العاب نفسية

[walaa farouk]

خد بالك لو ده بيحصل معاك،
في حاجة في العلاقات اسمها "الألعاب النفسية"
ولو موجودة يبقى العلاقة اللي انت فيها مش آمنة ومش صحية،

الألعاب دي زي:
- لعبة القرب والبعد: إن حد يقرب منك وفجأة يبعد وبعدين يرجع يقرب ويبعد تاني ويفضل مخليك جوة الدايرة دي محتار وبتسأل نفسك انت عملت إيه وفي الحقيقية انت مابتكونش عملت حاجة،
- لعبة التُقل: إن حد يبقى بيرد عليك متأخر وبيتعمد يتجاهلك في أوقات عشان يبقى بيتقل عليك وعاوزك تتعلق بيه أكتر.
- لعبة ردود الأفعال المبالغ فيها: إن الشخص التاني يغضب منك أوي ويديك ردود أفعال أكبر من حجم الفعل الحقيقي.
- لعبة المقارنات: إن الشخص التاني يفضل يقارنك بناس تانية ويخليك طول الوقت تحس إنك قليل.
-لعبة انت السبب: إن الشخص التاني يرمي دايمًا أخطائه على إنك أنت السبب وانت اللي خليته يعمل كده ووصلته كده، والحقيقة إن كل واحد هو المسئول عن تصرفاته وسلوكه مش انت السبب.
-لعبة التلميحات: إن حد يفضل يوصلك رسايل مش واضحة وتفضل تسأل هو بيحبني ولا لا هو يقصد إيه لفترات طويلة مرهقة.

وألعاب نفسية تانية ممكن تكون بتحصل معاك،
ماتسمحش إن ده يحصل، واجه وماتسبش نفسك يتلعب بيك وتوصل لاكتئاب أو حيرة وقلق زيادة،
انت غالي ومحبوب وليك قيمة كبيرة في يسوع في كل حالاتك وأحوالك،
ماتتنازلش إنك تعيش علاقات صحية آمنة مش سامة..
ولو ده حصل معاك فا دايمًا في فرصة للشفاء ❤️