لو كان يسوع هنا

[walaa farouk]

أحنا بنتخيل حقيقي لو ربنا يسوع
كان موجود وسطنا دلوقت كان عمل أيه؟ 🙃

كان زمانه راح لكل واحد بيتقال عليه ( شِمال )
وكان قاله: أنا قابلك يا حبيبي زي ما أنت! تعالي أنا بيتي مفتوحلك طول الوقت.

كان زمانه راح للناس اللي هاريين نفسهم علي الانسجرام
-وغيره- صور عشان يعجبوا الناس ويلاقوا حد يشاركهم لحظاتهم
... كان هيجيلهم وهيقولهم : أنا بحبكم منغير ما تبذلوا أي مجهود! متعملوش أي حاجة انا هناا عشانكم ومش همشي لما تتعبوا وتضعفوا ويبقي شكلكم وحش أو الlikes تقل !

كان هيروح لبتوع إعدادي وثانوي ويقولهم : أنا مقدر أنك تبقي في سن مراهقة، مش زعلان منك أبدا أما تحس بمشاعر تجاه الجنس الآخر.. أنا مش بزعل منك يا ابني أما بتغلط، أنا اساسا بحبك
ومش بشوفك عريان أو وحش! أنا بخاف عليك تتجرح من اختياراتك الخطأ او المتسرعة! بس أنا بحبك دايمااااا.

كان زمانه راح لبتوع الثانوية العامة اللي حاسيين ان الكلية دي نهاية الحياة، وكان هيهون عليهم ويقولهم: انا عايزك ناجح في كل شيء مش الدراسة بس، ثم أنه يكفيني أمانتك..
أنا مدحت العبد الأمين عشان أمانته مش عدد الوزنات اللي ربحها.
+ أنت ابني الغالي اللي مكانته مبتتغيرش عندي حتي لو فشل في مجال ما !

ولو كان دخل الكنيسة ! كان هيقعد ورا.. مكنش هيحب الزيطة وكدا، كان هيشوف اللي قاعد لوحده ويقوله: حبيب قلبي، منور بيت أبوك.
كان هيقرب من الناس المريضة واليائسة والمحبطة!
كان هيقرب من الشباب الضايع اللي بيداري ضياعه بابتسامة سخيفة!
بيتهيألي كان هيوعظ ممكن!
بس كان هيحب ويحتوي ويحضن الأول قبل ما يوعظك.. أما يلاقيك بتصرخ من وجع الخطية أو من خذلان الناس، هيطبطب عليك ! مش هيعلقلك مشنقة ! وأزاي تحس بكدا !! وتوب يا عبد وإلا هوديك الجحيم!

**
ربنا مش الصور المغلوطة اللي شوفناها من الناس عنه.🙃

ربنا مش لازم يكون اللي أنت شوفته في باباك الجسدي أو خادمك أو خادمتك أو مامتك او اختك او اب اعترافك!

ربنا مهواش إله ضخم قاعد علي كرسي في السما ومستنيك تغلط عشان يديك علي دماغك !

ربنا بيحبنا.. ❤