١٠ نصايح نفسية في الشراء

[walaa farouk]

"المتر ب ٨٠٠٠ جنيه" ..

لحظات من الصمت المختلط بابتسامة ساخرة .. "ليه هو انا باشتري شقة ؟؟ " ..

"ده سجاد ايراني - شيرازي- حرير" .. رد البائع ثم انصرف في خجل ..

حديث التقطته أذناي و انا باتفرج علي قسم السجاد في معرض كبير من بضع ساعات تقريباً ..

كان حديث البياع عن "القيمة" و كانت سخرية الشاري من "السعر" ..

من حقك تعترض ، بس مش من حقك تستغرب و لا تتريق ..
عاوز سجاد رخيص ما تروحش اغلي قسم و تنقي فيه !!

و ده خلاف ازلي بين الناس : اشتري القيمة بالسعر المعروض الغالي
، و لا اشتري الرخيص حتي لو كان قليل القيمة ؟؟

طبعا لكل قاعدة استثناءات..
هناك أشياء غالية و سفيهة هدفها فقط الاستعراض و التباهي ،
و هناك أشياء رخيصة لكن قيّمة لمن يعرف قيمتها ..

لكن تبقي الحقيقة الأساسية: انت تاخد مقابل ما تدفع
you get what you pay for
و القاعدة بتقول : "الغالي ارخص" .. و باضيف عليها "لو معاك تمنه" ..

يعني مثلا "عربية قديمة رخيصة متبهدلة" ممكن تكلفك أغلي من "عربية جديدة" زيرو أغلي منها ..

الدروس العشرة :

١-اوعي تسترخص .. اجّل الشراء لغاية ما تلاقي الحاجة القيّمة و لو بعدين ..

٢-اوعي تشتري حاجة علشان بس تمنها قليل ، ح تكلفك أغلي و ح تبوظ اسرع ..

٣-اشتري الرخيص بس في حالة واحدة : لو عارف انك مش ح تعرف تشتري إلا بالتمن ده
، و دي حدودك و إمكانياتك .. يعني انت مش ح تشتري سيارة فارهة
، يبقي تشتري احسن عربية في حدود ميزانيتك ، بحكمة ، و بعدين ترضي و تتراضي و تشكر ..
Best value for money

٤-اشتري القيّم و محتاجه حتي لو علي مراحل ..

٥-اوعي تشتري حاجة مجهولة المصدر ..

٦-اوعي تشتري حاجات غالية للمنظرة و بس .. محتاجها و معاك تمنها و بحكمة ماشي ، غير كده لأ ..

٧-اوعي تشتري لمجرد المقارنة بغيرك أو لحب الملكية بلا هدف أو فايدة ..

٨-قبل ما تشتري أسأل اللي اشتري قبلك و عنده خبرة .. نصيحة قليلة تجنبك بلاوي كتير..

٩-القيمة بتعيش و تعمر ، الرخيص بلا قيمة يفرحك ساعة و يندمك بقية السنة ..

١٠-اوعي تبخل علي نفسك أو غيرك في حاجة تسعدهم و هم محتاجينها ..
خليك كريم بلا تبذير و حكيم بلا تقتير..

و لا ايه رايك ؟؟