
أشكرك ياربى يسوع لأنى رغم إبتعادى عنك و إنغماسى فى الخطية اللى بتشوهنى و تفقدنى طهرى و نقائى و تخللى حتى أقرب الناس لى يتخلوا عنى إلا إنك إنت اللى بتدور على و تمد لى إيدك و تقول تعال إرتمى فى حضنى و إحتمى فى دمى و أنا هاغفر لك خطيتك و أرميها فى بحر النسيان و أرجع لك براءتك الأولى ، ً يا أبويا على محبتك لى .