انت بقي فكر ازاي تكون نور و ملح

[walaa farouk]

الراجل ده اسمه Don Ritchie.
الله يرحمه مات في 2012.
لسة متكعبل في سيرته من شوية.
اخترع إيه ولا اكتشف إيه ولا كتب ولا رسم ولا عزف إيه؟
ولا حاجة.
يمكن احسن حاجة في الـ CV بتاعه إنه كان مجند في بحرية أستراليا في الحرب العالمية التانية، "جندي عادي يعني ماخدش نياشين حتى ولا حاجة".
بعد الحرب اشتغل في مبيعات شركات التأمين.
سيرته عادية يعني - لحد هنا.
بس في 2006 بلده إداله The Medal of the Order of Australia.
دون ريتشي كان ساكن على حتة اسمها The Gap (اللي في الصورة دي).
الجُرْف ده مكان مشهور أوي للانتحار ومحاولاته، لدرجة إن المكان اتحط فيه كاميرات مراقبة كمحاولة للحد من الظاهرة دي.
بدءًأ من 1964، ريتشي كان يقضي وقته الفاضي بيتفرج ع البحر.
وأول ما يلقط حد شكله ناوي ينتحر، يقوم بهدوء، يعدي الشارع، ويتكلم مع الإنسان اللي الدنيا قفلت في وشه ده، يفتح الكلام معاه بـ "Can I help you in some way؟"، ويقنعه يرجع معاه البيت يشربوا حاجة سوا ويدردشوا. في بعض الأحيان كان بيحتاج يتدخل بشكل مباشر، إنه يكتّف ويشيل المقدم ع الانتحار بعيد عن السور، عشان يكسب معاه شوية وقت زيادة يقدر يغيّر رأيه في قرار الانتحار.
فالشخص ده ماينتحرش.
ريتشي ما أنقذش عشرة ولا عشرين من وحل اليأس.
العدد الرسمي، الحالات الموثقة المتسجلة يعني، أكتر من 160. وكتير منهم رجعوا له بعد سنين، بعد ما الدنيا ظبطت معاهم شوية، يشكروه على اللي عمله معاهم.
مراته وبناته بيقولوا إن العدد في حدود الـ 400 كمان.
هو ده اللي يتسمّى قديس.
ده اللي يتسمّى "المُحيي" و "النافع".
هو ده نور العالم وملح الأرض.
انت بقي فكر ازاي تكون نور و ملح ؟؟
فتاةسيتي_ستارز
الانتحار