صلوا لمرضي الاكتئاب دول اكتر ناس بيعانوا

[Mary Naeem]

حقيقي ربنا يكون مع كل حد بيعاني من المرض ده
صعب جدا صلوا لمرضي الاكتئاب دول اكتر ناس
بيعانوا وممكن بالمرض ده يوصلوا للإنتحار
لو مساعدوش نفسهم وعافروا وكملوا مشوار التعافي

بعرف منين إنه الإكتئاب قرّب يمشي.. أو إزاي بحاول اتغلب على الاكتئاب؟

لمّا بحافظ على جرعة الدوا البسيطة الـmaintainanace إللي الدكتور بيوصفها وباخدها.. الاكتئاب بيبقى أهون وأخف شوية ووقته أقل.. من غير جرعة الدوا البسيطة دي الاكتئاب بيضرب بعنف وبقوة وتمنه بيكون صعب وممكن يستمر أسابيع طويلة..
.

لما بحافظ على إني آخد جلسة ثيرابي أسبوعية أو كل أسبوعين وأتكلم مع معالج/ طبيب نفسي..
.
لما بعرّف إللي حواليا إني في حالة الاكتئاب.. ده بيخلي توقعاتهم منطقية مني في الوقت ده ومش بيخلي إللي بيحبوني على الأقل يحملوا عليا.. أنا بعرفهم صراحة إني في حالة الاكتئاب وإني محتاجة دعم..
.
لما بطلب الدعم من غير ما اتكسف.. علشان أحاول أساعد نفسي: " لو سمحتي ممكن أقعد معاكي شوية النهاردة لإني مكتئبة ومحتاجة مساعدة".
.
لما ببعت رسايل للي بثق فيهم.. اقول لهم إني في الاكتئاب وإني محتاجة أي نصائح.. باخد النصايح دي واكتبها في ورقة وبحاول أبص عليها واشوف إيه إللي ممكن ابدأ أعمله علشان أخرج نفسي من الحالة دي "هنا ودلوقتي".
.
بحاول أبذل مجهود علشان استحمى والبس حاجة ملونة وأحط ماكياج.. ده بيكون صعب قوي وعادة القرار ده بياخد يومين تلاتة.. بس أول ما بعرف استحمى والبس.. بعرف إنه فيه أمل..
.
بحاول اشتغل بأي أداء أقدر عليه وببذل مجهود كبير قوي نفسي إني أرد على التيليفون وما أخدش أجازة.. زمان كنت أول ما اكتئب أبطل اشتغل وده كان بيخلي الموضوع اسوأ..
.
بحاول أكتب أي حاجة.. بحاول أكتب عالفيس بوك أو على ورقة حتى مشاعري السلبية إللي حاسة بيها.. ده بيخرّج الألم من جسمي على الأقل.. ساعات بيكون الألم الجسدي ده نتيجة مشاعر سلبية كتير وألم متخزّن..
.
عندي لستة أغاني اسمها "أنا هفرفش نفسي يا كلاب" اللستة دي فيها مجموعة من الأغاني الي فيها أمل ونظرة عميقة للحياة.. أنا مجهزاها علشان لما الاقي نفسي بغرق مع تامر عاشور ومحمد محيي أشغلها.. بسمع الكلام وبقعد أردده بصوت عالي.. بجد مش هزار..
"ولو في يوم راح تنكسر.. لازم تقوم واقف كما النخل باصص للسما"..
"إن شاء الله هتلاقي الطريق"
"كل الجروح ليها دوا.. يا طير يا حايم في الهوا"..
..
بحاول أتلامس مع ربنا باللي بقدر عليه ساعتها.. حتى لو مش قادرة أعمل أي حاجة بحاول إني أبص للسما وأكلم ربنا وأطلب منه المساعدة بقلب صادق..
..
ساعات بحاول أكتب أي حاجة مفيدة للناس حتى لو جملة..وآخد نية إنه ده المساعدة غيري.. ولما بشوف التعليقات الإيجابية.. بحس إني بدأت أتبسط.. ساعات لما بتحس إنك قادر تقدم أي مساعدة ولو بسيطة بترتاح..
..
بحاول إني أخرج أعمل أي حاجة في الشمس ونور ربنا.. أي حاجة من أي نوع.. ساعات أطلب أوبر وأخليه يوديني أي حتة.. أقعد أسمع حاجة في الطريق وأبص على الشارع والناس.. وأمشي خمس دقايق وبعدين أطلبه تاني يروحني.. وفلوسي بتخلص.. المهم أقوم من السرير بأي تمن.. وما أفضلش نايمة عليه بعيط لوحدي..
..
بحاول إني أعمل أي حاجة في البيت.. أول ما أقدر.. ان شالله أغسل طبق حتى.. إن شالله أحط شراب في سبت الغسيل.. الاكتئاب بيقتل الإنجاز.. فلما بحس إنس قادرة أعمل اي حاجة نفسيتي بتتحسن..
..
ممكن اشتري لنفسي أي حاجة من الحاجات إللي عارفة إنها ممكن تساعدني.. عادة بشتري كتاب أحس إنه ممكن يساعدني.. وبقعد أقرأ لوحدي..
..
بتجنب إني أسهر لوحدي بالليل.. الليل مع الاكتئاب هم.. ونور الشمس أفضل.. بحاول أنام بدري بأي طريقة إن شالله حتى آخد منوم بسيط.. وبنام.. علشان أصحى بدري واقول لنفسي بكرة هيكون يوم جديد..
..
بفكر نفسي إني "باي بولار" وإنه المعاناه دي مش هتستمر طول الوقت.. وإنها مرحلة وهتخلص.. وبفتكر الحاجات الحلوة إللي ممكن تحصل لما أعرف أخرج من حالة الاكتئاب..
..
بكتب قائمة بكل الحاجات إللي أنا ممتنة ليها ولوجودها .. وجود ربنا في الحياة معانا وأولادي وأهلي وصحتي وأصحابي وبحمد ربنا على نعمة الوعي..
.
عندي مجموعة أعشاب من امتنان.. بشرب منها.. معرفش هي بتنفع ولا لأ بس أنا بشربها.. زي عشبة للافندر والكاموميل..
..
للأسف يعني ساعات بروح أشرب واحدة "ريد بل".. هي مش حاجة صحية خالص بس أنا بجيب الخالية من السكر وبشرب واحدة كل كام يوم.. ساعات بتديني شوية نشاط وسعادة مؤقتين علشان اقدر أنزل الجيم ولا أمشي.. ساعات والله يتنفع.. فيها شوية مواد عك.. ودي مش نصيحة خالص.. بس أنا بقول كل حاجة بعملها بأمانة..
..
بقرأ عن ثنائي القطب كتير لما بكون مكتئبة.. يمكن علشان أشوف الحقيقة أكتر.. أو علشان ما أحسش إني لوحدي.. عندي كتاب اسمه "عقل غير هادئ" بيتكلم عن دكتورة نفسية عندها بايبولار.. بقعد أقرأ فيه.. فيه كمان رواية اسمها "غوى".. أي حاجة ما تحسسنيش إني لوحدي..
.
بعد ما بتحسن.. بحاول أعصر على نفسي 100 لمونة إني أروح الجيم.. ساعات بروح ما بعرفش أكمل 10 دقايق بس.. وبيبقى شكلي نكد وبنكد على المدربة إللي هناك.. بس هي بتقولي أنا مش عايزاكي تتمرني وإنتي زعلانة كدة.. وبتحاول تساعدني والله.. اسمها "مها" وأنا مش ناسة إنها حاولت تساعدني أتمرن من قلبها..
..
بس ده إللي بعمله عادة علشان أخرج من الاكتئاب.. وده بيساعد إنه المدة بتاعته تقصر.. وحدته تكون أخف..

[بشرى النهيسى]

كلام سليم ةجدا
امين يارب
الرب يباركك