أوقات بنكون مجرد خدم في القصة

[walaa farouk]

معجزة عرس قانا_الجليل
المعجزة دي مش مجرد قصة عن تحويل الماء إلى خمر..
تعالى نركز أكتر على دور الخدم في الحدث ده..

1- الطاعة العمياء:
الخدم كانوا أول ناس يشوفوا المعجزة بتحصل قدام عينيهم..
لكن فى البداية هم ممكن يكونوا حسوا إنهم تعبوا وملّوا الأجران الستة بالمية على طلب غير مفهوم..
يمكن فكروا: "ليه؟ إحنا في وسط فرح!! واللي ناقص مش المية أصلاً!!"..
ومع ذلك عملوا المطلوب من غير جدال..

2- الإيمان في المجهول:
يسوع ما قالش للخدم إيه اللي هيحصل..
كل اللي قاله: "امْلأُوا الأَجْرَانَ مَاءً." (يوحنا 2 : 7)..
الخدم نفذوا الكلام بثقة..ومع أول خطوة شافوا إيد ربنا بتشتغل..
الإيمان ده هو المطلوب في حياتنا: إننا نطيع حتى لو مش شايفين الصورة كاملة..

3- المعجزة بتبدأ من إيدينا:
المسيح ما طلبش حاجة خارقة من الخدم..
طلب منهم يحضروا اللي متاح عندهم: المية البسيطة..
فمن خلال الحاجات اللي في إيدينا..ربنا بيعمل الأعظم..

4- الخدم شافوا قبل الكل:
الغريب إن الضيوف وكبير المتكأ مكنوش عارفين إيه اللي حصل بالظبط..
لكن الخدم كانوا شهود على المعجزة..
الطاعة والصبر والإيمان خلّوا عيونهم تشوف إيد ربنا وهي بتغيّر الطبيعة..

المعجزة دي بتقولنا إن حتى لو دورنا صغير..
لو نفذنا اللي علينا بالإيمان..ربنا هيشتغل من خلالنا..
أوقات بنكون مجرد "خدم" في القصة..
لكننا بنكون أول ناس يشوفوا النعمة وهي بتتجلى..

"أعمل اللي تقدر عليه..وسيب الباقي على ربنا"..