اسوار اريحا بتقول التعب له نتيجة

[walaa farouk]

كل ما تيجى سيرة أسوار أريحا يبقى الكلام عن النصرة
..أسوار عظيمة جبارة انهارت قدام شعب
مهما كان عدده لكن مش معاه أى معدات ممكن تهدم أسوار فوق قدراته.
لكن مكنتش باخد بالى من الفترة الصعبة اللى قبلها .
.أول مرة اخد بالى ان الخطة اللى حطها ربنا مملة ..حقيقى مملة !
7 أيام يلفوا حوالين السور فى صمت تام من غير ما يعملوا أى حاجة ..7 أيام كاملة واخد أقوى رجال الحرب اللى عندك و بتمشيهم حوالين السور من غير ما يتكلموا حتى و لا يطلع منهم أى صوت.
تخيل تبقى راجل حرب يومك من أول الصبح عبارة عن تمرينات و تدريبات حربية و وضع خطط و تكتيكات هجومية و جايلك أمر و وعد انك هتدخل تمتلك الأرض دى و كلك حماس بقى للمعركة اللى هتطلع فبها كل طاقتك و تنتصرو تشوف الوعد بيتحقق..وكل يوم تسأل ياترى هنبدأ امتى ؟ و #يشوع بيصلى و مستنى اجابة من ربنا ..لحد ما الاجابة وصلت ..هه هنهجم عليهم ازاى ؟ ندخل متخفين زى حصان طروادة و لا نستنى يوم السوق أكيد هتتفتح الأبواب و ندخل متنكرين و نعمل كمين من جوه..
و لا نحاوط السور و نعمل هجوم مفاجئ فى نص الليل و نتسلق الاسوار دى.. احنا اتدربنا كويس على كده .

و لا ده ولا ده..احنا هنلف حوالين السوركل يوم لمدة 7 أيام و من غير ولا كلمة و يوم المعركة هنلف 7 مرات و بعدها هنتهتف كلنا و الاسوار هتقع لوحدها .
....... ليه ؟!!!

الصراحة مش هتكسف أقول انها خطة مملة ، ايه اللى بنعمله؟ ولا حاجة بنلف حوالين السور..و لو انت حد بيحب الانجاز زى ، هتعرف ان اى حاجة روتينية ملهاش هدف دى بتقتلك من جوه..ايه علاقة الدوران حوالين السور باننا ندخل ؟ و ايه اللى هيحصل لما نلف ؟ هل ده هياثر على جيولوجية الارض و ثبات الطبقات فتتحرك من مكانها و توقع الاسوار مثلا ؟
و بعدين عارف هيبقى شكلنا ايه قدام جنود اريحا ؟ هيقولوا علينا ايه مجانين مثلا ؟ و يعنى ايه جيش كامل يصحى كل يوم الصبح يلف حوالين السور و يرجع ؟ بأى منطق ؟ طيب خد عينة تحرس الكهنة و ترجع ؟
لكن ليه كلنا ؟
أوقات كتيرة أوى بحس اننا بنلف فى دواير مفرغة مش مفهومة .. بتعمل كل اللى عليك و بتحاول بكل قوتك لكن تحس ان ربنا بيلففك فى دوايرملهاش لازمة لدرجة انك تحس انك شوفت نفس الموقف ده قبل كده ..انا كنت هنا قبل كده ، و مع انك حاسس ان ده طريقك فعلا لكن مبتوصلش ..مجهود لكن بلا معنى و بلا نتيجة.
بس أسوار أريحا بتقول ان الحقيقة مش كده..و ان التعب ده ليه نتيجة ..لكن ليه كل ده بيحصل ؟ ليه الخبرات الفاشلة ؟ ليه المشواير اللى ملهاش لازمة ؟
علشان تمرين المحاربين أصعب من النصرة.. الانتصار من بره سهل..و النجاح سهل و ممكن يجى فى لحظة لكن التمرين الممل مش سهل أبدا أبدا.. التكرارو الروتين ممل بس هو الاهم..
#أسوار_أريحا بتقول ان أكيد التعب ليه نتيجة .
.و نتيجة أعظم من مقدار التعب بكتيير..و الوعد هيتحقق ..المهم متزهقش من أيام الدوران علشان دى اللى هتحقق الوعد😊😊