ذكاء التعافي

[walaa farouk]

خلينا نتفق إن الخروج من أي أزمة محتاج ذكاء وحكمة
والتعافي من إدمان الإب_احية برضه محتاج ذكاء وصحصحة
يعني مثلا مينفعش تحاول تبطل إدمان من غير ما تعالج
سبب الإدمان في الأساس
(المشكلة الأساسية اللي كنت بتحاول تهرب منها بالإدمان)
علشان ببساطة هيكون سهل ترجع تاني..
لكن بالعكس خليك ذكي وعالج المشكلة الأساسية.
متحاولش تحارب واحد ماسك مدفع رشاش بسكينة السندوتشات!
المهم يعني عمليًا متدخلش أي باب مفتوح أو موارب يخص
عالم الإب_احية على سبيل التجربة وتقول انا هقاوم ومش هتزحلق!
تقاوم ازاي حضرتك نظام كامل متطور وذكي جدًا وتجارة كبيرة جدا
معمولة بأسس مدروسة ومتصممة مخصوص علشان توقع سعادتك
ومتجربة لسنين كتير أوي وتستنى متقعش!
لا للأسف حضرتك هتقع على جدور رقبتك
علشان الحرب دي مش متكافئة!
أخيرا خليك ذكي في فهم نفسك ونقط ضعفك وقوتك
وخليك عارف كويس مداخلك ومفاتيحك علشان تعرف تقاوم
وتحارب حروبك بقوة وذكاء .. يعني مثلا لو عارف عن نفسك
ان قعدتك لوحدك دا هو بداية المشكلة،
تعمد تكلم حد صاحبك، تنزل تتمشى، تروح تطبخ.. اتصرف،
ولو في حاجة معينة بتثيرك تعمد انك تبعد عنها من البداية
وطبعا لو عارف حاجة بتبسطك وبتفرغ فيها طاقتك برضو
اعملها واستثمر في نفسك من خلالها.. وهكذا.