تنبيه خطير للبنات : احترسى من الأيحاءات

روشا الفرفوشه · رقم المشاركة : ( 1 ) 08 - 09 - 2012, 10:33 PM

مكنتش حابب ابدا انوه على موضوع حرج زى ده,هدخل فى الموضوع على طول

فى الفترة الاخيرة لاحظت ان "البساطة" زادت عن اللازم وقلبت"سذاجة" والبنت_على فرض ثبات حسن نيتها_ بتجيب لنفسها كلام وتعليقات وحشة بسبب عدم درايتها

امثلة

اولا :
الكلام المكتوب على اللبس
بنات بتلبس باديهات من غير ما تقرأ مكتوب عليها ايه !
يا جماعة اقروا وركزوا !
لاحظت كذا بنت سواء فى الكنيسة او الكلية لابسة بديهات او بنطلونات او شوزات مكتوب عليها "play boy" او حاطة اللوجو بتاعها "رمز الارنب" , طبعا متعرفش ان ده اسم ورمز اشهر مجلة اباحية فى العالم ! , ارجوكم خدوا بالكم من اى اسم اباحى شبيه او اى رمز شبيه لأن ده بيفتح باب للهمس والكلام اللى ملوش لازمة من اى ولد (اللى اكيد طبعا فاهم الايحائات دى) وجايز البنت تتفهم غلط او تسمع معاكسة متفهمهاش !
نصيحة : ابعدوا بردو عن اى لبس كوميدى او "كاب" ليه علاقة بالارنب !

ثانيا : الالفاظ

بنات بتسخدم الفاط فاكرة انها عادية وهى فى الاصل من اختراع الشباب وليها ايحائات جنسية , مكنتش عايز احدد بس وجب , زى "ألبس" و "لبست" و "بيض" على الشخص الخنقة او "اومليت" حدث ولا حرج عن معناهم !!
لأ واليومين دول بيقولوا "حمرة" عادى جدا ! (ابتديت اشك انه بعضهم فاهمين وعادى بالنسبة لهم !!)
وساعات تستخدم الفاظ انجليزى تبقى فاكرة انها عادية علشان فى ترجمة الافلام بتترجم "سافل" او "سحقا" وهى فى الحقيقة معناها مش محترم اوى كدة !!!
من كام يوم شفت بنات مشيرة على الفيس بوك اخبار مكتوب فيها ايحائات قمة فى السفالة (زى التعليقات والألش اللى طلع ساعة لما بعض المغنيات قالت انا اخوانجية) ! وفرحانة جدا ولا واخدية بالها من حاجة وتعليقها "ههههه" ولو كانت ركزت شوية هتلاقى ان مافيش ولا شاب علق وكان المفروض تفهم ان فيه حاجة فى الألش مش تمام !!

ثالثا :ابليكيشن الفيسبوك

بنات بيشتركوا فى ابليكيشن على الفيس وظيفته انه يبعتلك هدايا او مفاجئات ويشيرها على الوول , مش قادر اقولكم انا كتير بيظهر عندى ان فلانة طلعلها فى "life box" حاجة اباحية من الدرجة الاولى ,وهى طبعا مش فاهمة قامت شيرت سؤال وقالت هو ايه "الحاجة" دى ؟! تخيلوا بقى تعليقات الشباب كانت ازاى وكم الاحراج اللى البنت كانت فيه بعد ما حد احرجها وقالها ايه ده ! والمصيبة اللى محدش يقولها حاجة بقا وتفضل تسأل !!

رابعا :افشات الافلام وايحائات الاغانى

بلاش تكررى اى حاجة تسمعيها فى اى فيلم , معظمها له ايحاء سافل , زى افلام مكى والشباب الجديد , حتى فيلم "بلبل حيران" مسلمش ! , وطبعا فيه اغانى كتير ليها ايحائات سافلة , اغانى لتامر على اغانى شعبية والبنت من دول بتبقى فرحانة بصوتها ولا مركزة فى اى حاجة , ومش قادر اذكر امثلة لأن الايحائات صعبة شوية

خامسا : الكلاكسات

للبنات اللى بتسوق , لما حد بيتخنق من حد اويشد معاه فى السواقة بيدى كلكسات برتم معين , دى مش سنفونية الفرح ولا اعتراض محترم ولا كلكسات عشوائية , دى شتيمة قذرة بلغة السواقين

اسف ان التنبيه غليظ وجايز جرئ وجارح , بس مش قادر اتحمل ان البنت يتعلق عليها من وراها تعليقات مقرفة او يتاخد عنها انطباع مش تمام وهى فى دنيا تانية

لو افتكرت حاجة تانى هكتبها , ولو حد عنده اضافة يا ريت يكتبها

شكرا