زوادة اليوم : الأزهار والأشواك : 9 / 8 / 2024 /

[souad jaalouk]

زوادة اليوم :
الأزهار والأشواك

بيخبّرو عن رِجّال كان عندو جنينة، وكان كتير يهتمّ فيها.

وبيوم من الإيَّام، كان عَم يتفقَّد النباتات والأشجار، بيشوف تحت الدلب نبتة حلوة كتير مش شايف متلها بحياتو.

قرّر يسقيها ويعتني فيها أفضل عناية.

وبعد مرور كَم يوم، قرَّر الرِجَّال يتفقَّد هالنبتة شاف إنّو عاملة براعم جداد حلوين كتير، وكان عندو ثقة إنّو بعد كَم يوم جداد رح بيشوف فيها أزهار حلوة كتير.

بس مع الأسف شاف على جذع النبتة أشواك بشعة كتير، فكّر وقال :

«مش ممكن يكون لزهرة فائقة الجمال هيك أشواك قاسية على جذعها».

وظهرت علامات الإحباط على وِجّو، فلّ بلا ما يسقيها، ورجع بعد كَم يوم شاف البراعم يابسة.

الزوّادة بتقلّي وبتقلّك :

بداخل كل واحد في صفات جميلة زرعها الله فينا من ولادتنا.

ولكن مع الأسف هالصِفات بتِنمى مع الأشواك والخطايا.

مَرّات كتيرة مننصاب بالإحباط ومنهملها وما منسقيها بتِيبَس وبتموت هالصفات قبل ما تفتح ونعرف معنى جمالها المخفي.

خلّينا نعتني بهالأزهار يلّي زرعها الربّ بحقول قلوبنا حتَّى تِنمى وتفتِّح وأكيد ساعتها رح تخفي قُبح كل الأشواك، والله معك

[walaa farouk]

ميرسي على زوادة اليوم
ربنا يفرح قلبك

[Mary Naeem]

في منتهى الجمال

ربنا يباركك