الخوف من فكرة الجواز والمسؤولية

[توتا كمال]

كل ما اشوف ناس بتتجوز او الجواز يقرب من حد من اصحابى ,, بخاف !
ولما يقرب مني بترعب!
مش فاهمة ازاى لسة فى ناس عايزة تتجوز فممكن يروحوا اى فرح يشوفوا اى واحدة يتجوزوها والسلام او يوصوا حد يشوفلهم عروسة ! ازاى الموضوع سهل وبسيط عندهم كدة ؟!
انت متخيل ان كل اللى فات حمادة وكل اللى جى حمادة تانى وتالت ورابع ولحد ماتموت !
انت بتختار حد لازقلك طول حياتك فلازم يكون اكتر حد بترتاح معاه اكتر من نفسك بحيث لما تكون مش طايق نفسك تلجأله وترتاح معاه حتى لو هتفضل ساكت .. تخيل دة لو طلع حد دمة تقيل او اتم او نكدى اصلا او كويس وكل حاجة بس مش عارف ترتاح معاه , روحه تقيله على قلبك !! الموضوع مرعب
انت بتختار حد بيضحك ويزعل معاك فاهم كلامك واسباب ضحكك .. تخيل جيت بتضحك على حاجة تافهة جدا ولقيته قالك ايه التفاهة دى و قفلك مثلا ! لا ومش هينفع تغيرة خلاص انت لبست بقى ومتجوزين وبتاع ,, تخيل شكل حياتك اية وانت مش عارف تهزر او تضحك مع المفروض حد انت و هو ملزوقين فى بعض طول حياتكم ! انا مش قادرة اتخيل -_-
تخيل عييت او جالك اى مرض خلاك بقيت كائن مقرف جدا فى شكلك و فافعالك ,, هترجع ازاى مثلا قدام حد اصلا مش شايفك غير من برة قدام حد مش بيحب روحك وحاسس بألمك .. فلنفرض جالك تبول لا ارادى وراح سابك ومشى لأنه قرف مثلا او قالك انا قرفت مش قادر استحمل او استحمل بس شكله باين عليه ان بيعمل دة كواجب ! لو انا فهتمنى انى اموت ....
و غيره حاجات كتير ,,
انت بتختار شريك هيفضل فى حياتك فى تفاصيلك لازم تحس بالحرية معاه فى كلامك فى افعالك حد صحبك تقوله على مصيبك حتى لو كانت فى حقه ,,, حد يعرف يسامحك و تسامحه ,, حد لما تحس ان ملكش اى قيمة يبقى شايفك انجح انسان .. حد وانت فى اسوأ حالاتك بيفضل شايف جمالك
الموضوع مش سهل ,,, خالص
الجواز للشجعان ,, للى بيحبوا بجد ,, الجواز حرفيا هو القرار الاصعب من اى قرار فى الدنيا لو هتاخدوا الخطوة دى ياتبقوا قدها يا اما متتجوزوش الحياة مش ناقصة بيوت كئيبة مملة وناس مش قادرة تبص فى وش بعض ومشاكل و عدم تفاهم .. والمرعب ان ملهاش اخر و هيبقى هو دة شكل حياتكم لحد ماتموتوا !!
متتجوزوش من المتاح قصادكم ,, متتجوزوش لانه لازم تتجوزوا
اتجوزوا بس لما تلاقوا روحكم على هيئة شخص تانى💙

[Mary Naeem]

مشاركة جميلة جدا
ربنا يبارك حياتك