فرح الملكوت

[Mary Naeem]

فرح الملكوت






اذا شي مرة صارت معك مشكلة، وأكيد رح تصير، شو رأيك تتعلم من هالمرأة طريقة فعّالة لحل المشاكل؟؟
هالطريقة كتير بسيطة ما بتكلف شي وما بدا كتير وقت ولا كتير جهد…
تعلّم من هالمرأة إنّو التبصير خزعبلات ولادية وما بيفيد بشي، كرمال هيك هي ما بصّرت تتلاقي الدرهم المفقود.
تعلّم من هالمرأة إنّو إتهام الآخرين من دون دليل دامغ بيزيد الطين بلّة وما بيشيل العلّة، كرمال هيك هي ما اتهمت أهل بيتها ولا الجيران بسرقة الدرهم.
تعلم من هالمرأة إنّو الاستسلام قدام الصعوبة هو من البداية هزيمة من دون حرب وهدية ثمينة للعدو، كرمال هيك هالمرأة ما استسلمت وما قبلت فكرة إنّو الدرهم ضاع ومش رح يرجع.
تعلم من هالمرأة الانتباه وسرعة الملاحظة لانك إنت حارس ع بيتك وعيلتك وشغلك ورسالتك وحياتك، كرمال هيك انتبهت انو درهم واحد من أصل عشرة مفقود.
تعلم من هالمرأة الادخار، يعني تعرف تخبي قرشك الأبيض ليومك الأسود، وتسهر ع كنوزك المادية والروحية وما تفرط فيهن أبداً، إنما تنطر الفرصة الذهبية والوقت الذهبي وتكون حاضر قناديلك معباية زيت تستقبل العريس.
تعلم من هالمرأة إنك تروح مباشرة عالهدف من دون تضييع وقت بتحليلات خرافية من نسج الخيال، أو التلهي برمي الفشل عالناس.
تعلم من هالمرأة إنك تحدد بدقة مجال شغلك والهدف منّو. هيّ فتّشت ببيتها ومش ببيت الجيران، لانو المشكلة عندها ومش عند غيرها، شالت الخشبة من عينها قبل ما تحكي عالقشة بعين غيرها.
تعلم من هالمرأة إنّو نظرك محدود وفِي إشيا كتير قدامك ما بتقشعها من دون إنارة قوية، والحل بيكون قدام عيونك وانت متل الأعمى منّك شايفو، ضوّي هالقنديل، شعشع هالمصباح
(كلمتك مصباح لخطاي ونور لسبيلي) ساعتها بتكتشف النقص اللي فيك وبتعبيه من خيرات ربنا.
تعلم من هالمرأة التعزيل والتكنيس (فحص الضمير) تتلاقي حالك وقت تكون ضايع، وتلاقي البتحبو قبل ما تخسرو وتلاقي كنزك قبل ما يسوس وينسرق وتلاقي الله قبل فوات الاوان.
تعلم من هالمرأة ترجّع الفرحة اللي ضاعت منك بأسرع ما يكون، قبل غياب الشمس، ما تخلي عدوك يشمت فيك ويضحك بعبّو لمن بيشوفك نايم ومقهور، أو نايم ومسموم، أو نايم ومهزوم، رجّع الفرحة لنفسك لبيتك وشارك أهلك وجيرانك بفرحتك.
لو هالمرأة عزمت رفقاتها وجاراتها من أول المشكلة، برأيك كانت لقيت الدرهم المفقود؟؟

تعلم من هالمرأة تتحمل مسؤوليتك بذاتك وما تلوم حدا، لانو الخلل بداخلك انت، والنقص بشخصيتك مش عند الناس… وقت المشكلة تعلم تصمت وتصبر، تضوي وتعزل جوّاتك وأكيد رح تنتصر وتشارك غيرك بفرحك، فرح الملكوت.