اروع قصص حب حصلت في الكتاب المقدس

[walaa farouk]

❤أروع قصص حب حصلت في الكتاب المقدس !!
كل أسم من دول وراه قصة حب كبيرة💞

👈أول قصه معانا هى قصة حب إبراهيم و سارة (الحب الناجي)
قصتهم مرت بمشاكل كتير، من أكبرها انه اضطر ينكر كونها مراته و قال انها اخته علشان فرعون ميقتلوش،
هي كانت فعلا اخته من أبوه بس ده مايمنعش إن ابراهيم قال نص الحقيقة،
مش بس كده ده كرر نفس الموقف مع ابيمالك ملك جرار !

حب سارة و ابراهيم عمره ما نقص ولا اتغير بسبب المواقف اللي مرّوا بيها، و اللي ميز حبهم أنه نجا..نجا من أنه يضعف أو يموت!

لما بنمر بمشاكل كبيرة في الجواز،
ونلاقي أن المواقف بتتكرر ممكن نحس في وقت أن مفيش فايدة وان شكلنا اختارنا غلط من الاساس..
لكن قصة ابراهيم و سارة ممكن تعلمنا درس مهم قوي عن قوة الحب اللي خلاهم يسامحوا و يكملوا بمحبة حقيقية،
و الله باركهم في كل حياتهم و أعطاهم اسحق (ابن الموعد)
وهو ده اللي نقدر نسميه الحب الناجي ..
.

✌القصه التانيه هى أسحاق ورفقه
ممكن نسميه " الحب من أول نظرة " أو " جواز الصالونات"

القصة بدأت لما ابراهيم ابو اسحاق كلّف أليعازر الدمشقي بإنه يسافر علشان يدوّر على عروسة لإسحاق،
و قاله انها لازم تكون من العيلة لانه مكنش عايز يختلط بالناس اللي كان عايش وسطيهم .. إليعازر إتقابل مع بنت جميلة اسمها رفقة من عيلة ابراهيم،
و طلبها للجواز بإسحاق وأهلها وافقوا فأخدها ورجع بيها بلده،
اسحق أول ما عينيه وقعت على رفقة، حبها واتجوزها،
وعاشوا سوا سنين حلوة وسنين تانية مُرة مليانة بالترحال والسفر،
ورفقة صبرت على كل ده وفضلت جمب جوزها..

الحب من أول نظرة عادة مابيدومش،
لكن اللي حصل في القصة دي كان مختلف،
واللي خلاه مختلف ويدوم هو إن أليعازر طلب مشيئة الله وهو بيختار عروسة لإسحاق،
الفكرة مش في نوع الحب اللي هتحبه و حصل ازاي!
الفكرة انك تبقى بتطلب دايمًا تسمع صوت ربنا في موضوع ارتباطك،
وثق انه هيرشدك زي ما عمل مع اسحاق..

👌القصه التالته يعقوب وراحيل (الحب الظالم)
بعد ما ضحك يعقوب على أبوه وأخد البكورية والبركة بتاعة عيسو أخوه،
هرب وراح عند خاله لابان وهناك اتعرف على راحيل بنت خاله وحبها وطلب منه انه يتجوزها،
وعمل اتفاق مع خاله انه هيشتغل سبع سنين ويتجوزها بعد كده وبعد ما خلصوا السبع سنين
خاله ضحك عليه وجوّزه بنته الكبيرة ليئه،
ليئة مكانتش جميلة زي راحيل وعلشان كده مكانش فيه حد راضي يتجوزها..

ليئة حست بالظلم والخداع من أبوها وأكيد كمان يعقوب حس بكده لأنه ماتجوزش البنت اللي بيحبها،
ومع إن الكتاب المقدس مذكرش انه كان بيحبها،
لكن هي كانت مخلصة ليه وعلشان كده الله باركها وخلاها تخلف أولاد يشيلوا اسمه..
حُب يعقوب لليئة كان حب ظالم،
ظالم لأنها اتفرضت عليه، ولأنها عارفه انها مش مقبولة وكأن ابوها باعها علشان العادات والتقاليد، لأن ماينفعش البنت الصغيرة تتجوز قبل الكبيرة!

فضل حُب يعقوب لراحيل زى ما هو وعمل اتفاق تاني مع خاله انه يخدم سبع سنين كمان علشان يتجوز راحيل،
وهنا بنشوف الحب المثابر من يعقوب انه يشتغل 14 سنة علشان خاطر يتجوز واحدة بيحبها،
وبعد 14 سنة فعلاً اتجوزها وحقق حلمه..

الحب ممكن يخليك قوى وممكن يخليك مهزوم وضعيف ..
انت اللي بتختار في النهاية حياتك تمشي ازاي!
.
🤚القصه الرابعه شمشون ودليله (الحب الأعمى)
قالوا في الأمثال أن الحب أعمى..
اللي بيحب دايمًا ما بيشوفوش عيوب اللي قدامه وفعلاً ده حقيقي ..
شمشون من أشهر أبطال الكتاب المقدس لما حب دليلة من قلبه ماشفش عيوبها، حبها لدرجة أنه قالها على السر اللي مكانش حد يعرفه أبدًا غير أبوه وأمه..
سر قوته اللي في شعره وأنه نذير للرب من صغره..

مكانش شايف في دليلة أبدًا انها ممكن تبقى عدوته وتبيعه بكل سهوله لأعدائه علشان خاطر الفلوس !

ومن قصة زي بتاعة شمشمون دي نتعلم :
لما تحب حد لازم تكون مختاره صح من الأول، لأن ناس كتير بتتخدع بسبب سرعة الاختيار،
وبترجع تندم لأن قرارتها مبتبقاش محسوبة صح،
الحب والارتباط قرار محتاج تفكير عميق!
.
👈القصه الخامسه أستير والملك (الحب المنقذ)
استير الملكة المشهورة اللي انقذت شعبها من الهلاك التام والخطة الشريرة اللي كان بيخطط لها هامان وكل أعوانه علشان يخلصوا من شعب اليهود للأبد ..

استير اتاخدت مسبيه في مكان مكانتش تعرف فيه حد واللي كان مسئول عن تربيتها هو مردخاي يعتبر في مقام عمها وكان مأكد عليها انها لازم تخفي هويتها وماتقولش انها يهودية علشان ماتموتش وفي يوم من الأيام الملك أحشاويرش أصدر قرار انه عايز واحدة تبقى ملكة وبعد مباحثات كتيرة،
الملك أختار استير وخلاها ملكة..
بس مكانش من صلاحيتها ولا مسموح لها أنها تدخل عند الملك أي وقت..
إلا لما يحتاجها فهيناديها ..

ولما مرت الأيام وأكتشفت استير المؤامرة اللي بيدبرها هامان الشرير ضد شعب اليهود،
قامت استير ودخلت على الملك من غير ما يستعديها و عرضت حياتها للخطر رغم انها عارفة ان عقوبة اللي حصل ده بتبقى الحكم بالموت!!
بس لأنه كان بيحبها قِبِّل أنها تتكلم معاه و سمع منها وأعلنت له عن حقيقتها وأن هي وشعبها معرضين للموت والملك أصدر أمر بموت هامان وكل الناس اللي فكرت تأذي أستير وشعبها ..

حب الملك لأستير انقذها من الموت هي وشعبها!!
اللي بيحب حد بيحاول ينقذه من أي موقف هو بيبقى فيه حتى لو على حساب قرار أخده زي الملك كده،
الحب فعلاً بينقذ !
.
👈القصه السادسه بوعز وراعوث (الحب الآمن)
بعد ما مات جوزها اختارت انها تفضل عايشة مع حماتها وترجع معاها على بيت لحم،
وسابت وراها كل أهل بيتها وشعبها في موآب،
ولما رجعوا كان ابتدى موسم حصاد الشعير في بيت لحم وفي يوم من الأيام راحت راعوث الحقل علشان تلم شوية حبوب من اللي بتقع من الحصادين هناك ولأجل الحظ!
ومكافأة ربنا ليها اشغتلت في حقل بوعز..

بوعز كان من قرايب جوزها ولأنه كان دايمًا بيسمع عن اخلاصها مع حماتها سابها تشتغل في الحقل وتجمع الحبوب وأوقات تانية كان بيقول للحصادين انهم يتعمدوا يوقعوا الحبوب علشان تاخدها راعوث ..
ولأن كان في شريعة اليهود زمان أن لو راجل كان متجوز ومات ومكانش ليه أولاد،
يجي أخوه يتجوز مراته علشان يكون له نسل ولأن أخو محلون زوج راعوث مات،
اتجوزها بوعز و خلفت منه عوبيد و الله كافئها بإن الملك داود جه من نسلها والمكافأة الأكبر أن المسيح نفسه جه من نسلها ..

راعوث واللي معنى اسمها جميلة،
لقت في بوعز الآمان بعد ما كانت جاية أرملة و في بلد غريبة ماتعرفش فيها حد،
الله كافأها واتجوزت واحد حسساها بقيمتها وبالحب الحقيقي والآمان ..

من أهم الحاجات اللي بيديهالنا الحب هو أحساسنا بالأمان ..
الأمان اللي بيخلينا نعرف نحب أكتر وطول ما أحنا مطمنين هنعرف ندي والعلاقة دي هتتطور..
وده بيبقى اسمه الحب الآمن
.
👈القصه السابعه والأخيره هى قصة هوشع وجومر
ودى بقى (الحب الحقيقى)

وزي ما قالوا أن الحب أعمى، قالوا برضه أن الحب الحقيقي ليه علامات،
الحب اللي بيضحى وبيستحمل وبيتحدي ومش مستني مقابل ..
وده اللي عمله هوشع!!

هوشع النبي اللي أمره الله أنه يروح يتجوز واحدة زانية ومش بس يتجوزها لأ،
دا كمان يحبها!!
أصله فيه ناس بتتجوز من غير حب حقيقي و بينجرفوا ورا مجرد حب سطحي
وساعتها الحب دا مابيكملش ودايمًا بيبقى فيه مشاكل كتيرة بسببه!

وفعلاً سمع صوت ربنا وراح اتجوز جومر،
العجيب انه بعد ما اتجوزها وقعدت فترة معاه سابته ورجعت تاني تعمل الغلط،
لكن هو فضل بيحبها، وفضل يدور عليها لغاية مالقاها ورجعت تاني ليه!

هوشع ضحى بكل حاجة تقريبًا،
بصورته وسط الناس بانه نبي لله ويعمل حاجة بتخالف كل تعاليم الله اللي بينادي بيها!
و ضحى بصورته كراجل في مجتمع مش هيقبل شكل الحب ده !

هوشع كان رسالة واضحة للي عمله ربنا معانا بالظبط،
حب الله حقيقي، لا نهائي،
غير مشروط مهما عملنا الله هيفضل حبه ثابت للأبد..