علمنا نتعامل مع بعض زي ما إنت بتتعامل معانا ❤️🙏

[walaa farouk]

المُلفت في شخصية يسوع
إن ما قريتش في الإنجيل وهو بيقول للناس أنا بحبكم ، أو بيقول لحد من تلاميذه بحبك ،
جايز يكون ده حصل لكن الإنجيل مذكرش ده .
لكن الإنجيل ذكر حاجة أعظم بتترجم الكلمة دي
و هي " تحنن " كان دايماً بيتحنن
وَلَمَّا رَأَى الْجُمُوعَ تَحَنَّنَ عَلَيْهِمْ، إِذْ كَانُوا مُنْزَعِجِينَ وَمُنْطَرِحِينَ كَغَنَمٍ لاَ رَاعِيَ لَهَا." (متي 9: 36).
يعني يشوف حد عنده مرض يحن عليه و يشفيه ..
يشوف حد محتاج يتسمع يقف يسمع مشاكله ..
يشوف واحدة سامرية محتاجة للأمان ومحتاجة حياتها تتصلح يسافرلها مخصوص يتكلم معاها ..
يشوف عيلة بتبكي علي أخوهم لعازر يقف يبكي معاهم ..
يشوف واحد مجروح في الطريق فيكون سامري صالح و ياخده يعالجه علي حسابه ..
يشوف ناس جاعت لإن طول اليوم برة البيت فيقول لتلاميذه هاتوا الخمس خبزات
و سمكتين اللي معاكم علشان نأكلهم ..
يشوف تلاميذه محبطين جداً و نفسهم يجددوا خدمتهم و طاقتهم من تاني
فيروح عند الشاطئ و يعزمهم علي سمك مشوي ..
بعد ٣ سنين خدمة يشوف تلاميذه تعبوا فيجيب المياه و يغسل رجلين تلاميذه ..
يروح للخاطي الزاني اللي تعب من خطيته و المجتمع و رجال الدين بيعايروه ..
يروح يتعشي معاه ( ومعني انك تاكل مع حد علي إنفراد معناها إنك بتحبه و بتقبله )
بيقول له انا بحبك و قابلك بعيش و ملح .
ياااه يا يسوع
كل دي رسايل بتوصلهالنا
علشان كدة الوقت الاخير .. بحس ان ربنا بيوجهني إنك وانت بتتعامل مع الناس
حاول تقلل كلام روحي و تستعمل طرق تانية جنبه ..
خده فسحه .. اتكلم معاه او معاها ..
كلوا حاجة سوا .. صلي لأجله بدموع ..
إعزمه علي حاجة .. دور معاه علي شغل ..
الناس معظمها متألمة و تعبانين من الظروف الصعبة و الضغوطات و الخطية .
. و فيه طرق كتير غير الكلام و أحياناً أقوي من الكلام إستخدمهم مع الكلام
لإن الكلام اللي بالروح له تأثير برضه .. لإن يسوع كلماته لحد النهاردة عايشة
و هتفضب عايشة لأبد و بتغير الناس ..
لكن جنب الكلام فكر في أفعال و تصرفات الرب يسوع .
إنت عظيم أوي يا يسوع
علمنا نتعامل مع بعض زي ما إنت بتتعامل معانا ❤️🙏