زوادة اليوم: أهميِّة الوقت : 7 / 2 / 2025 /

[souad jaalouk]

زوادة اليوم:
أهميِّة الوقت


بيخبرو عن معلمة، قرَّرِت تعمل إختبار لتلاميذها، ومن خلال هالإختبار، تفهِّمُن إنّو الوقت مهمّ.

جابت مرطبان إزاز، وعبِّتو صخور حتَّى انتلا، وسألتهن :

«برأيكُن المرطبان مليان أو لأ؟»

وكلّن جاوبوها بصوت واحد:

«مليان».

حتَّى تقلُّن إنّو جوابُن غلط، جابت كيس متلان بحص زغير ورفيع، وفضِّتو بقلب المرطبان.

وفاتت البحصات بين الصخور وعبِّت الفراغات يلّي كانت موجودة.

من جديد، بتسأل المعلمة :

«هلأ انتلا المرطبان برأيكُن؟»

جاوبوها: «يمكن لأ».

ضحكت المعلمة من الجواب، وشالت كيس من الرمل وصبِّتو بالمرطبان، حتَّى انتلا كلّ الفراغ الموجود بين الصخور، وسألِتُن :

«وهلأ انتلا المرطبان؟»

كل التلاميذ قالو لأ.

وحتّى تأكِّد ع جوابن، جابت قنّينة مَي وفضِّتها بالمرطبان حتّى صارت المي تشرشِر مِنّو.

سألتُن المعلمة :

«شو تعلَّمتو من هالتجربة؟»

ردّ تلميذ وقال :

«مهما كان في عنّا أعمال بالنهار منضلّ قادرين نلاقي وقت لأعمال تانية».

جاوبت المعلمة وقالت :

«صح بس لازم نحط بالأوَّل الصخور الكبيرة يلّي هيّي الأعمال الأساسيِّة، وبعدين منحُطّ كلّ الأعمال الباقية».

الزوّادة بتقلّي وبتقلَّك :

«الصخور الكبيرة هيّي هدفنا الأوَّل بالحياة، لازم نحطها بأوَّل درجة حتَّى نقدر نحقِّقها، وبعدين منحطّ كلّ الأعمال التانية، حسب أهميِّتها وحجمها.
والله معكن.

[walaa farouk]

ميرسي على زوادة اليوم
ربنا يبارك خدمتك

[Mary Naeem]

شكرا على الزوادة
ربنا يفرح قلبك

[souad jaalouk]

الف شكر على مروركما الغالي أختاي الحبيبتان ولاء وماري