جيش وسور

[walaa farouk]

خلاص بقى تعود ..
إن حياتهم مليانة خناقات ..
وصوت عالى ومناوشات ..

لحد ما جه يوم .. اتغيرت الطريقة ..
اصل الشيطان مابيزهقش ..

اتخانقوا كالعادة .. وناموا ..

صحى هو تانى يوم الصبح ..
لقى مراته بتقول له ..
بابا اتصل بيا و بيقول لى "ماتخافيش خير"
قال لها .. باباكى وبيقول خير ؟؟؟؟ .. ربنا يستر ..

وواحد لابس وش الحكمة ..
داخل عشان يحل ..
ماتيجى تقعد معايا انت ومراتك ..
ونتكلم يمكن نلاقى حل ..

ساب ابنه ..
واخد مراته وراحوا له ..

فى نص النقاش .. صوت الحكمة يقرر ..
معلش انتو جوازتكو مش نافعة ..
مراتك هتمشى وتسيبك ..

هتمشى ازاى .. احنا جينا سوا
وهنروح سوا ..

وحاول ياخد مراته وينزلوا ..
لقى نفسه بيتمنع بالقوة ..
وناس مايعرفهمش كانوا جاهزين للعنف ..
رفع ايده واستسلم ..

ورجع البيت لوحده ..
هو وإبنه وحيطان البيت ..

وشوية تهديدات .. ونقاشات عقيمة ..

وفجأة .. محضر من قسم البوليس ..
وفيلم يتعمل عليه عشان يخاف ..

وهو مطلوب منه يسلمها ابنهم اللى ماكملش سنة
قعد يتحايل على الظباط ..
طب بلاش اسلمه فى القسم
واحد منهم قال له للأسف ..
لازم هتسلمه وهتمضى على محضر كمان ..

ووطى على ودنه .. وشوشه ..
خلى بالك دا لمصلحتك ..

الناس اللى انت قدامهم دول .. ماعندهمش رحمة ..
روح هات ابنك ..

وكأنه فيلم وسيناريو ..

الساعة 2:30 صباحاً ..
والأب داخل شايل ابنه نايم دافيان فى حضنه ..
واداه لمراته ..
ودمعته متحجرة فى عينيه
اصله مش عارف هيشوفه تانى امتى

ونفس الايد اللى كانت شايلة روحه ..
هى نفس الايد اللى مسكت القلم ..
عشان تمضى على محضر تسليم روحه ..
وعدم تعرض لحد ما يكمل 9 سنين ..

وكلمة زىّ الصاروخ منها
"هتشوف انا هاعمل فيك ايه"
لكن الرد من جوزها كان اقوى
"انتى خلاص عملتى اكبر حاجة ممكن تحصل"

وخرجوا هم التلاتة من القسم فى الفجر
بس اتنين مشيوا فى اتجاه
وهو رجع لوحده
10 ايام مروا ..
وحس انه نفسه يشوف اول فرحته
راح وخبط على بابهم
وييجى الرد ..
معلش روح بيت ناس قرايبنا
وانا اجيبهولك هناك تشوفه

طبعاً احتياطات امن جوا الشقة ..
ولا كأنه مجرم سوابق ..
وناس قاعدة بتتفرج عليه ..
وهو قاعد لوحده بيلاعب ابنه ..
وايد تتحرك وتقفل الترباس من جوة ..
معلش .. خايفين ياخد ابنه ويجرى

يبص لمراته بابتسامة ميتة ..
زى الحاجات الكتير اللى ماتت جواه ..
ويقول لمراته .. باقولك ايه ..

انا مش هاشوف ابنى تانى بالطريقة دى
انا ليه اشوف ابنى فَرجة قدام الناس؟
وييجى ردها بقسوة
انت اللى عملت كدة فى نفسك
وتعدى شهور .. والنار تنطفى
والعصبية تهدا ..
ويرجع الواد لحضن ابوه ..
وهى كمان ترجع ..
شوية تحس ان اللى عملته كان صعب ..
وشوية تقول له ..
انت مالك مكبر الموضوع كدة ليه ..
هو انت مابتنساش ..

وتعدّى كام سنة تانيين ..
ويتخانقوا .. وتزعل هى وتمشى
بس تمشى المرة دى من غير ابنها
وبعد فترة .. يوحشها الولد وتطلب تشوفه
وتختار هى بنفسها ..
انها تشوفه فى نفس البيت
وتروح تقعد على نفس الكرسى
اللى قعد عليه الاب من سنين
ويبقوا نفس الناس قاعدين ..
وبرضه بيتفرجوا
وتسأل هى نفس السؤال

انا ليه اشوف ابنى فَرجة قدام الناس؟
وفى عز انفعالها .. انا هاخد بنتى مش هاسيبها له ..

وييجى الرد من الناس اللى قاعدين
انتى اللى عملتى كدة فى نفسك ..

وكأن المخرج قرر يرجع فلاش باك ..
لنفس الجملة دى من سنين ..

ويكملوا الناس كلامهم ..
هو هياخد ابنه وينزل ..

ونفس الايد اللى قفلت الترباس من سنين ..
تتمد تانى وتفتحه ..
والباب اللى كان مقفول ..
عشان ماياخدش ابنه وينزل .. يتفتح له ..
وقرار الحرية المتأجل ..

اتفضل خد ابنك وروّح ..
واحنا هنتصرف معاها ..

وهو نازل على كل درجة سلم ..
مافيش فى لسانه غير كلمة واحدة
اللى عند ربنا ما بيروحش

وشوية وترجع البيت ..
انا اسفة .. ماكنتش اعرف ..
ان اللى عملته فيك كان صعب قوى كدة ..
لما عشته .. حسيت بيه ..
ويضحك الاب بينه وبين نفسه وهو حاضن ابنه ..
وهو خارج شايله من عند الطبيب النفسى
اللى بيعالجه من تأثير اللى حصل فيه
قال لها .. ولا يهمك .............

حكايتهم لسة ماخلصتش ..
بس اللى حصل بعد كدة
مايختلفش كتير عن اللى حصل قبل كدة

م الاخر كدة ..
لو ولادكم سلاح .. هتحاربوا بيه بعض
يبقى انتو ماتستاهلوش يبقى عندكم النعمة دى ..

ولو ولادكم جايزة ..
هتدوها لبعض لو عملتوا الى عليكم
يبقى انتو ماتستاهلوش يبقى عندكم النعمة دى ..

ولو ولادكم عصاية ..
هتضربوا بها بعض لو عملتوا حاجة غلط
يبقى انتوا ماتستاهلوش

ولو ولادكم الجزرة ..
اللى هتربطوها قدام الحمار عشان يمشى عِدِل
يبقى انتوا ماتستاهلوش

لكل اب وام .. الغباء اتحكم فى تفكيرهم ..
والسلطة والكبرياء عموا عينيهم ..
عن انهم يشوفوا الحقيقة ..

عايز تعرف انت ايه بالنسبة لابنك ..

انت المعلومة الصح ..
والقدوة فى كل تصرف ..
انت السمعة الحلوة ..
والفخر اللى هيحسه لما يتنطق اسمك ..
انت المستقبل اللى مايعرفش عنه حاجة ..
والجيش اللى بيحارب عنه ..
انت السور العالى اللى ماحدش يقدر يعديه ويوصل له ..

هو ماختاركش ..
خليه لما يدرك .. يشكر ربنا على اختياره ليك ..

لو ثقة ولادكم فيكم .. ثقة عمياء
خليكو انتو مفتحين .. وعلى أد الثقة دى ..

انتو بتسرقوهم ..
بس عارفين انتو بتسرقوهم من مين؟ ..

بتسرقوهم من ربنا .. عشان هم بتوعه ..
انتو مالكوش اى فضل فيهم ..

واذا كان اللى بيسرق من بنى آدم ..
بتطبق عليه عقوبة ..

مابالكم باللى بيسرق من ربنا .. يا ويله ..

لو قلبكم بيتوجع لما بتسمعوا ان طفل اتخطف ..
طب مانتو بتخطفوهم من بعض ..

لو مش عارفين قيمة اللى بتعملوه ..
فيه غيركم نفسه فى ضُفر طفل م اللى بتقصّوه ..

الكلام اللى فوق ده مش تأليف ..

الكلام ده حقيقى جدااا ...