اسكتش السمكتين كوكو وسوسو لعيد الغطاس

[walaa farouk]

لكل الخدام اللى هتجهز لعيد الغطاس
اسكتش السمكتين كوكو وسوسو لعيد الغطاس
ممكن تعملوه فى مدارس الاحد للمخدومين
ويعروفوا معنى عيد الغطاس



كوكو وسوسو سمكتين كبار فى السن وكانوا عايشين فى نهر الاردن
وهما موجودين معانا النهاردة علشان يحكوا لينا ايه
اللة حصل معاهم وايه اللى شافوة !!!!

كوكو : ازيكم يا اصحابى عاملين ايه ؟

سوسو : ياه يا كوكو الرحله من الاردن للقاهرة
صعبه قوى لكن احلى ما فيها اننا اتقابلنا مع الاولاد الحلوين
دول وثانى حاجه اننا هنحكى على احلى يوم مر علينا

كوكو : ياه يا سوسو فكرتينى بيوم جميل , من زمان قوى ايام ما كنت انا وسوسو اطفال صغيرين وكنا بنلعب فى النهر

سوسو : وقتها سمعنا صوت عالى عند شاطى النهر وجرينا بسرعه علشان نشوف ايه اللى بيحصل


كوكو : شفنا واحد لابس وبر الابل وواقف بيكلم الناس بصوت عالى قوى وكان بيقولهم توبوا وليعتمد كل واحد منكم ويعترف بخطاياه لانه قد اقترب ملكوت السموات وعرفنا ان اسمه يوحنا


سوسو : وكان فى ناس كتير كانت بتسمع كلامه وكانوا بيعترفوا بكل حاجه وحشه هما عملوها ويوحنا كان بيعمدهم


كوكو : وفى وسط الناس الكثير شاب فى شاب اول ما وقف امام يوحنا وقتها يوحنا مكنش عاوز يعمدة وقاله : انا اللى محتاج انى اتعمد منك انا مستهلش انى احل سيور حذائك , لكن الشاب رد عليه وقاله : اسمح الان


سوسو : وفعلا يوحنا عمد الشاب ونزله فى الماء واول ما طلع من الماء حصلت حاجات غريبه قوى حمامه جاءت ووقفت على راسه وسمعنا صوت من السماء بيقول : " هذا هو ابنى الحبيب الذى به سررت "


وقتها احنا مكناش فاهمين ايه اللى بيحصل وجرينا على حكيم النهر الكبير ( رورو ) وزوجته الحكيمه ( توتو ) وحكينالهم كل اللى احنا شفناه وسمعناه وهو قالنا !!!


رورو : يا سلام انتم شفتم حاجه جميله خالص انتم عارفين مين الراجل اللى كان بيعمد دة يوحنا ابن زكريا الكاهن واليصابات قريبه السيده العذراء ويوحنا دة الطفل اللى كان فى بطن امه وسجد لما شاف العذراء وقتها اليصابات كرمت العذراء وعرفت انها هتولد الاله


توتو : وعارفين مين الشاب اللى انتم بتحكوا عليه
دة يبقى يسوع المسيح ( الابن ) اما الصوت اللى اتكلم دة يبقى ( الاب )
اما الحمامه اللى ظهرت فدى تشير الى ( الروح القدس )


رورو : وبكده يبقى ظهر الثالوث القدوس الاب والابن والروح القدس
. وبعماد السيد المسيح فى نهر الاردن
يكون قد تأسس سر العماد او المعموديه اللى انتم عارفينها واللى اصحابى اتعمدوا فيها


توتو : بس يارورو فى فرق كبير بين معموديه يوحنا
ومعموديه السيد المسيح اللى احنا بنتعمد فيها دلوقتى


رورو : طبعا طبعا يا توتو فى فرق كبير جدا لان معمودية يوحنا كانت بالماء فقط وكانت لبنى اسرائيل فقط وكانت ترمز للتوبه والايمان بالسيد المسيح الأتى وكانت وقتيه بمعنى ان اللى اعتمد منها لازم يتعمد مرة تانى من معموديه السيد المسيح


توتو : اما معموديه السيد المسيح بالماء والروح القدس وللناس كلها وكمان لغفران الخطايا ودى معموديه دائمه يعنى بتكون مره واحده ولا تتكرر

كوكو : بعد ما سمعت شرح الحكيم ( رورو ) و زوجته الحكيمه ( توتو ) كان عندى اسئله كتير قوى ومن ضمن الاسئله دى : هل السيد المسيح كان محتاج للمعموديه ؟وكان رد الحكيم عليا

رورو : دة سؤال حلو خالص يا كوكو وإجابته : السيد المسيح يا كوكو مش محتاج للمعموديه لغفران الخطايا لانه القدوس البار لكن علشان يتمم الناموس الطقسى القديم وكمان علشان يكون مثال عملى لينا ونعتمد مثله وكمان علمنا درس مهم السيد المسيح كان واقف فى صفوف الناس اللى هيتعمدوا لحد لما جاء دورة ودة بيعلمنا التواضع وإنكار الذات

سوسو : انا كمان كان عندى سؤال : كنت حسه ان الجو برد وكنا فى فصل الشتاء وكانت المياه ساقعه قوى وقلت حرام يوحنا ينزل بابا يسوع فى النهر وهدمه تتبل ويعيا , ليه يا يوحنا ما رشتش بابا يسوع بالمياه ويبقى كده اتعمد ...
وقتها ردت الحكيمه ( توتو ) عليا وقالتلى :

توتو : انا مقدرة مشاعرك يا سوسو لكن كان لازم العماد يكون بالتغطيس مش بالرش علشان لو بالرش مكنش يوحنا هيقف على النهر ولا بتزل الناس 3 مرات ودى بتشير اللى الغسل من الخطايا . واحنا استلمان طريقه العماد من السيد المسيح وجعلناه عيد عظيم عندنا وسمناه عيد الغطاس او عيد الظهور الالهى او الثيؤفانيا
رورو : ومن العادات القبطيه القديمه اكل القلقاس لانه نبات يزرع بدفنه فى الارض ودى اشارة الى المعموديه واننا قد دفنا مع المسيح ونلنا الحياه به , اما وضع الشمع داخل البرتقال تشير الى نور الروح القدس , واكل القصب بطعمه الجميل اشارة الى بركات المعموديه اللى نلناها
❤️❤️❤️