محدش فينا عايز يأذى اللى حواليه بأسلوبه (وخاصة لو بيحبهم)
المشكلة لما يكون اسلوبك جارح او منفر وانت مش واخد بالك
مش هتكلم عن الاساليب المنفرة المشهورة زى "الغرور" او "الكئابة الدائمة" او "التشائم" او "احباط الاخرين"
دى حاجات واضحة وسهلة التشخيص....يعنى اكيد اللى حواليك هينبهوك عليها او هتسمع تلميحات عنها
هتكلم عن اساليب اقل وضوحا ...يعنى جايز تبقى فاكر انك تمام التمام بس مستغرب ليه بيتضايقوا منك او بيتجنبوك
اليك بعض الاساليب اللى بتدفعهم لتجنبك :
1-الخبير
كلنا مرينا بالموقف ده :
يجى صاحبك يحكيلك ازاى فشل او اتحرج فى الموضوع الفلانى ...تلاقي نفسك_بديهيا_ تصرخ (منتصرا) "مش قلتلللللللللللك" "شووووفت اهو كلامى حصلللللل !" "تستاهل علشان مسمعتش كلامى" "بعد كدة لما اقولك حاجة تعملها"
محدش فينا وهو مخنوق عايز يسمع اى عبارات من النوع ده !
انت فى الحالة دى نسيت انه جايلك علشان تواسيه وتشجعه مش تأكدله ازاى هو عاجز من غير نصايحك !
2-الخلط بين اراءك واراءه ورغباتك ورغباته
وهنا انت بتفترض ان الآخر عنده احاسيس واحتياجات معبرش عنها ...فبتدى لنفسك الحق (الغير شرعى) انك تتكلم بلسانه وتعبر عن احتياجاته
لما تقول للى قدامك "انت محتاج تغير من طباعك"
لو اللى قدامك بيفهم وواثق فى نفسه ومدرك خطأ اسلوبك هيرد عليك ويفحمك "فى الحقيقة انا مش حاسس بأى احتياج فى الموضوع ده ! دى رغبتك انت مش رغبتى انا ...انت اللى محتاجنى اعمل كدة !"
زى الموقف المشهور لما يجى حد يقولك "احنا محتاجين نتكلم" ...الرد "بصراحة انا مش محتاج اتكلم ! اتكلم عن نفسك ...انت بس اللى محتاج نتكلم !"
كلنا بننفر من الشخص اللى بيحط الكلام على لساننا
زى اللى يقولك "اصل انت بستتتقل دمى" و "شكلك مخنوق منى" ....ملكش الحق انك تفترض شعور اللى قدامك نحيتك بمجرد التخمين او الحدس !
يبقى الافضل انك تتكلم عن رغباتك وارائك الشخصية فقط من واضع "انا شايف" او "انا محتاج"
3-الوصاية
"كان المفروض تعمل كذا" "لو كنت عملت كذا مكنش ده حصلك" "لازم تعمل كذا"
لو ده اسلوبك المعتاد والدائم فى جميع المواقف هيكون رد اللى قدامك المعتاد فى سره "والله شيئ عظيم ومعلومات جبارة ! انت نورت المحكمة وانقذتنى من الموت ! يا ريتك تكون معايا بعد كل مصيبة وتقيم كل تصرفاتى"
محدش فينا محتاج مزيد من الابهات والامهات !
انت بتبقى فاكر انك بالاسلوب ده بتساعد اللى قدامك ...لكن غالبا بيتفهم انه شماتة وبيستفزه لانك بتعزز شعوره بالفشل
4-عدم تقبل الرفض
فيه اشخاص مش بتقبل كلمة "لأ" وبتبقى عارف انهم لو طلبوا منك طلب وموافقتش هيعملوا مشكلة او على الاقل هياخدوا منك جنب !
محدش فينا بيحب يحس انه تحت سيطرة حد
لو انت من النوع ده ...لازم تعرف ان اللى حواليك متخلقوش علشانك ...ومش ملزمين انهم ينفذولك كل رغباتك ...ومش من حقك انك تغضب عليهم لو قرروا اختيار عمل شيئ لا يتوافق مع اهوائك ...حاول تعود نفسك على تقبل رفض الاخرين بصدر رحب ...امضى قدما حتى لو اضايقت شوية من رفضهم فكر نفسك انهم مش ملزمين بالموضوع ده وان حبهم ليك ملوش علاقة بمدى تحقيقهم لكل مطالبك
5-محاولة تغيير الاخرين
دى مشكلة منتشرة وبالاكثر على وجه الخصوص فى "الثنائيات العاطفية"
اليك البشرى السارة : انت مش مسئول عن تغيير حد غير نفسك !
يا اما تقبلهم زى ما هما يا اما اخرك تأثر عليهم لما انت تتغير (وتصليلهم !) ...محاولتك لتغييرهم بتعكس عدم احترامك لحريتهم وتخطيك لحدودك لانك عايز تسيطر عليهم وتشكلهم وفقا لأهوائك وده مش من صلاحياتك البشرية !
6-الانشغال المفرط بالنفس
ده شخص مشغول جدا بنفسه ومش بيقدر مشاعر الاخرين ...مهما كانت حالتك النفسية هيجى يحكيلك عن بطولاته وامجاده وازاى الناس مدحته ...هيعاتبك دايما انك مش بتسأل عليه ...وهيكون كتير الخصام والزعل لمشاكل تتعلق بعدم اهتمامك بيه ...لو قاعدين فى جروب هيحاول يسيطر على الحديث كله ومسيبش لحد فرصة يتكلم الا ما يقاطعه او يتدخل او يفرض رأيه ...هيستخف بعيوبك ويذكرها على الملأ ويتخذ منها موضع سخرية
7-الضحك فى غير محله
فى شخص بيعتقد _بحسن نية_ان لما حد يكون حزين ويجى يفضفضله ,انه المفروض يخفف عنه بالضحك والفرفشة ...ده شيئ كويس لكن مش فى محله ....الضحك فى الوقت ده لو اتكرر بيترجم على انه استخفاف بمشاعره وقلة تقدير وعدم احساس منك ...فى الوقت ده محدش محتاج نكت ولا مهرجين ...محتاج قلب دافئ متفهم ومعزى ...ويأتى الضحك مؤخرا !
8-احتكار الحقيقة
ودى مشكله غياب ثقافة الاختلاف ...(وغالبا بتكون مؤشر على مشكلة فى الثقة بالنفس وعدم الشعور بالأمان)
انت فى الحالة دى بتفترض انك تمتلك الحقيقة كاملة ...ولا تعطى اى مساحة لأى رأى مخالف ...وان اعطيت بدعوى ايمانك بحرية الرأى بتنوه على ان رأيك هو الصحيح والآخر بالطبع مغلوط !
شخص لا يتقبل النقد ويستميت فى الدفاع عن نفسه ...لما تروح تكلمه عن حاجة مضيقاك منه مش بيدور على حل لمشكة فعلية ولا بيدرس مدى صحة الكلام ...تلقائيا بيدور على دفاع او شماعة ...لازم يبرأ نفسه ...
