٤ سيدات جه من نسلهم المسيح

[walaa farouk]

عارف سلسلة نسب المسيح؟
اللي موجودة في إنجيل متى الإصحاح الأول
أيوة أيوة اللي أغلبنا مش بنقراها دي 😃

متى الرسول قصد إنه يكتب لنا السلسلة دي
علشان يورينا إزاي المسيح جاي من نسل إبراهيم وداود،
وعلى فكرة متى كان بيكتب إنجيله لليهود،
ودي حاجة مهمة بالنسبة لهم إنهم يعرفوا أصل الواحد
وعيلته وجدوده، وبالنسبة للمسيح ده يعتبر إثبات
لإنه المسيا الموعود بيه في العهد القديم...

متى ذكر كل أسماء الرجالة اللي اتولدوا
من نسل إبراهيم لحد المسيح، لكن الحاجة الغريبة
اللي لفتت نظري إن في وسط زحمة أسماء الرجالة دي
كلها نلاقي أسماء ٤ سيدات جه من نسلهم المسيح..
والحاجة الأغرب إن ولا واحدة منهم
كانت من شعب إسرائيل (شعب الله المختار).

مين هما الـ ٤ سيدات دول؟؟

١- ثامار: دي كانت زوجة الابن الكبير ليهوذا
ابن يعقوب حفيد أبونا ابراهيم،
لكن زوجها مات من غير يخلف منها،
واتجوزها أخوه الأصغر ومات هو كمان،
فيهوذا خاف إنه يجوزها لابنه الأصغر لحسن يموت،
فأمرها يهوذا إنها تسيب بيته وترجع لبيت أهلها
وهو هيجيبها ويجوزها لابنه، لكنه للأسف معملش كده،
فهي عملت حيلة قدرت من خلالها تتجوز من يهوذا نفسه،
وانجبت فارص اللي جه من نسله المسيح.

٢- راحاب: ودي كانت من أهل أريحا،
ووصفها كاتب العبرانيين إنها "زانية"!
ملهاش أي دور بارز في الكتاب المقدس
غير إنها أخفت الجواسيس اللي بعتهم يشوع
علشان يتجسسوا أرض الموعد، وعملت كده لأنها سمعت
إن إله العبرانيين عمل معاهم معجزات
وقت خروجهم من أرض مصر، وقررت إنها تنجو من الموت
هي وعيلتها بإيمانها بيه.. وفعلاً ده حصل،
واتجوزت واحد من شعب الله اسمه سلمون
اللي كان من أجداد المسيح.

٣- راعوث: ودي ليها سفر بالكامل
في الكتاب المقدس بإسمها.. كانت إمرأة أممية
من بلد إسمها "موآب"، ونظرة اليهود للأمم
كانت مش كويسة خالص، لكنها اتجوزت واحد يهودي
وبعد وقت مات، واختارت بعد كده إنها تعيش مع حماتها
رغم موت جوزها.. وقالت لها جملة رائعة جداً:
"شعبك شعبي، وإلهك إلهي"..
وبعد وقت كانت بتجمع سنابل القمح من حقل
واحد اسمه "بوعز"، عارفين مين بوعز ده؟؟
ده كان ابن راحاب، أيوة الست اللي اتكلمنا عنها فوق
شاف راعوث وحبها واتجوزها، وجه من نسلهم المسيح.

٤- بثشبع: ودي كانت زوجة لواحد اسمه "أوريا الْحِثِّي"
واضح من اسمه إنه مكنش من شعب الله...
دَاوُدَ النبي أخطأ معاها وقتل جوزها علشان يتجوزها،
والله عاقبه على خطيته دي... ورغم إن دَاوُدَ كان ليه زوجات كتير
وأبناء منهم أكتر، إلا إن الله إختار إن اللي يملك على إسرائيل
بعده يكون سليمان اللي هو ابن بثشبع،
ومش بس كده، ده كمان المسيح يجي من نسله.
طيب إحنا نستفيد ايه من ده كله؟؟
يمكن كتير بنفتكر إن الله بيستخدم الناس الكويسين،
اللي حياتهم جميلة ونضيفة ومفيهاش حاجة تكسف،
وإنه بيختار للخدمة الشخص اللي الـ c.v بتاعه
مليان بالإنجازات والبطولات الروحية...
لكن الحقيقة إن مبادئ الله وطرقه عكس أفكارنا تماماً
الله دائماً بيختار النوعيات الصعبة،
اللي مفيش منها أمل، المنبوذين من المجتمع اللي حواليهم،
واللي ممكن ميكونش ليهم مكان فيه...
تخيل نظرة الناس للسيدات دول كانت ايه،
ونظرة الله ليهم كان شكلها ايه، وأنت تعرف قيمتك
وغلاوتك عند اللي خلقك، وإن مفيش حاجة فيك
مهما كانت سيئة هتمنعه إنه يباركك ويستخدمك
ويعمل بيك أمور رائعة.. بس أنت صدقه 😊

[بشرى النهيسى]

جميل جدا جدا ورااائع