هو مش انت اللي اخترت

[walaa farouk]

"هو مش انت اللي اخترت !!"
"استحمل بقى ما انت اللي عملت في نفسك كدة .."

كلام صعب اوي بنسمعه من الناس القريبة لما ننجرح او نمر بأزمة نفسية بسبب اختيار غلط او قرار مش حكيم اخدناه في الحياة ..

عارف وانت بتقول لحد وهو جاي يشتكي وموجوع :
ده اختيارك اتفضل استحمل نتايجه!! يا ما قلت لك مسمعتش الكلام !!
عارف انت بتعمل ايه؟؟
انت وكأنك بتجيب خل وتحطه على جروح الناس !!
كلام مؤذي جدا !!

حتى لما بنختار غلط ولما بناخد قرارت غلط،
لينا الحق اننا نشتكي ونتوجع ونلاقي الحضن والطبطبة
والدعم النفسي من غير لوم ولا تأنيب..

مين فينا مغلطش واختار غلط سواء في قرارت كبيرة مصيرية
او صغيرة ؟؟ مين فينا معصوم من الخطأ؟؟

عايزة اهمس في اذن كل شخص حاسس بالذنب انه اعمل اختيارات غلط ومش قادر يفتح بؤه لا يسمع كلمتين تأنيب:

ليك الحق تشتكي وتفضفض ومش نهاية القصة..
على فكرة حتى ربنا مش مصدوم من قراراتك ولا اختياراتك !!
هو عارف انك كنت هتعمل ده !!
وعنده دائما مخارج وحلول !!
مش واقف يضرب كف على كف ورامي طوبتك!!
تقدر في أي لحظة ترجع وتقوله انا اخطأت الى السماء
وقدامك ومش عارف احلها !!
وهو قادر يستخدم ويحول حتى قراراتك الخاطئة
واختياراتك السيئة لخيرك !!
ويعزيك كمان ومن غير تأنيب ولا لوم!!

صدقني وعن تجربة ..
وحتى نتايج غلطاتك والمصايب اللي انت عملتها مستعد
يشيلها معاك ومش هيسيبك تتحمل لوحدك المعاناة !!
ولا ممكن يقول خليه يشرب .. ده نتيجة افعاله السيئة..
خليه يتعاقب عشان يتربى شوية !!

عارف ليه ؟؟
عشان هو أب كامل.. بار وقدوس..
والأب البار مش ممكن يسيب ابنه او بنته غرقانين
في مصايبهم ويقف ساكت !!

(

[رشا رجائي]

يارب فرحني يارب حللي

[مورا مرمر]

الله هو الغافر وهو اللى بيسند وبيصلح اخطاء كل انسان

شكرا جدا على المشاركة الرائعة دى ي لولو